Бажарагъдин бегьерар

Райондин виридалайни чIехи наградадиз О. Меликов, адал кхьенвайвал, «лезгийрин милли музыкадин искусство вилик тухуник еке пай кутунай, райондин культурадин ва общественный уьмуьрда активвилелди иштирак авунай ва 50 йис тамам хьунай» лайихлу хьана.

Бажарагълу манидар ва культработник яз Омар Меликов СтIал Сулейманан районда, адалай къецени гзафбуруз фадлай ва хъсандиз таниш я. И рекьерай адаз тIебиатди кьетIен пай, бажарагъ ганва. Амма ихьтин «ядигарар» виридаз кьисмет жезвач. Мисал яз, гьар нивай хьайитIани шиирар теснифиз, манияр лугьуз, суьретдал чан гъиз жедач. Ибур анжах чпихъ акьалтIай алакьунар авайбурун тIем акакьдай крар я. Ам, лежберди никIе цанвай къуьлуьн твар хьиз, фараш жезва ва, са кьадар вахт алатайла, ада бегьер гузва.

- Жув-жуваз чир хьайи вахтарилай зи сивел мани хьайиди я, — лугьузва О. Меликова. – Гьеле гъвечIи аял яз зун чIехи дидедини-бубади хкажна столдал акъвазардай ва зав манияр лугьуз тадай. «Зи хцикай артист-манидар жедайди я» — чIехи дидеди лугьуз хьайи гафар зи бейнидай къени акъатзавач.

Омар Меликов 1971-йисуз къадим Дербент шегьерда ГОВД-дин участковый яз кIвалахзавай винистIалви Асланан ва шегьердин гамарин фабрикада кIвалахзавай халичайрин устад Шаперидин хизанда дидедиз хьана. Хизанда 5 велед авай. Омара 9-класс Дербентда, 10-класс Вини СтIалрин юкьван школада акьалтIарна.

Манияр гадади гьеле школада кIелзавай йисарилай лугьузвай. 10-классда кIелзавайла Омар Меликова республикада машгьур «Беневша» ансамблда манияр лугьудайди – солист язни культурадин ва шадвилин мярекатра иштиракзавай.

Новочеркасск шегьерда политехнический институтда кIелзавай Омар армиядин жергейриз тухвана. Армиядилай гуьгъуьниз ада и институт акьалтIарна. 1991-йисуз ам Кьулан СтIалрин хуьруьн Культурадин кIвале кIвалахал акъвазна, гьа са вахтунда ада «Беневша» ВИА-дин кIвалахда иштиракунни давамна.

Жегьил пешекардин патай милли культурадиз, искусстводиз авай майилвал екеди тир. И рекьерай виликди камар къачун, «хъутIалар» муьтIуьгъарун патал махсус чирвилерни герек тир. И кар аннамишуналди, Омар Меликова Дербент шегьердин культурадин институтни кIелна (заочно) акьалтIарна.

Къвез-къвез, «Беневша» ансамблдин тIвар Дагъларин уьлкведа сейли ва машгьур хьана. Виниз тир устадвилиз ва алакьунриз килигна 2006-йисуз «Беневша» ВИА-диз «Халкьдин коллектив» ва Омар Меликоваз «Дагъустан Республикадин лайихлу артист» лагьай тIварар гана.

- За Омар Меликовахъ галаз санал яратмишунрин рекье кIвалахиз гзаф йисар я, — лугьузва ресубликада машгьур культработник ва конферансье Ярагьмед Ярагьмедова. – КIандатIа Кьасумхуьр ва я Дербент, Махачкъала ва я маса чка хьурай, концертдин нубатдин нумра малумардайла, Омар Меликован тIвар кьунмазди, тамашачияр кIвачел къарагъда, гурлу капар яда. Зун гзаф сеферра шагьид хьана хьи, Омар Меликов неинки лезгияр, гьакIни маса миллетдин векилар яшамиш жезвай шегьерра, районрани сейли я. Гьакъикъатдани, кьетIен устадвал, бажарагъ, гуьзел сес ава чи стхадихъ. Адал чна гьахълудаказ дамахзава.

Лагьана кIанда, Омар Меликоваз неинки чи республикада, гьакIни Ростовда, Ставрополда, Краснодарда, Москвада ва масанра гурлу капар яна.

О. Меликов Международный «Рехи Каспий», республикадин «Лезгистандин авазар», «Шалбуздагъдин авазар ва манияр» ва маса фестивалрин лауреат я.

«Махачкъаладин югъ», «Шарвилидин сувар», «СтIал Сулейманан Шииратдин йикъар», «Дербентдин къеледин йикъар» маса культурадинни шадвилин мярекатрани гьар йисуз Омар Меликова активвилелди иштиракзава.

Москвада тухузвай «Яран суварин» иштиракчи О. Меликовакай са шумуд йисуз хьана. Идалайни гъейри, уьлкведин меркезда яшамиш жезвай чи ватанэгьлийрин тIалабунриз килигна Омар Меликова «Беневша» ВИА-дихъ галаз санал сольный (текдиз сада мани лугьудай) 8 концерт гана.

- Етим Эминан, Забит Ризванован чIалариз Мегьамед Гьуьсейнова, Маина Абдулмуталибовади кхьенвай манияр тамамарун заз иллаки хуш я, — лугьузва О. Меликова. – Мадни, зи репертуарда Сажидинан, Майрудин Бабаханован ва алай аямдин маса шаиррин маниярни ава.

Бажарагълу манидар тир О. Меликова, гьа са вахтунда, вичини шиирар кхьизва, музыка теснифзава, абур вичи тамамарни ийизва. Абурун кьадарни 30-дав агакьзава.

2008-йисалай инихъ Омар Аслановича Сулейман-Стальский райондин культурадин отделдин начальникдин заместителвилин къуллугъни намуслудаказ кьилиз акъудзава.

- Омар Асланович чпиз Аллагьди, тIебиатди кьетIен пай, бажарагъ ганвай инсанрин жергедик акатзава, — лагьана чаз культурадин отделдин начальник, Дагъустандин халкьдин шаир Майрудин Бабаханова. – Ам хьиз халкьдин къуллугъда акъвазнавай, кIвалахзавай, милли культура, искусство вилик тухуник пай кутазвай инсанар гьар са хуьруьн, гьар са райондин дамах я. Омар Меликовакай рахадайла Инсан, Культработник, Манидар гафар чIехи гьарфарилай кхьиниз лайихлу я.

Жуваз фадлай ва мукьувай хъсандиз таниш, чизвай кас яз, О. Меликовакай макъала кхьидай фикир заз виликдайни авай. Амма вичи разивал гузвачир, «закай вуч кхьида кьван» — тикрардай ада гьар сеферда.

«Яраб Омар Аслановичан кIвалин, хизандин къайгъуяр сифте чкадал алатIа, я тахьайтIа, — культуработниквилин, манидарвилин» лагьана фикир-фагьумни ийизвай за. Вучиз лагьайтIа, чаз ам гьамиша кIвалахдин къайгъуйра, культурадинни шадвилин мярекатра иштиракиз аквазва.

Чи къенин гуьруьшдин вахтунда жуваз секинвал тагузвай суал за Омар Меликован вилик эцигна.

- Валлагь, им гуьзлемиш тавур суал хьана, журналистар я ман, рикIе авайди чуьнуьх тежедай, — хъуьрена Омар Асланович. – Дуьз лагьайтIа, кIвалелай зун кIвалахал, мярекатрани межлисра гзаф жезва… Ваъ, ви суалдиз завай атIай жаваб гуз жедач. Гьам кIвалин, гьам кIвалахдин къайгъуяр гьа са чкадал эцигин. Зи фикирдалди, гьакI дуьз жеда.

Уьмуьрдин 50-гатфар мубарак авуналди, чаз Омар Меликовахъ мягькем сагъламвал, хизандин бахтлувал, яратмишунрин ва искусстводин рекье мадни еке агалкьунар хьана кIанзава.

Хазран Кьасумов, РФ-дин журналистрин Союздин член