Субботник кьиле тухвана

ТКО вахтуналди хуьдай полигондин территория михьунин экологиядинни михьивилер авунин мярекатда 50 касдилай виниз инсанри иштиракна, гьа гьисабдай яз райондин Кьил Нариман Абдулмуталибова, райадминистрациядин Кьилин 1-заместитель Лацис Оруджева, райадминистрациядин, «сельсовет «Касумкентский» АСП-дин къурулушрин подразделенийрин сотрудникри ва сервисдин къуллугъри иштиракна.

Ихьтин мярекатар райондин гзаф хуьрерин поселенийрани кьиле фена.

Субботникрин иштиракчийри неинки полигондал физвай рекьин къерехар тирвал гадарнавай зирзибил, векьин амукьаяр кIватI хъувуна, гьакIни ихтияр авачир чкайрал гадарнавай зирзибилни тайинарнавай чкадал хкана, анин территорияда къайда туна. И кардик гьар са касди вичин пайни кутуна.

Эхиримжи вахтара ТКО кIватI хъувунин ва тайинарнавай чкайрал хутахунин жигьетдай республикадин тарифар тайинар тавунихъ галаз алакъалу яз са бязи четинвилер арадал атанва, — къейдна Нариман Абдулмуталибова, — гьа са вахтунда чи меценатар тир Салман Бабаеван ва Имам Яралиеван куьмекдалди чи районда санитарный къайда хуьз алакьна, им кьве варз я а зирзибил гадарунал машгъул тир сервисдин организациядин работникриз мажибарни гуз.

Райондин Кьили субботникда иштирак авур вирибуруз чухсагъул лагьана, и жигьетдай низам-къайда хуьн таъминарун патал са бязи къуллугъриз тапшуругъар гана.

Мадни а кар къейд ийиз кIанзава хьи, и жигьетдай алай вахтунда чи районда йисан вахтунда 15 агъзур тонн зирзибил сад-садавай чара ийидай омплекс эцигунин ва гьакIни талукь инфраструктурани галай ТКО вахтуналди хуьдай полигон туькIуьрунин жигьетдай гьазурвилер акунин серенжемар кьиле тухузва. И объектар эцигун патал муниципалитетди Кьасумхуьруьн поселенидин сергьятда чилин участокни чара авунва. И проект кьилиз акъудун патал меценатар тир Салман Бабаев ва Имам Яралиев куьмек гуз гьазур я.

Куьре Абид