Информациядин политикадин кIвалах вилик тухун

Семинар-совещанидин кIвалахда Сулейман-Стальский районлин Кьил Нариман Абдулмуталибова, райадминистрациядин Кьилин 1-заместитель Лацис Оруджева, Сулейман-Стальский райондин Информагентстводин руководитель Агьмед Гьуьсейнова ва адан заместителри, гьакIни Агъул, Ахцегь, Дахадаев, Дербент, Докъузпара, Къайтагъ, Кьурагь, Мегьарамдхуьруьн, Рутул, Табасаран, Хив районрин, Дербент ва Дагъустандин Огни шегьеррин пресс-къуллугърин руководителри, республикадин СМИ-рин векилри иштиракна.

Семинар-совещание информационный политикадин рекьяй Дагъустан Республикадин Кьилин ва Гьукуматдин Администрациядин Управлениди тешкилнавайди тир.

Райондин Кьил Нариман Абдулмуталибова мярекатдин тешкилатчияр ва иштиракчияр тебрикна, муниципалитетда информациядин политикадин жигьетдай тухузвай кIвалахдикай куьрелди лагьана, мярекатдин важиблувал къейдна.

Республикада сад тир информациядин лишанламиш жедай гьал (чка) вилик тухунин концепция арадал гъунин ва вилик тухунин метлеблувал къейд авуналди, семинар-совещание Дагъустан Республикадин Кьилин ва Гьукуматдин Администрациядин Управленидин начальник Рашид Акавова ачухна. Ада гьакIни коронавирусдин пандемиядин вахтунда республикадин СМИ-рин векилри тухвай еке кIвалах ва и кIвалахдин важиблувал къейдна. Ада лагьайвал, СМИ-ри милли проектар ва госпрограммаяр уьмуьрдиз кечирмишзавай гьал раиж авунин кардани еке роль къугъвазва, обществодин вири къатарихъ ва властдин органрихъ галаз сих алакъада аваз кIвалахзава.

Сулейман-Стальский райондин Информагентстводи тухузвай кIвалахдикай семинар-совещанидал адан руководитель Агьмед Гьуьсейнов рахана.

Дагъустан Республикадин Кьилин ва Гьукуматдин Администрациядин Управленидин муниципалитетрин пресс-къуллугърихъ ва властдин органрихъ галаз алакъа хуьзвай отделдин начальник Аида Изиевади чкадин, чка къалурзавай хабарар раиж авунин кьетIенвилерикай, республикадин информациядин политикадин рекьяй Управлениди тухузвай кIвалахдикай, гьакIни Яндекс. Новости. контент вилик тухунин карда муниципалитетрин вилик акъвазнавай везифайрикай лагьана.

ДР-дин «Координационный информационно-культурный центр» ГБУ-дин руководитель Мухтар Амирова машгьур соцсетрай, гьабурукай яз Teiegram ва TikТok-рай информациядин материалар раиж авунин рекьерай меслятар къалурна, и жигьетдай хейлин мисалар гъана.

Семинар-совещанидин иштиракчийрин патай хейлин суаларни арадал атана. Абуруз Рашид Акавова, Аида Изиевади ва Мухтар Амирова тамам жавабар гана.

Рашид Акавова, семинар-совещанидин нетижаяр кьунихъ галаз сад хьиз, Дагъустандин Кьиблепатан территориальный округдин муниципалитетрин пресс-къуллугърихъ вахтунин ва социальный метлеб авай материалар агьалийрал агакьарунин карда ва кIвалахда агалкьунар хьана кIанзавайди лагьана.

Сулейман-Стальский районда важиблу месэладай зональный семинар-совещание кьиле тухунай райондин Кьил Нариман Абдулмуталибова Дагъустан Республикадин Кьилин ва Гьукуматдин Администрациядин Управленидин векилриз чухсагъул лагьана.