Яран суварин шадвилер

Ам райондин Кьил Нариман Абдулмуталибова, райондин депутатрин Собранидин председатель Штибег Мегьамедханова ва райадминистрациядин Кьилин заместителри кIарасрин харадик цIай куькIуьрунилай башламиш хьана.

Райондин Кьил Нариман Абдулмуталибова райондин агьалийриз Яран сувар райондин Собранидин депутатрин, райадминистрациядин ва кьилди вичин патай мубаракна, суварин тарихдикай суьгьбетна.

- Гьуьрметлу райондин агьалияр! – лагьана Н. Абдулмуталибова. – Чна нубатдин сеферда халкьдин милли сувар къейдзава. И сувар лезгийрин руьгьдин, ахлакьдин сувар я. Яран сувар – им хуьруьн майишатдин кIвалахрив эгечIдай вахтни я. Къуй Яран сувари гьар са хизандиз, гьар са касдиз анжах къени, хъсан крар гурай!

Районда Яран суварин юкъуз тафаватлувал къалурзавай инсанриз, спортсменриз, школьникриз пишкешар гудай хъсан адетни ава. ИкI, 70 йис тамам хьунихъ галаз алакъалу яз РФ-дин журналистрин ва ДР-дин писателрин союзрин член, ДР-дин культурадин лайихлу работник Абидин Камиловаз райондин Кьилин тIвар кхьенвай сят ва и вакъиадихъ галаз алакъалу яз чапдай акъуднавай адан «Хкягъай эсерар» ктабни гана.

Н. Абдулмуталибова са жерге муаллимривни лайихлу наградаяр вахкана. ИкI, намуслу ва бегьерлу зегьметдай «Россиядин Федерациядин тербиядин ва илимдин гьуьрметлу работник» знакриз Цмуррин юкьван школадин дидед чIалан ва литературадин муаллим Сефербег Мегьамедов, ЦIийи Макьарин юкьван школадин географиядин муаллим Эльвира Къехлерова, Агъа-СтIал Къазмайрин юкьван школадин сифтегьан классрин муаллим Извина Абдуллаева, Эминхуьруьн юкьван школадин сифтегьан классрин муаллим Ифрансат Мурадагъаева, Агъа-СтIал Къазмайрин юкьван школадин урус чIалан ва литературадин муаллим Заинат Исмаилова, ЦIийи поселокдин, Кьасумхуьруьн 1-нумрадин ва Вини СтIалрин юкьван школайрин сифтегьан классрин муаллимар тир Рагьимат Маллабаева, Гуьлзада Меликова ва Эльвира Султанагьмедова лайихлу хьана.

«ИМЦ» МКУ-дин методист Марина Межидовадив ва Курхуьруьн 2-нумрадин юкьван школадин тарихдин муаллим Лейла Уружбековадив райондин Кьили Россиядин просвещенидин Гьуьрметдин грамотаяр вахкана.

Мергьеметлувилин Имам Яралиеван «Умуд» фондунин векил Савин Велиева ЦIийи поселокдин юкьван школадин 9-классдин ученик, республикадин ва VI-Международный Кавказдин математикадин олимпиададин призер Шамил Тагьировав, республикадин олимпиадайрин призерар тир Карина Алимурадовадив, Севиля Шихкеримовадив, Мирзе Набиевав, «Голос-Дети»-Кюринские соловьи-2021» конкурсда гъалиб хьайи Пержанхалум Агъамирзоевадив ва Арина Султановадив, гьакIни гираяр хкажунай Россиядин кIвенкIвечивал патал тухвай акъажунра приздин чка кьур Герейханован 2-нумрадин юкьван школадин командадив сертификатар ва пулдин премияр вахкана.

Яран Суварин мярекатдал райондин Культурадин дворецдин артистри, яратмишунрин ва фольклордин коллективри, аялрин музыкальный школадин ва аялрин яратмишунрин КIвале тербия къачузвайбуру манияр лагьана, кьуьлер авуна ва сегьнеяр къалурна.

Лагьана кIанда, Яран суварин сергьятра аваз цIил ялунай, гира яргъаз гадарунай, алай чкадилай яргъаз хкадарунай акъажунар кьиле фена. Гираяр хкажунай 1-нумрадин ДЮСШ-дин векилар тир Мурад Мегьамедрасуловаз суварин кьилин приз — чан алай гьер гана ва гира яргъаз гадарунай Мурсал Мегьтиханов гъалиб хьана.

Спортдин акъажунра приздин чкаяр 2-нумрадин ДЮСШ-дин, КIахцугърин хуьруьн комадайри, Рустамзал Мегьамедмирзоева (Агъа СтIал), Шайда Агъамирзоева ва Эльяр Къурбанисмаилова (Курхуьр) кьуна.

Райондин спортдин, туризмдин ва жегьилрин крарай Комитетдин директор Надыр Эфендиева спортсменрив пишкешар ва пулдин призар шад гьалара вахкана.

***

Уллу-Гъетягъар — машгьур алимрин, генералрин, чIехи дережайрин руководителрин макан. И хуьре чи бубайрилай атанвай хъсан адетарни хуьзва, абур жегьил несилдал агакьарзава. Мукьвал йикъара чун и кардихъ мад сеферда инанмиш хъхьана: хуьре лезгийрин милли сувар — Яран суварни багьа мугьманрин, махлукьатдин активный иштираквал аваз кьиле тухвана. И кар тестикьарун яз заз хуьре Яран суварик иштиракай чи республикадин эстрададин «гъетерин» тIварар кьун бес яз аквазва: Дагъустандин филармониядин концертдин отделенидин директор София Разуева, филармониядин солистар тир Пьер Айджо, Хадижат Ибрагьимова, Дагъустан Республикадин лайихлу артистка Диляра Надырова, машгьур «Восток» ВИА-дин солист Бирембег

Гьуьсейханов ва масабур. Абуру мярекатдал къадим хуьруькай, хуьряй акъатай машгьур ксарикай, инин тIебиатдин гуьзелвиликай хуш келимаяр лагьана, гьелбетда, устадвилелди маниярни тамамарна.

Багьа мугьманрилай гъейри, Яран суварин шад мярекатдал тебрикдин келимаяр гваз хуьруьн поселенидин администрациядин кьил Хабиб Гьуьсенбеков, муниципальный къуллугъдин лайихлу работник Зуьгьре Агъарзаева рахана.

Чна винидихъ тIвар кьур ДР-дин лайихлу артистка Диляра Надыровади лагьайвал, Махачкъаладай атанвай багьа мугьманриз хуьре тухвай Яран сувар, гьевескарри ва школьникри лагьай манияр, къалурай сегьнеяр, иллаки кайванийри гьа суварин майдандал гьазурай милли хуьрекар гзаф бегенмиш хьана.

***

Са рахунни алачиз, Яран суварин мярекатар районда хъсан тешкиллувал аваз ва гурлудаказ кьиле фена.

Яран суварин шадвилер, гьар жуьредин мярекатар саки вири хуьрера, образованидин ва культурадин идарайрани кьиле фена. ИкI, школайра ва аялрин бахчайра, алава чирвилер гудай образованидин идарайра «Яран сувар» акция, «Аялрин сес», «Суварин милли хуьрекар» конкурсар кьиле тухвана, школайра кIелзавайбуру, аялрин бахчайра тербия къачузвай бицIекри концертар гана.

***

Испикрин хуьре кьиле тухвай Яран суварин мярекат гурлудаказ кьиле фена. Ана хуьруьнвийри активвилелди иштиракна.

Суварин иштиракчийрин вилик тебрикдин келимаяр гваз Испикрин хуьруьн поселенидин администрациядин кьил Руслан Магьмудов, КДЦ-дин директор Перихалум Къазанбекова, педагогвилин зегьметдин ветеран Фикрет Агьмедов рахана.

Суварин сергьятра аваз спортдин милли жуьрейрай акъажунар тешкилна, гьа чкадал милли хуьрекар гьазурна, абур хуьруьнвийри дадмишна.

***

Экенрин хуьруьн библиотекада тухвай Яран суварин мярекатдал милли суварин тарихдикай анин заведующий Изабелла Къафаровади метлеблу рахунар авуна.

Яран суварин шадвилер маса хуьрерани хъсан тешкиллувал аваз кьиле фена.

Хазран Кьасумов