Меню
6+

Сетевое издание «Кюре»

18.03.2021 10:09 Четверг
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Межведомственный комиссиядин заседанидал

Райондин Кьил Нариман Абдулмуталибован регьбервилик кваз алай йисуз сад лагьайди тир межведомственный комиссиядин заседание кьиле фена.

Хуьрерин поселенийрин администрацийрин кьилерихъ галаз ВКС-дин къайдада алакъалу хьана.

Заседанидал 2020-йисуз муниципальный райондин консолидированный бюджетдиз хсуси къазанжияр атунин, гьакIни автомашинра бензин ва я газ цадай станцийри (АЗС-ри), машинар чуьхуьдай чкайри (автомойки) ва эцигунрин материалар маса гудай базайри (строительные базы) законлудаказ кIвалах авунин месэлайриз килигна.

Заседанидал алай месэлайрай райадминистрациядин экономикадин отделдин начальник Саният Вагьабовади гегьенш доклад авуна. Ада лагьайвал, гьахъ-гьисабдин девирда планламишнавай 155 296,9 агъзур манатдин чкадал, муниципальный райондин консолидированный бюджетдиз 165 476,1 агъзур манат хсуси къазанжияр атана, ида 106,6 процент тешкилзава.

АПК-дин хиле инвестицийрин цIийи проектар уьмуьрдиз кечирмишуни ЕСХН планда къалурнавайдалай 2 сеферда артух кIватIна.

«Газпром газораспределение Дагестан» ООО-ди газдин сетар арендада къачунай икьрардихъ галаз алакъалу яз, 2020-йисуз аламай буржарни кваз, райондин бюджетдиз саки 12 миллион манат пул гун лазим я. Амма арендаторди пул ганвач. И месэладал суддин приставар машгъул я, бязи материалриз суддин къайдада килигзава.

Заседанидин сергьятра аваз законсуздаказ зегьмет чIугвазвайбур законди ихтияр ганвай гьалдиз гъунин месэладизни килигна. Саният Вагьабовади къейд авурвал, и девирда, план 455 яз, зегьметдин 845 икьрар кутIунна, идакай 43 процент хуьруьн майишатдин карханайрал ва 22 процент гъвечIи карчивилин субъектрал ацалтзава.

2020-йисуз алай буржар агъузарунай Дагъустандин муниципалитетрин арада Сулейман-Стальский районди 1-чка кьуна.

Заседанидал йисан планар тамамарай хуьрерин поселенийрин администрациярни къейдна: чилерин налограй – «сельсовет «Алкадарский», арендадин къазанжийрай – «сельсовет «Цмурский». Алай буржар агъузарай ва алудай Хпуькьрин, Кьулан СтIалрин, Алкьвадрин, Курхуьруьн ва Цмуррин хуьрерин поселенийрин администрацийрин тIварарни кьуна. Вири АСП-ри 100 процентдилай виниз хсуси налогар кIватIнава.

Саният Вагьабова гуьгъуьнлай автозаправкайрин, автомойкайрин ва эцигунрин материалрин базайрин кIвалахрал гегьеншдиз акъвазна. Ада лагьайвал, райондин территориядал 13 АЗС ала ва 1 АЗС эцигзава. Абурухъ виридахъ чилин участок хсусиятда авайвилин регистрациядин шагьадатнамаяр ава. Санлай-саниз юзуриз тежедай объект регистрация авунвайвилин шагьадатнама авайди 9 АЗС я. Са автозаправка алай чилин участок тайин рекьериз ишлемишзавач.

Райондин территориядал 19 автомойка ала, абурукай 17-да кIвалахзава. Амма гзаф автомойкаяр налогрин учетда эцигнавач.

Районда эцигунрин материалрин 10 базани кардик ква. Абурукай ИП ва я ООО яз 9 база налогрин учетда эцигнава.

Заседанидал алай месэлайрай чпин фикирар ва теклифар гваз ФНС-дин ДР-да авай 2-нумрадин МРИ-дин начальникдин везифаяр вахтуналди тамамарзавай Къурбан Яхьяев, Сулейман-Стальский, Агъул, Кьурагь ва Хив районра ОСП-дин руководитель Гьажиомар Булханов, райадминистрациядин АС-дин ва ЖКХ-дин отделдин начальник Виталий Алисенов, УМиЗ-дин начальник Назир Гьасанов, правовой отделдин начальникдин заместитель Хейрулагь Сефералиев, Кьасумхуьруьн АСП-дин кьилин заместитель Фазил Мамедяров, Агъа-СтIалрин АСП-дин кьил Низами Абдурагьманов ва маса юлдашар рахана.

Райадминистрациядин Кьилин заместитель Саид Темирханова налогар кIватIунин жигьетдай межведомственный комиссияди ва АСП-ри кIвалах хъсанарунин, АЗС-рин, автомойкайрин ва эцигунрин материалрин базайрин кIвалах законди истемишзавайвал тешкилунин рекьерай меслятар гана, теклифар гъана.

Межведомственный комиссиядин заседанидин нетижаяр райондин Кьил Нариман Абдулмуталибова кьуна.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6