Меню
6+

Сетевое издание «Кюре»

09.03.2021 09:50 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

АЗС-рин кIвалах ва милли проекта

Дагъустан Республикадин Кьилин везифаяр вахтуналди тамамарзавай Сергей Меликова тухвай Хатасузвилин Советдин Координационный заседанидин нетижайрай Сулейман-Стальский райондин Кьил Нариман Абдулмуталибова совещание тухвана

Анал АЗС-рин кIвалахда къайдайрал амал авунин ва милли проектра иштирак авунин жигьетдай Сергей Меликова вилик эцигнавай месэлаяр веревирдна. Совещание ачухуналди, Нариман Абдулмуталибова и месэлайрин важиблувал къейдна.

- Къе чна веревирдзавай месэлайриз республикадин руководстводин дережада килигзава, — лагьана Н. Абдулмуталибова. – Чна, чи патай яз, жавабдарвал гьисс авун, чпелай неинки законлувал хуьн, гьакIни райондин социально-экономический дурумлувал аслу жезвай месэлаяр гьялун патал тайин серенжемар кьабулун лазим я.

Районда кардик квай АСЗ-ри ва автомашинар чуьхуьзвай чкайрин кIвалахрин месэлайрай УМИЗ-дин директор Назир Гьасанов, архитектурадинни эцигунрин ва ЖКХ-дин отделдин начальник Виталий Алисенов рахана. Абуру къейд авурвал, алатай йисуз АЗС-рин ва автомашинар чуьхуьзвай чкайрин жигьетдай 4 объектдал муниципальный чилерин гуьзчивал ахтармишна, гъиле авай кварталда ихьтин 7 ахтармишун тухун пландик кутунва. Са бязи АЗС-рихъ ва машинар чуьхуьзвай чкайрихъ ( я чилин, я объектрин) ихтияр тайинардай документар авач. Бязи вахтара объект эцигнавай чилин участокар маса метлебар патал тайинарнавайбур жезва. Нетижада гьа чкайри экологиядин ва санитариядинни эпидемиологиядин истемишунриз жаваб гудай мумкинвилерал амал ийиз жезвач. Автозаправкайрин станцийрин ва автомашинар чуьхуьзвай чкайрин кIвалахда дуьздал акъудай кимивилерин патахъай талукь тир актар гьазурнава. Абуру, асул гьисабдай, таъкимарзава, кIвалахар хъсанарун меслятзава. Къалурнавай вахтара объектар законламиш тавуртIа, материалар суддиз вугуда.

Совещанидал килигзавай объектар налогрин учетда эцигунин ва и хилера чинебан къайдада (нелегально) кIвалахзавайбур тайинарунин месэладай экономикадин отделдин начальник Саният Вагьабова рахана.

И месэлайрай совещанидал райадминистрациядин Кьилин заместитель Саид Темирхановани алава рахунар авуна.

Райадминистрациядин правовой отделдин начальник Мегьамед Исмаилова АЗС-рин ва автомашинар чуьхуьзвай объектрин ихтиярриз талукь тир (правовой) къимет гана.

Райадминистрациядин Кьилин 1-заместитель Лацис Оруджева лагьайвал, чпин территорийрал АЗС-ар ва автомашинар чуьхуьдай чкаяр алай хуьрерин поселенийрин администрацийрин кьилери абурун кIвалахдал бес кьадар гуьзчивал тухузвач, и хилера къайда тун патал абуру талукь къуллугъар хабардарзавач.

Райондин Кьил Нариман Абдулмуталибова ГСМ-рихъ галаз алакъалу хиле къайда тун, регистрация тавуна кIвалахзавайбур тайинарун ва учетда эцигун патал кар вахтунда тухудай серенжемар кьабулун лазим тирди лагьана ва са варзни зуран къене вири месэлаяр ахтармишна, и хиле къайда тунин тапшуругъ гана.

- Са АЗС-ри законрихъ галаз кьазвай, муькуьбуру кьан тийизвай къайдада кIвалах авун дуьз туш, — лагьана райондин Кьили. – Гьавиляй Ростехнадзордихъ, Роспотребнадзордихъ, МЧС-дихъ, ОМВД-дихъ, ФНС-дихъ ва талукь маса къуллугърихъ галаз санал Межведомственный комиссияди автозаправкайрин ва машинар чуьхуьзвай чкайрин кIвалахдин гьакъиндай са вацран къене делилар кIватIун ва чирун лазим я.

Гуьгъуьнлай райондин Кьил Нариман Абдулмуталибов милли проектар уьмуьрдиз кечирмишунин жигьетдай Дагъустан Республикадин Кьилин везифаяр вахтуналди тамамарзавай Сергей Меликова гайи тапшуругърал ва меслятрал акъвазна. Анал къейд авурвал, санлай Дагъустанди хьиз, Сулейман-Стальский райондини агьалийрин яшайиш хъсанарунихъ рекье тунвай государстводин гзаф программайра ва милли проектра иштиракзавач.

2019-йисалай эгечIна, милли проектар 12 рекье ишлемишзава: «Демография», «Здравоохранение», «Образование», «Жилье и городская среда», «Экология», «Безопасные и качественные автомобильные дороги», «Цифровая экономика Российской Федерации», «Производительность труда», «Наука», «Культура», «МСП и поддержка индивидуальной инициативы», «Международная кооперация и экспорт».

Райондин Кьили лагьайвал, федеральный дережада виликдай тешкиллувилин еке кIвалах тухвана, талукь тир нормативный документар кьабулна. Алатай йисан июлдин вацра проектрин метлебар дуьзар хъувуна, мумкинвилер гегьеншарна ва абур кьилиз акъуддай вахт тайинарна – 2030-йисалди. Мадни Хатасузвилин Советдин Координационный заседанидал Сергей Меликова къейд авурвал, алатай йисан декабрдин вацра РФ-дин Президент Владимир Путина Госсоветдин ва стратегиядин рекьяй ва милли проектрай Советдин саналди тир заседание кьиле тухвана, анал 2030-йисалди Россия нациядин метлебрай вилик тухунин июлдин Указ са метлебдихъ элкъуьрзавай, тамамдаказ гьазурнавай сад тир план тестикьарна. Ана милли проектар ва

госпрограммаяр вилик тухун тайиндиз къалурнава. Гъиле авай йисуз, виликан йисарив гекъигайла, республикада милли проектриз ахъайзавай пулунин кьадар хейлин тIимиларда. Идакай Сергей Меликова заседанидал таъкимарна.

ДР-дин Гьукуматдин заседанидин нетижаяр фикирдиз къачуна Нариман Абдулмуталибова структурайрин подразделенийрин руководителриз ва АСП-рин кьилериз милли проектра иштиракун давамарунин ва алай йис патал райондин бюджет тамамвилелди кьабулдалди милли вири проектра иштиракунин мумкинвилериз килигунин, заявкаяр гьазурунин тапшуругъ гана.

- Гьукуматди аваданламишунин кIвалахар кьиле тухудай, агьалийрин яшайиш, дуланажагъдин шартIар хъсанардай мумкинвилер гузва, — къейдна Н. Абдулмуталибова. – Сифте кьил кутадай бинеламишун чалай атана кIанда. Чахъ социальный метлеб авай проектриз куьмек гузвай меценатарни ава.

Совещанидал килигай месэлаяр кьилиз акъудунин ва абур кьилиз акъудунал гуьзчивал тухунин патахъай райондин Кьил Нариман Абдулмуталибова райадминистрациядин Кьилин заместителриз тапшуругъарни гана.

Совещанидал жуьреба-жуьре маса (эпидемиологиядин, коронавирусдин аксина рапар ягъунин…) месэлайризни килигна.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6