Медалдиз лайихлу хьана

Абурун хъсан адетар, тежриба давамаруналди, и хизандай тир лезги чIалан ва литературадин муаллим Шамсудин Магьамдарова, пешедал рикI хьуналди, вичин тIвар неинки чи районда, республикада, гьакIни чи чIехи уьлкведани машгьурна.

ДР-дин лайихлу муаллим, РФ-дин умуми образованидин гьуьрметлу работник, ДР-дин образованидин отличник тир адакай гьакIни «Милли чIалан лап хъсан муаллим -2013» Вирироссиядин конкурсдин гъалибчини хьанай.

И йикъара чав мад са шад хабар агакьна. 26-28-февралдиз дидед чIала-рин Международный йикъаз талукьарна, са жерге маса тешкилатрин куьмекни галаз, Москвада кардик квай хайи чIаларин муаллимрин ассоциацияди кьиле тухвай форумда чи баркаллу районэгьли, дидед чIалан муаллим Шамсудин Магьамдаровани иштиракна ва ада Россиядин общественный палатада кьиле фейи семинардани «элкъвей столда» иштиракна, анрал «Потенциал культуры в популяризации родного языка», «По реализации концепции преподавания родных языков народов РФ» темайрай докладар авуна.

И форумдал модератордин везифани адан хиве тунвай. Гзаф йисара дидед чIал раиж ийиз, хуьз, вилик тухуз ва гьамиша чIалаз талукь мярекатра активвилелди иштирак авунай ам сертификатдиз ва «За вклад в сохранении и развитии родного языка, в том числе русского языка» медалдиз лайихлу хьана. Им адан гзаф йисарин намуслу зегьметдиз ганвай чIехи ва лайихлу къимет я.

Чна Шамсудин муаллимдиз ва адахъ галаз санал кIвалазавай педколлективдизни медаль рикIин сидкьидай мубаракзава.

Гьазурайди – Куьре Абид