Меню
6+

Сетевое издание «Кюре»

12.03.2021 11:33 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Тебрикарни пишкешар – играмибуруз

Кьакьан ва такабурлу дагъларай кьил къачуна гьуьлуьхъди еримишзавай гурлу вацIу хьиз, вахтунини виликди еримишда. Им тIебиатдин къанун я.

Вахтунихъни вичиз хас кьетIенвилер ава, йикъари гьафтеяр, гьафтейри варцар эвез ийида. Идахъ галаз алакъалу яз кьуьд акъатна, вирида гуьзетзавай гатфар алукьна. Гатфарин сифте варз тир мартдин вацра виридалайни гуьзелбурукай сад тир сувар – Виридуьньядин дишегьлийрин югъни къейд ийизва. Идахъни кьетIенвал ава: гатфарин сифте сувар инсаниятдин гуьзел пай тир дишегьлийриз бахшнава. РикIел Дагъустандин халкьдин шаир Арбен Къардашан «Дишегьлияр» шиирдин цIарар къвезва:

… Дишегьлида тарих ава, вахт ава,

Дишегьлида Диде, Паб, Свас, Вах ава.

Дишегьлидай ваз ви девир аквада,

Виридалай багьа ивир гакьада…

Дишегьлийрин йикъаз талукьарна 5-мартдиз Кьасумхуьрел, И. Тагьирован тIварунихъ галай Россиядин халкьарин адетдин культурадин центрада чIехи ва шадвилин мярекат кьиле тухвана. Лагьана кIанда, аниз къвезвай дишегьлияр Культурадин дворецдин гегьенш гьаятда районда кардик квай волонтеррин гьерекатдин членри цуькверин кугчIар вугуналди ва гьевескарри далдамдихъ галаз зуьрнейрай тамамарзавай лезги халкьдин авазралди къаршиламишна. Са арадилай тамашачийрин чIехи зал яргъал йисара районда жавабдар къуллугърал ва производствода гьакъисагъвилелди кIвалах авур зегьметдин ветеранрив, гзаф аялар авай дидейрив, районда образованидин, здравоохраненидин, культурадин, экономикадин, социальный ва маса хилера кIвалахзавай дишегьлийрив ацIана. Виридав цуьквер гва, чина милли хъвер ава. КьатIуз жезва: чи играмибурун сувар я!

Йикъан сятдин 11 тамам хьана. Дишегьлийрин йикъаз талукьарнавай шадвилин мярекат ачухунин сифте гаф «Сулейман-Стальский район» муниципальный райондин Кьил Нариман Шамсудинович Абдулмуталибов рахана.

- Азиз тир ва играми дишегьлияр – чи дидеяр, вахар, рушар, — лагьана Н. Ш. Абдулмуталибова. – Гатфарин чархачи ва чи виридалайни гуьзел суваррикай сад тир къенин сувар за квез райондин депутатрин Собранидин, администрациядин ва кьилди жуван патай рикIин сидкьидай мубаракзава. Заз квехъ гьар садахъ мягькем сагъламвал, вири хъсан крар хьана кIанзава. Чи играми дишегьлияр абуруз лайихлу я.

Райондин Кьил Нариман Абдулмуталибова вичин куьруь, гьа са вахтунда маналу рахунра дишегьлийри вири йисара районда социальный, экономикадин, здравоохраненидин, образованидин, культурадин ва маса хилер вилик тухуник еке пай кутурди ва и кар давамарзавайди къейдна, идай абуруз чухсагъул лагьана.

Райондин Кьилин тебрикриз ва алхишдин гафариз къуват гун яз райондин Культурадин дворецдин патав гвай фольклордин «Кюре» ансамблди «Лезгинка» кьуьл авуна ва итимрин 7 касдикай ибарат тир хордин коллективди «Иранда савдадавай яр» мани тамамарна.

Гьихьтин сувар, шад мярекат хьурай пишкешар галачир. Тебрикар, алхишар, жанлу цуьквер хьиз, дишегьлийрин сувариз пишкешар иллаки хас я.

Райондин Кьил Нариман Абдулмуталибова зегьметдин ветеранар тир ва чпи жуьреба-жуьре хилера бегьерлувилелди кIвалахзавай дишегьлийрив наградаяр вахкана. ИкI, сифтедай суварин къайдада безетмишнавай сегьнедиз Россиядин Игит Радим Халикьован диде Ханпери Халикьовадиз теклифна, адав Н. Ш. Абдулмуталибова «Сулейман-Стальский райондин вилик лайихлувилерай» гьуьрметдин знак вахкана.

Райондин Кьили гьакIни райондин Гьуьрметдин грамота УСЗН-дин пешекар Зульфия Агъарагьимовадив, Испикрин СОШ-дин муаллим Регина Агьмедовадив, манидар Селимат Гьажиевадив ва райондин поликлиникадин духтур-эндокринолог Анжела Мейлановадив, Чухсагъулдин чарар райондин аялрин библиотекадин заведующий Чрахалум Абдулгьафисовадив, поликлиникадин медсестра Секинат Мурсаловадив, пенсионный фондунин управленидин пешекар-эксперт Рена Саругълановадив, ЦIийи поселокдин СОШ-дин муаллим Марина Ягъибековадив, ДР-дин культурадин министерстводин Гьуьрметдин грамота Эминхуьруьн библиотекадин заведующий Алла Буржалиевадив вахкана.

Наградаяр вахкайдалай гуьгъуьниз райондин Культурадин дворецдин, аялрин яратмишунрин кIвалин, музыкальный школадин ва Агъа-СтIал Къазмайрин «Чубарук» аялрин бахчадин гьевескаррини бицIекри суварин концертдин чIехи программа къалурна. Программа бажарагълу кульработник, республикада машгьур конферансье Ярагьмед Ярагьмедова устадвилелди кьиле тухвана.

Районда тухузвай шадвилеринни культурадин мярекатрин активный иштиракчи тир «Чубарук» аялрин бахчадин бицIекрин хореографиядин десте залда ацукьнавайбуру гурлу капар ягъуналди къаршиламишна. Цуьквер хьтин бицIекри милли парталар алаз «Диде» мани лагьана ва «Лезгинка» кьуьл тамамарна.

ЦIийи поселокдин юкьван школадин 7-классдин ученица Алеся Мегьамедовади лагьай «Гьайиф зи диде кьуьзуь жез» мани, райондин музыкальный школадин рушарин дестеди къалурай «Къарияр» сегьне, аялрин яратмишунрин кIвале вердишвилер къачузвай гададини руша авур «Лезгинка» кьуьлни тамашачийриз гзаф бегенмиш хьана.

Районда образованидин хиле кIва-лахзавай дишегьлийриз и гуьзел сувар мубарак авун яз, алхишдин келимаяр райондин образованидин управленидин начальник Гьуьсейн Шихбабаева лагьана.

Адан гафариз къуват гун яз Культурадин кIвалин художественный самодеятельностдин солистка Селимат Гьажиевади «Беневша» мани лагьана.

Испикрин хуьруьн Культурадин кIвалин художественный руководитель Перихалум Къазанбековади, аял ксурзавай кьепIинин кьилихъ ацукьна, ам эчIягъиз-эчIягъиз лайлаяр тамамарна. И сегьне залда ацукьнавайбуру гурлу капар ягъуналди къаршиламишна.

Культурадин хиле кIвалахзавай ва мярекатда иштиракзавай вири дишегьлийриз кьетIен сувар тебрикиз экъечIай культурадин отделдин начальник, Дагъустандин халкьдин шаир Майрудин Бабаханова вич мад сеферда чIалан зурба устад, итижлу мисалар, маракьлу делилар (гьабурукай яз дишегьлийрикай) чидай зари яз къалурна.

«Ни вуч лагьайтIани, дишегьлийри чпин уьмуьрда ахъайзавайди са гъалатI я: абуру итимар хазва» — лагьай Майрудин Бабаханован «залдик юзун кутур» рахунрилай гуьгъуьниз Ярагьмед Ярагьмедова «За къизилгуьл низ гуда?», музыкальный школадин дестеди «Дидедин суьрет», Аслан Ферзилаева «Лезги руш», Расул Абдулкебирова «Назлу Дуьлбер», Азим Ризаева «Багъманчидин руш», Зугьраб Мегьамедова «Дидейриз» ва Дагъустандин лайихлу артист Омар Меликова «Зи муьгьуьббат дерин я» манияр лагьана, Виридуьньядин дишегьлийрин йикъан суварин мярекат мадни гурлу авуна.

Коронавирусдин вилик пад кьунихъ галаз алакъалу яз Роспотребнадзордин истемишунрал амал авуна кьиле фейи дишегьлийрин йикъан суварин мярекат райондин культурадин уьмуьрда кьетIен ва лишанлу вакъиадиз элкъвенва.

Текст кхьейди ва шикилар ягъайди Хазран Кьасумов я.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

14