Кьудакай призерар хьана
Каспийск шегьердин образованидин Центрада «Науки юношей питаю!» лишандик кваз тухвай ахтармишунрин ва проектрин конкурсда гъалиб хьайибурув ва призеррив наградаяр вахкунин шадвилин мярекат кьиле фена.
ЦIинин
йисуз 4-сеферда тухвай конкурсда 1000-далай виниз аялрин бахчайра тербия къачузвайбуру ва умуми образованидин школайра кIелзавайбуру иштиракна.
Алай йисуз конкурсдин интерактивный майданар ва выставкаяр ДАССР-дин 100 йис тамам хьуниз талукьарнавай.
Наградаяр вахкунин шадвилера ДР-дин образованидин ва илимдин министрдин везифаяр вахтуналди тамамарзавай Уммупазиль Омаровади, Каспийскдин мэр Борис Гонцова, республикадин вузрин ректорри, муниципальный органрин образованидин управленийрин начальникри, республикадин общественно-политический деятелри иштиракна.
Республикадин и конкурсда Сулейман-Стальский райондин школайра кIелзавайбурни призерер хьана. ИкI, «Начальные классы» рекьяй М. Дибирован тIварунихъ галай Герейханован 2-нумрадин юкьван школадин 1-классда кIелзавай Лейла Гуьламетовади ва Нариман Къазиагьмедова (несигьатчи – сифтегьан классрин муаллим Зейнаб Абдулвагьабова) 2-чкаяр кьуна.
«Родные языки» рекьяй Р. Халикьован тIварунихъ галай Кьулан СтIалрин юкьван школадин 8-классдин ученик Амирхан Шахбазов (несигьатчи – дидед чIалан ва литературадин муаллим Мислимат Османова) 2-чкадиз, Р. Османован тIварунихъ галай Герейханован 1-нумрадин юкьван школадин 7-классдин ученица Самира Нажмудинова (несигьатчи – дидед чIалан ва литературадин муаллим Сегьерхалум Османова) 3-чкадиз лайихлу хьана.
Конкурсдин призерриз талукь дережайрин дипломар, муаллимриз Чухсагъулдин чарар гана.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.