Меню
6+

Сайт «Кюре»

19.04.2021 13:57 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Бажарагъдин пай ганвайди

Манидардин хуш сесинихъ яб акалайла, шаирдин гуьгьуьл ачухдай шиир кIелайла, заргардин гуьзел безекриз килигайла, гам хразвай рушан гьейранардай нехишар акурла инсанри лугьуда: «Аллагьди ганвай пай я».

Аллагьди культурадин хиле кIвалахдай бажарагъдин пай ганвайбурукай сад Испикрин хуьруьн клубдин заведующий Периханум Къазанбекова (шикилда) я лагьайтIа, бажагьат зун ягъалмиш жеда.

- Периханум вах неинки бажарагълу культработник, гьакIни ширин сес авай манидар, алакьунар авай гьевескар артистни я, — лугьузва райондин культурадин отделдин начальник, Дагъустандин халкьдин шаир Майрудин Бабаханова. – Ада районда кьиле тухузвай культурадинни шадвилин вири мярекатра активвилелди иштиракзава. Адан кIвалахдилай чун гзаф рази я.

П. Къазанбековадин пешекарвал къачунин рехъ масадбурулай са куьнални тафаватлу туш: ада лап хъсан къиметар аваз школа, гуьгъуьнлайни культпросвет училище акьалтIарна. Периханума испиквийриз культурадин жигьетдай къуллугъ ийиз 30 йисалай виниз я. РикI алай пешедиз вафалувал къалуруналди, хуьруьнвийриз культурадин жигьетдай намуслудаказ къуллугъ авуналди, ада агьалийрин патай лайихлу гьуьрмет къазанмишнава.

КьетIен пай ганвай культработник ва манидар яз П. Къазанбековади райондин Культурадин дворецда кардик квай фольклордин «Кюре ансамблдин кIвалахдани активвилелди иштиракзава. Лагьана кIанда, адаз лезги халкьдин куьгьне адетар, маниярни чида. Хуьре ва районда тухузвай шадвилин мярекатра П. Къазанбековади халкьдин куьгьне манияр устаддаказ тамамарзава, ада гьакIни «КьепIинин кьилихъ дидедин лайлаяр», «Яран суварин лирли»», «Гуни», «Пешапай», «Гатфарин лирли» ва гъвечIи маса сегьнеяр къалурзава.

- Зи репертуарда лезги халкьдин адетар къалурзавай шииррин жуьреда туькIуьрнавай хурун эсерри кьетIен чка кьазва, — лугьузва Периханум Къазанбековади. – Абурукай чаз чи бубайрин руьгьдин гьакъикъат, адан эбедивал аквазва. Мадни, абурухъ акьалтзавай несилдиз тербия гун патал чIехи метлеб ава. И кардиз чна кьетIен фикир гана кIанда. Халкьди вичин ивирар квадарайтIа, чун кесиб жеда ва са кьадар вахт алатайла, чаз чун виляй аватда. Гьавиляй чна вирида чи руьгьдин девлетдин къайгъу датIана чIугуна кIанда.

П. Къазанбаковади Испикрин хуьруьн культурадинни ял ягъунин центрадин (КДЦ-дин) заведующийвилин везифаярни намуслудаказ кьиле тухузва. Хуьре суваррин ва лишанлу йикъара шадвилин ва культурадин мярекатрин тешкилатчини П. Къазанбекова я.

П. Къазанбековадихъ дурумлу зегьметдай ганвай дипломар, грамотаяр са шумуд ава. Алай йисуз, Россиядин культурадин работникрин йикъан сергьятра аваз, адаз муниципальный райондин Кьил Нариман Абдулмуталибова Чухсагъулдин чарни гана.

Чна винидихъ къейд авурвал, 30 йисалай виниз вичин рикI алай пешедай кIвалахзавай Периханум Къазанбековадикай макъала кхьидайла, зи рикIел туьркерин шаир Надым Хикмета лагьай келимаяр хтана: «Ашкъидивди кIвалахал физвай ва шадвилелди кIвализ хквезвай инсан бахтлу кас я». Са рахунни алачиз, и гафар П. Къазанбековадизни хас я.

Текст кхьейди ва шикил ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

17