Багъманчийрин къайгъуяр

Абуру чаз лагьайвал, районда багълари 3656 гектардин майданар кьунва. Абурукай 2498 гектар бегьердал атанвай, 1159 гектар жегьил багълар я. Алатай йисуз районда, план 80 гектар яз, 212 гектарда цIийи багълар кутуна.

Алай йисуз 449 гектарда багълар кутун планламишнава. И кардиз гьазурвилерни аквазва.

Райондин агропромышленный комплексда уьзуьмчивални кар алай хел я, амни виликди физва. И кардин патахъай 2020-йисуз районда 14396 тонн ципицIар кIватI хъувуни (юкьван гьисабдалди – гьар са гектардай 106 центнер) ачухдиз шагьидвал ийизва.

Райондин АПК-да 3 СПоК, хуьруьн майишатдин 27 кархана, 47 КФХ, 20942 ЛПХ кардик ква, 960 арендаторди кIвалахзава. Им еке къуват я.

Гьамидин Абдулкъафаров ва Къазагьмед Абумислимовни галаз чун арендадин са шумуд участокдизни фена, кIвалахрихъ галаз чкадал таниш хьана.

Агъа-СтIалрин Къазмайрилай тир Абдурагьман Бабаева (сад лагьай шикилда) Дагъустандин хуьруьн майишатдин институт ва Волгограддин педуниверситетдин химиядинни биологиядин факультет

акьалтIарна. Ада яргъал йисара хайи хуьруьн юкьван школадин директорвиле кIвалахна, алай вахтунда ам школада муаллим-социолог я.

РФ-дин умуми образованидин гьуьрметлу работник, Президентдин грантдин сагьиб тир Абдурагьман Бабаев районда ва адалай къецени гзафбуруз тежрибалу агроном язни чида. Адахъ 2006-йисуз кутунвай ичин, шефтелин ва чуьхверин 2 гектар багъни ава. Чешнелу гелкъуьн тешкилнавай багъларай ада гьар йисуз емишрин тарифдин бегьерарни кIватI хъийизва. Идалайни гъейри, А. Бабаев тарар обрезка ийидай, багълар азаррикай ва хаталу гьашаратрикай хуьдай, ятар гудай халис устадни я. ИкI, 2015-йисуз ада тарар обрезка авунай районда тухвай конкурсда (28 багъманчидин арада) ва республикада тухвай конкурсда (32 касдин арада) 1-чкаяр кьуна. И агалкьунрай А. Бабаеваз ДР-дин хуьруьн майишатдин ва суьрсетдин министерстводи 1-дережадин диплом ва рангунин телевизор гана.

Лагьана кIанда, А. Бабаева багъларихъ гелкъуьнин рекьяй вичин тежриба (мастер-классар къалуруналди) Мегьарамдхуьруьн, Къайтагъ, Дербент районра чирна. Багъманчивилин «сирер» чириз ам Кьасумхуьруьн телевиденидай мукьвал-мукьвал экъечIзава.

Эминхуьряй тир Алимирзе Агъамирзоевни (кьвед лагьай шикилда) тежрибалу агроном-уьзуьмчи я. Ада саки 25 йисуз «Аламишинский» совхозда уьзуьмчивилин бригададин бригадирвиле, кьилин агрономвиле ва 6 йисуз «Зардиян» ООО-да старший ва кьилин агрономвиле гьакъисагъвилелди зегьмет чIугуна. 2018-йисуз А. Агъамирзоеваз «Дагъустан Республикадин хуьруьн майишатдин лайихлу работник» лагьай тIварни гана.

Эхиримжи йисара Алимирзе Агъамирзоева Эминхуьре арендатор яз кIвалахзава. Адахъ 49 йисан муддатда арендада къачунвай 8 гектарда кутунвай уьзуьмлухар ава. Чаз акурвал, уьзуьмлухар хъсан гьалда ава. Анра жергейрин араяр цанва, тегьенгрин пунариз перер янава, ятар ганва. Чун фейила арендатор тегьенгрин кьурай ва герек авачир хилер атIунал машгъул тир. 7 гектарда и серенжем кьиле тухванвай.

А. Агъамирзоева чаз лагьайвал, ада гьар йисуз уьзуьмлухрин гьар са гектардай 95-110 центнер ципицIар кIватI хъийизва.

Кьасумхуьруьн телевиденида кардик квай «Пешекар агрономдин меслятар» передачадани А. Агъамирзоева мукьвал-мукьвал иштиракзава, меслятар къалурзава.

- Са рахунни алачиз, Абдурагьман Бабаев ва Алимирзе Агъамирзоев хьтин инсанриз-пешекарриз халкьдин суфра берекатлу ийизвайбур лугьуз жеда, — алава хъувуна Гьамидин Абдулкъафарова. – Гьахьтин инсанар районда гзаф ава. Аферин ва баркалла чилин къадир авай, зегьмет чIугвазвай инсанриз!

Текст кхьейди ва шикилар ягъайди Хазран Кьасумов я