Халкьдин къуллугъда

Вилик йисара эцигнавай дараматда кардик квай и маканда хъсан къайда, михьивал авайди, ана ремонтрин кIвалахар тухванвайди гьасятда кьатIуз жезва.

Цларал алай «Абуру Ватан патал женг чIугуна», «Лезги чIал хуьх ва вилик твах!», «СтIал Сулейман – ХХ асирдин Гомер», «Етим Эмин – лезги поэзиядин чирагъ», «Советрин Союздин Игитар», «Дагъустандин Автономиядин 100 йис», «Чун терроризмдиз акси я» ва маса стендри, фотомонтажри Культурадин кIвализ къвезвайбурун фикир чпел желбзава.

Культурадин кIвалин художественный руководитель бажарагълу манидар Асан Селимова чаз лагьайвал, ина милли музыкадин алатрин, спортдинни сагъламвилин, хордин, шахматринни шашкайрин кружокар кардик ква, абурун кIвалахда 60-дав агакьна хуьруьнвийри иштиракзава.

Культурадин кIвалихъ 12 касдикай ибарат тир художественный самодеятельностдин хъсан коллективни ава. Адан активный иштиракчияр тир СултIанагьмед Хидирова, Селим Селимова, Алла Буржалиевади, Раижат Жигеровади, 1966-йисуз Москвада кьиле фейи Дагъустандин культурадин декададин иштиракчи Гьажибала Гьажимисриева, Сиграт Мегьамедова ва масабуру хуьре ва районда тухузвай культурадинни шадвилерин мярекатра иштиракзава, манияр лугьуналди, музыкадин алатар ягъуналди, кьуьлер авуналди, агьалийрин гуьгьуьлар шадарзава.

Культурадин кIвалихъ кIелдайбурун ва 200 касдиз ацукьдай чкаяр авай тамашачийрин залар гала.

Иниз къвезвайбуру газетрикайни журналрикай, шахматрикай, шашкайрикай менфят къачузва.

Хазран Кьасумов

Шикилда: гьевескаррин дестеди «Гам хрунин мел» сегьне къалурзава.