Гайи тапшуругъар тамамарзавай гьал ахтармишна

А тапшуругъар классар герек мебелралди ва маса тадаракралди таъминарунихъ, кIелунинни тербиядин кIвалах хъсанарунихъ, къайда тунихъ ва школадин территория аваданламишунихъ галаз алакъалубур тир.

Райондин Кьил нубатдин сефер яз анин педколлективдихъ ва техперсоналдихъ галаз гуьруьшмиш хьана ва анин материально-технический жигьетдай таъминвилин гьалдихъ, кIелунинни тербиядин кIвалахдихъ галаз таниш хьана, цIийи дараматдиз экъечIайла хьанвай дегишвилер веревирд авуна. Муаллимрини хъсанвилихъди хьанвай са жерге дегишвилер къейдна. Гьа са вахтунда кIелдай кабинетар туькIуьрун патал алатай гуьруьшмишвилин вахтунда муаллимри къарагъарай интерактивный доскаяр ва маса шейэр, гьакIни спортинвентарь къачуз акакьнавач. Мукьвара и амай кимивилерни арадай акъудда.

Классрин дараматрин чкаяр бес тахьун себеб яз са бязи классриз тарсар куьгьне школадин дараматда гузва, абуру алай вахтунда кардик квай госстандартриз жаваб гузвач. Школадин цIийи дараматда авай са бязи чкайрикай, истемишзавайвал, махсусламишнавай кабинетар туькIуьрнава. Рахунрин эхирдай цIийи дараматдин са бязи чкайрикай цIийи классар туькIуьрунин меслятдал атана.

И гуьруьшмишвилин вахтунда райондин Кьил школадин территорияда михьивилер авунин къелемар акIурунин, аваданламишунин жигьетдай субботник кьиле тухузвай гьалдихъ галазни таниш хьана, са жерге тапшуругъар гана.

Куьре Абид