Райондин Информагентстводин гьахъ-гьисабдихъ яб акална

И месэладай анал куьруь информация гваз райондин Информагентстводин руководитель Гьуьсейнов Агьмед, «Куьредин хабарар» газетдин кьилин редактор Мирзалиева Асият, «Кьасумхуьруьн телевидение» муниципальный телеканалдин ва райондин сайтдин кьилин редакторар тир Эльвира Небиева ва Закир Бидирханов рахана.

Абуру къейд авурвал, Информагентстводин кIвалахдин асул хилер агьалияр чкадин чпи-чеб идара ийизвай органри тухузвай кIвалахдин гьакъиндай хабардар авун, райондин администрация ва адан къурулушдин подразделенияр информациядалди таъминарун тешкилун я. Медиаконтент асул гьисабдалди чкадин ва региондин аудитория патал тайинарнавайди я.

Гьахъ-гьисабдин девирда 1450 экземплярдин кьадарда аваз газетдин 53 нумра чапдай акъудна. Редакциядин патав «Кюре-онлайн» сетевой изданини кардик ква. Газетди гьар гьафтеда райондин уьмуьрдин вири терефрикай кIелзавайбур хабардар ийизва.

Муниципальный телеканалди передачаяр лезги чIалалди кьиле тухузва ва адаз Кьиблепатан Дагъустандин гзаф районрани килигиз жезва. Телевидениди вичи гьазурзавай передачаяр ва репортажар гузва, «ачух столар», жуьреба-жуьре конкурсар, презентацияр, флешмобар ва акцияр кьиле тухузва. Передачаяр, гьяд югъ квачиз амай йикъара, йикъа кьведра гузва. Телевиденидин чкадин журналистри йиса са агъзурдалай гзаф передачаяр гузва. Кьасумхуьруьн телевиденидихъ неинки са Россияда, гьакIни къецепатан уьлквейрани 12 агъзурдалай виниз подписчикар ава.

Гьахъ-гьисабдин девирда телевиденидин материально-технический база цIийи хъувуна: цIийи оргтехника ва мебель къачуна.

Муниципалитетдин инфор мациядин медиасергьятда ра йондин сайтди кьетIен чка кьунва. Анал алава информацияр гваз Информагентстводин корреспондентарни рахана. Абуру аппаратураяр ва программаяр цIийи хъувунин, газетдин редакциядин ва телевиденидин дараматра ремонтрин кIвалахар кьиле тухунин чарасузвални къейдна.

Гуьгъуьнлай анал рахай Информагентстводин кIвалахдал гуьзчивал тухузвайди тир райадминистрациядин Кьилин 1-заместитель Лацис Оруджева, санлай райондин СМИ-дин хъсан кIвалах къейд авунихъ галаз санал, кIвалахда авай са бязи кимивилерални фикир желбна, теклифар гана.

Райондин Информагентстводин кIвалахдикай анал вичин фикирар ва меслятар гваз «Дагъустан» РГВК-дай «Вахтар ва инсанар» передача тухузвайди тир, Дагъустандин писателрин Союздин лезги секциядин председатель, шаир Владик Батмановни рахана.

Эхирдай анал рахай райондин Кьил Нариман Абдулмуталибова райондин Информагентстводин коллективди гьахъ-гьисабдин 2020-йисуз тухвай кIвалахдиз санлай кьурла рази жедай къимет ганатIани, авай кимивилер хцидаказ критика авуна, кIвалах хъсанарунихъ рекье тунвай меслятар къалурна, теклифар гана, и важиблу кIвалахда гьар садаз вичин жавабдарвал хкажуниз эвер гана.

Гьазурайди – А. Камилов