Рапар ягъун давам жезва

Массовый информациядин такьатра хабар гузвайвал, республикадин шегьеррани районра COVID-19 азардиз акси рапар ядай 54 пункт тешкилнава. Абурукай са пункт Сулейман-Стальский райондин центральный больницада кардик ква.

Лагьана кIанда, санлай чи республикада хьиз, райондани исполнительный властдин органрин регьберри, идарайринни организацийрин руководителри азардиз акси рапар ягъунин хушвал авайди къалурна. ИкI, районда сифтебурукай яз коронавирусдиз акси раб 4-февралдиз райондин Кьил Нариман Абдулмуталибоваз яна.

- За медицинадин рекьяй пешекарриз ва вакцина арадал гъанвай ксариз ихтибарзава ва гьавиляй рабни яна, — лагьанай Н. Абдулмуталибова. – И кар за жув ва жуван хизан патал кьилиз акъудна. Сагъламвал хуьз кIанзавай гьар са касдиз азардиз акси рапар ягъун за меслятни къалурзава.

Райондин регьбердилай гзафбуру чешне къачуна, ЦРБ-диз фена, чпиз рапар яна. Ихьтинбурукай яз завай райондин образованидин управленидин начальник Гьуьсейн Шихбабаеван, райадминистрациядин Кьилин заместитель Абуталиб Фатулаеван, капитальный эцигунрин управленидин начальник Роберт Мейланован ва маса руководителрин тIварар кьаз жеда. Мукьвара лазим тестирование кьиле тухвайдалай кьулухъ рапар ашкъи авай маса къуллугъчийризни ядайвал я.

Алай йисан 17-февралдиз чун нубатдин сеферда райондин центральный больницада ачухнавай пунктуниз фена, ана COVID-19 азардиз рапар ягъунин кIвалах гьикI кьиле физватIа килигна. Чаз акурвал, рапар язавай пунктунин ракIарихъ 7-8 кас нубатда акъвазнавай. Чаз ана къуллугъчиярни акуна, жергедин инсанарни. Рапарни абуру гуьгьуьллувилелди язава.

Чун райондин центральный больницадин кьилин духтурдин заместитель Алиомаров Мевлюдин Мамедовичахъ галаз гуьруьшмиш хьана, адахъ галаз важиблу месэладай ихтилатар авуна.

- Раб ядалди гьар са касди виликамаз ивидик антитела кватIа чирзавай анализ (тестирование) вахкун лазим я, — лагьана чаз Мевлюдин Алиомарова. – Икьван чIавалди районда 322 касди анализар вахканва, Абурукай 124 кас эхь лагьайбур (положительный) яз акъатна. Къенин йикъалди районда 58 касдиз рапар янава. Сифте нубатда рапар медицинадин работникриз, педагогриз, администрациядин работникриз, яни гзаф кьадар инсанрихъ галаз алакъалу жезвай пешекарриз язава. Мумкинвиликай менфят къачуна, заз алава хъийиз кIанзава хьи, рапар ягъун – им гуьгьуьллувилин кIвалах я. Завай мадни лугьуз жеда хьи, вакцина – им важиблу, чарасуз герек карни я. Азардиз акси рапар ягъуналди чавай коронавирусдин вилик падни кьаз жеда.

- Сифте раб ягъай касдиз духтурри 21 йикъалай 2-рабни ягъ хъийизва, — давамарна М. Алиомарова. – Идан патахъай чна абур таъкимарни ийизва. Вакцина авур кас медработникрин гуьзчивиликни жезва, адаз вуч авун, вуч тавун лазим ятIа лугьузва, меслятар къалурзава. Мисал яз, раб янавай касди, гьич тахьайтIа, са вацран къене ички ишлемишун, раб янавай чка пуд йикъан къене цяй кьежирун лазим туш. Коронавирусдиз акси рапар ягъуни вичин хъсан нетижа гузвайдини къейд ийиз кIанзава заз.

Хазран Кьасумов