Меню
6+

Сетевое издание «Кюре»

09.03.2021 09:54 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Хъсан инсанни я, пешекарни

И йикъара Сулейман-Стальский райондин Кьил Нариман Шамсудинович Абдулмуталибова райадминистрациядин умуми отделдин кьилин пешекар Тевриз Вердихановадив яргъал йисарин намуслу зегьметдай ва 60 йис тамам хьунихъ галаз алакъалу яз райондин Гьуьрметдин грамота вахкана.

Шадвилин мярекатдал Т. Вердихановадиз тебрикдин ва алхишдин келимаяр райадминистрациядин Кьилин 1-заместитель Лацис Оруджева, администрациядин крар идара ийизвайди тир Рамазан Абдулазизова, умуми отделдин пешекар Сабина Къазибеговади ва масабуру лагьана.

- Тевриз Девришевнади райондин администрацияда кIвалахиз 38 йис я, — лагьана Н. Ш. Абдулмуталибова. – И йисара ада вич гьар са хиляй дерин чирвилер авай, хиве авай везифайрив жавабдарвал гьисс авуналди эгечIдай пешекар, ачух ва михьи рикI авай инсан яз къалурна. Адан кIвалахдилай чун гзаф рази я.

Райадминистрациядин жавабдар къуллугъэгьлийри вичикай хуш келимаяр лагьай Тевриз Вердихановадикай заз чи газет кIелзавайбуруз суьгьбет ийиз кIанзава.

Тевриз Вердиханова 1961-йисуз Кьасумхуьрел Ватандин ЧIехи дяведин активный иштиракчи ичинви Девришан ва вичин савадлу вири уьмуьрда чилел кIвалах авур, лугьудайвал, гъилералди къазанмишай гьалалдин фу тIуьр Перихалум Насрулаеврин лежбер хизанда дидедиз хьана. Ада 4 аял (2 стхани 2 вах) авай хизанда тербия къачуна.

- Дах рагьметдиз фейила зи 14 йис тир, — суьгьбетзава Т. Вердихановади. – Амма дидеди чаз, аялриз, са куьникайни дарвал ганач, лугьудайвал, ада чаз бубавални авуна, дидевални.

1979-йисуз ЦIийи хуьруьн юкьван школа хъсан къиметар аваз акьалтIарай Тевриза, Дербент шегьерда 6 вацран курсара кIелуналди, машинисткавилин пешекарвал къачуна. Пуд йисуз жегьил пешекарди вири уьлкведа машгьур Кьасумхуьруьн консервиярдай заводда кIвалахна, вич хъсан пешекар тирди къалурна.

Къизилдин кIус руквадикай хкатна чир жеда, — лугьузва бубайрин камаллу мисалда. Хъсан пешекар, милаим къилихрин инсан яз къалурай Тевриз Девришевнадиз Сулейман-Стальский райондин исполкомдиз машинисткавилин кIвалахал теклифна. И везифаяр ада намуслудаказ, баркалла ва аферин къведайвал кьилиз акъудна.

Лагьана кIанда, райадминистрацияда тамамарзавай гьар са кIвалах жавабдарди, хъсан чирвилер хьун истемишзавайди я. И кар аннамишуналди, кIвалахдивай къерех тахьана, Т. Вердихановади Дагъустандин политехнический колледж (2000-йисуз) кIелна акьалтIарна.

2011-йисан 1-мартдилай инихъ Тевриз Девришевнади райондин администрацияда умуми отделдин кьилин пешекар яз кIвалахзава, хиве авай жавабдар везифаяр уьзуьагъдаказ кьилиз акъудзава.

Чпин хизанар, кIвал-югъ хьанвай Тевриз Вердихановадин веледар тир Заира Ставрополь шегьерда, Абдурашид ва Таисия Норильск шегьерда яшамиш жезва, абуру жуьреба-жуьре пешейрин иесияр яз кIвалахзава.

Веледрикай рахадайла, Тевриз Девришевнади ХХ асирдин Гомер СтIал Сулейманан шиирдин гафар рикIел хкана: «Ферли веледар хьайи диде-бубаяр бахтавар я». Низамлу, ферли веледри хьиз, адаз 8 хтулдини рикIин шадвал, руьгьдин таъминвал гузва.

- Къуй дуьнья ислягь, вирибурун ва гьабурухъ галаз зи веледар ва хтуларни бахтлу хьурай, — лугьузва Т. Вердихановади.

Им гьар са дидедин рикIин мурад я. И гафариз чнани, газет кIелзавайбуруни шериквал ийизва.

Уьмуьрдин 60 лагьай гатфар мубарак авуналди, чаз лугьуз кIанзава: вахъ мягькем сагъламвал, хизандин бахтлувал ва кIвалахдани агалкьунар хьурай, гьуьрметлу Тевриз Девришевна!

Текст кхьейди ва шикил ягъайди Хазран Кьасумов я.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

8