Лезги чIалай олимпиада

КIелунинни илимдин и мярекат республикада милли чIалал акъатзавай общественно-политический «Лезги газетдин» редакцияди ва Сулейман-Стальский райондин администрациядин куьмекни галаз мергьеметлувилин «Леки» фондуни тешкилнавайди тир.

Лезги чIалан олимпиадада Сулейман-Стальский, Мегьарамдхуьруьн, Кьурагь, Ахцегь, Докъузпара, Хив ва Дербент районрай, Дербент ва Дагъустандин Огни шегьеррай тир 11-классра кIелзавай (гьар школадай са касди) 52 касди иштиракна. Абуру лезги чIалай ва литературадай тестовой тапшуругъар ва тестовой диктант кхьена.

Мярекатдин иштиракчияр Сулейман-Стальский райондин Кьил Нариман Абдулмуталибова тебрикна, дидед чIал хуьн ва вилик тухун патал районда тешкилзавай мярекатрикай ва кIвалахрикай лагьана.

Лагьана кIанда, школьник ри тапшуругъар кхьидайла республикада машгьур алим ва публицист Мариф Къадимова олимпиадада иштиракзавайбуруз лезги чIалан ва литературадин тарсар гузвай муаллимрихъ галаз «Халис инсан хьухь!» мярекат (ачух тарс) тухвана.

Гуьгъуьнлай школадин актовый залда олимпиададин гъалибчийрив ва призеррив мярекатдин тешкилатчийрин патай пулдин призар ва пишкешар вахкунин мярекат кьиле фена. Абур «Лезги газетдин» кьилин редактор Мегьамед Ибрагьимова ва «Леки» фондунин векил Руслан Мехдиханова вахкана.

Олимпиададин нетижайрай 1-чка Сулейман-Стальский райондин ЦIийи Макьарин СОШ-дин ученица Элина Рамазановади, 2-чка Мегьарамдхуьруьн райондин Филерин СОШ-дин ученица Пилижат Мисрихановади, 3-чка

Сулейман-Стальский райондин Агъа-СтIалрин Къазмайрин СОШ-дин ученик Ислам Фатахова, 4-чкаяр Кьурагь райондин Гелхенрин СОШ-дин ученица Гуьзель Рамазановади ва Сулейман-Стальский райондин Герейханован 2-нумрадин СОШ-дин ученица Алина Рагьмановади, 5-чка Хив райондин ЗахитIрин СОШ-дин ученица Нуржагьан Магьмудовади кьуна.

Мярекатдин тешкилатчийри приздин чкаяр кьур 5 кIелзавайдаз пулдин призар гана: 1-чка 15000, 2-чка 10000, 3-чка 8000, 4 ва 5-чкаяр, талукь тирвал 5000 ва 4000 манат.

Пулдин призрилай гъейри, гъалибчийриз «Лезги газетдин» редакцияди ва мергьеметлувилин «Леки» фондуни дипломар, пишкешар, ктабар гана.

Дипломар ва 2000 манатадин кьадарда аваз пулдин призар олимпиададин гъалибчи ва призерар гьазурай муаллимризни гана.

Шадвилин мярекатдал рахай филологиядин илимрин доктор, шаир Фейзудин Нагъиева, филологиядин илимрин кандидат, писатель Абил Межидова, мергьеметлувилин «Леки» фондунин векилар тир Руслан Мехдиханова, Раиса Жалиловади, «Лезги газетдин» кьилин редактор Мегьамед Ибрагьимова, Махачкъалада кардик квай «КИМ» общественный тешкилатдин регьбер Имран Гьуьсейнова, Сулейман-Стальский райондин образованидин управленидин начальник Гьуьсейн Шихбабаева, Эминхуьруьн СОШ-дин директор Рагьман Османова ва маса юлдашри олимпиададин призерриз агалкьунар мубаракна, абурухъ гележегда мадни еке агалкьунар хьана кIанзавайди лагьана.

Районрин уртах олимпиада Эминхуьруьн СОШ-дин художественный самодеятельностдин иштиракчийри концертдин чIехи программа къалуруналди ва мугьманар къунагъламишуналди акьалтIарна.

Текст кхьейди ва шкил ягъайди Хазран Кьасумов