Йисан муаллим, хъсан тербиячи

Сад лагьай чкадиз Испикрин юкьван школада урус чIалан ва литературадин тарсар гузвай муаллим Регина Рамазановна Агьмедова лайихлу хьана.

Малум хьайивал, Регина Агьмедова 1988-йисан 13-февралдиз Испикрин хуьре муаллим Рамазан ва Культурадин кIвалин директор Периханум Къазанбековрин хизанда дидедиз хьана.

Сифтегьан классрилай эгечIна руша школада вири предметрай анжах хъсан къиметар аваз кIелна.

- Муаллимвилин пеше за хатадай хкягъайди туш, — лугьузва Р. Агьмедовади. – Зи дах муаллим я, ада алай вахтундани кIвалахзава. Гьавиляй школада кIелзавай йисарилай зун муаллимвилин пешедал ашукь хьана. РикIе авай мурад кьилиз акъатунал, четин, гьа са вахтунда виридалайни гьуьрметлу пешедин иеси хьунал за шадвални ийизва.

Регина Рамазановнади 2005-йисуз Испикрин юкьван школа, 2008-йисуз Дербент шегьердин педагогический колледж хъсан къиметар ва чирвилер аваз акьалтIарна. Вичин зегьметдин рехъ жегьил пешекарди хайиди тир хуьруьн юкьван школада муаллим-психолог яз кIвалах авунилай башламишна.

2012-йисуз Р. Агьмедова Дагъустандин педагогический университетдин урус чIалан ва литературадин факультетдик экечIна, 2018-йисуз анаг акьалтIарна, бакалавриатвилин дережадай диплом къачуна.

Регина Рамазановнади гьисабзавайвал, пакадин йикъакай, гележегдикай фикирзавай, абурук умудар кутазвай, виниз тир дережадиз экъечIиз кIанзавай гьар са пешекарни хьанвай нетижайрал рази хьана акъвазун лазим туш. И ерияр муаллимриз иллаки хас я. Гьавиляй Р. Агьмедовади вичин чирвилерин дережа датIана хкажзава: алай вахтунда ада Дагъустандин педагогический университетдин урус чIалан пешедай магистратурада эхиримжи курсуна кIелзава.

Р. Агьмедовадихъ муаллимвилин кIвалахдани агалкьунар ава. Идан гьакъиндай адаз 2018-йисуз интерактивный технологияр ишлемишуналди кIелунин кIвалах вилик тухунай Дагъустандин образование вилик тухунин институтди диплом гуни шагьидвал ийизва. Мадни, Регина Агьмедова 2019-йисуз «Самый классный классный» республикадин конкурсдин муниципальный этапдин гъалибчи, райондин образованидин управленидин, школадин дирекциядин патай ганвай граммотайрин сагьиб я.

Багъманчи гьихьтинди ятIа, ада гьасилай емишриз килигна чир жеда, лугьузва бубайрин мисалда. Муаллимни гьакI я, адан «бегьерар» чирвилер гузвай аялар, абуру кIелуна, конкурсра къалурзавай агалкьунар я. Регина муаллимди чирвилер гузвай школьникрихъни олимпиадайра, конкурсра, фестивалра агалкьунар жезва. ИкI, Р. Агьмедовади чирвилер гузвай 10-классда кIелзавай Карина Алимурадовади ва Айдемир Шерифова 2020-йисан 19-декабрдиз «Дагестанский государственный технический университет» ФГБОУ-ди тухвай школьникрин олимпиададин финалдин турда, 100 балл къачуналди, «Русский язык» дисциплинадай 1-чкаяр кьуна.

Мадни, алатай йисуз 10-классда кIелзавай Лейла Бабаевади ва Айдемир Шерифова Вирироссиядин школьникрин олимпиадайрин муниципальный этапра «Русский язык» ва «Литература» дисциплинайрай приздин чкаяр, Карина Алимурадовади Вирироссиядин олимпиадайрин муниципальный ва республикадин этапра «Литература» дисциплинадай 1 ва 2-чкаяр кьуна.

Тежрибалу ва кIвалахда агалкьунар авай муаллим хьиз, Регина Агьмедова школада, хуьре хъсан общественницани я. ИкI, адакай 2015-йисуз Испикрин поселенидин администрациядин 4-созывдин Собранидин ва райондин Собранидин депутат хьана. Алай вахтунда Р. Агьмедова хуьруьн поселенидин Собранидин депутат я.

Райондин образованидин управленидин начальникдин заместитель Къачабег Аминова ва райондин урус чIаланни литературадин муаллимрин Ассоциациядин председатель Милейсат Межидовади чаз лагьайвал, Регина Рамазановна алай вахтунда районда урус чIалан ва литературадин виридалайни хъсан муаллимрикай сад я. Адан тежрибадикай, кIвалахда ишлемишзавай цIийи ва кIвенкIвечи къайдайрикай жегьил муаллимри менфят къачузва.

Р. Агьмедовадиз хуьруьнвийрин, школадин муаллимрин, кIелзавайбурун ва абурун диде-бубайрин патай лайихлу гьуьрметни ава.

Хазран Кьасумов

Шикилда: Р. Агьмедова.