ТIугъвалдин аксина рапар язава

Рапар ягъунин сифтегьан пай 3 гьафтедин идалай вилик кьиле фенай. Алатай сеферда хьиз, адахъ галаз санал и юкъуз райадминистрациядин Кьилин заместитель Абуталиб Фатулаеваз ва образованидин управленидин начальник Гьуьсейн Шихбабаеваз, гьакIни Герейханован хуьруьн 2-отделенидай тир уьмуьрдин юлдашар – Сефералиевризни рапар яна.

Раб ядалди вилик Нариман Абдулмуталибован медицинадин рекьяй гьал мад сеферда ахтармишун кьиле тухвана. Духтур-терапевтди адавай сифтегьан раб ягъайдалай гуьгъуьниз вич гьикI гьисс авунатIа, сагъламвилин гьалдикай хабарар кьуна.

Райондин Кьили къейд авурвал, къерехдин маса татугайвилер гьисс авунач, сагъламвилин гьал хъсанзава.

«- ТIугъвалдин аксина сифтегьан раб ягъайдалай гуьгъуьниз за са жуьрединни татугай гьалар гьисс авунач: я температура хкаж хьун, мекьи фул акатун, кIарабра тIал гьатун ва икI мад, рабочий йикъан эхирдиз галат хьунилай гъейри», — лагьана ада ва райондин агьалийриз уьмуьр хуьн патал важиблу и мярекатда иштирак авуниз эвер гана.

Нариман Абдулмуталибован гафаралди, и вирусдал гъалибвал къачуз анжах коллективный иммунитет арадал гъуналди къазанмишиз жеда.

« — Чна чун тIугъвалдикай хуьнин регьятди тушир вахт кечирмишна. Карантиндин серенжемрал хквез садазни кIанзавач. Гьавиляй рапар ягъун (вакцинация кьиле тухун), пандемиядал гъалибвал къазанмишун важиблу я ва гьар сада вич ва вичин мукьвабур тIегъуьндикай хуьн патал жавабдарвал гьисс авун герек я».

Алай вахтунда районда 102 касдиз рапар янава, гьакI 5 касдиз – Кьурагь райондин. ЧIуру таъсир авунин дуьшуьш малум туш.

Коронавирусдин аксина антителяр кватIа ахтармишун патал 413 касдин тестирование кьиле тухванва. 162 касдик антителяр кваз хьуниз килигна абуруз рапар ягъун герек туширди къалурнава.

ТIугъвалдин аксина рапар ягъун давам жезва.

Гьазурайди – А. Камилов