Меню
6+

Сайт «Кюре»

19.04.2021 13:47 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Гьахъ-гьисабдин концерт гана

Дагъустандин автономиядин — 100 йис

13-апрелдиз И. Гь. Тагьирован тIварунихъ галай райондин культурадин Дворецдин чIехи залда Готфрид Алиевич Гьасанован тIварунихъ галай Аялрин музыкальный школадин преподавателри ва ана кIелзавай аялри саналди гьазурнавай гьахъ-гьисабдин чIехи концерт гана. Ам ДАССР арадал атайдалай инихъ 100 йис тамам хьуниз талукьарнавайди тир. Гьар йисуз хъсан адет хьанвай гьахъ-гьисабдин концертди са шакни алачиз и школадин муаллимрин ва ана чирвилер къачузвай аялрин алакьунрин гьакъиндай ачух шагьидвалзава.

Концертдин программадиз килигиз аниз школайрай кIелзавайбур, аялрин диде-бубаяр, милли музыкадал, манийрал рикI алайбур атанвай.

Гьахъ-гьисабдин концертдиз гьуьрметлу мугьманар яз муниципальный райондин Кьил Нариман Абдулмуталибов, райадминистрациядин Кьилин 1-заместитель Лацис Оруджев, райондин общественный палатадин председатель Алимет Мейланов, райондин культурадин отделдин начальник, Дагъустандин халкьдин шаир Майрудин Бабаханов, Дербентдин музыкальный училищедин преподаватель Насир Шагьмурадов атанвай.

Концерт Аялрин музыкальный школадин тербиячийрин хорди тамамарай лезги халкьдин манийрикай ибарат тир попурридилай башламиш хьана. Концертдин программа чи машгьур культработник ва конферансье Ярагьмед Ярагьмедова кьиле тухвана.

Концертдин программадик халкьдин алатрин оркестрди, чIагъанчийрин, далдамчийрин ва маса ансанмблри устадвилелди тамамарай нумраяр, гъвечIи сценка, халкьдин манияр квай.

Залда ацукьнавайбуру Дагъустандин лайихлу артист Омар Меликова, Таира Муспагьовади ва Гьуьрият Мегьамедовади устадвилелди лагьай манияр еке хушвилелди кьабулна.

Концертдин программа куьтягь хьайидалай гуьгъуьниз сегьнедилай ихьтин гуьзел ва метлеблу мярекат тешкилунай ДР-дин культурадин лайихлу работникар тир музыкальный школадин директор Къазибег Къурбанован, завуч Гьажимет Тагьирбекован, анин преподавателрин ва кIелзавай аялрин тIварцIихъ чухсагъулдин хуш келимаяр гваз райадминистрациядин Кьилин 1-заместитель Лацис Оруджев рахана.

Чпин кIвалахдиз ихьтин еке фикир, къимет ва куьмекар гунай Къазибег Къурбанова райондин руководстводиз чухсагъул лагьана.

Концерт, халкьдин алатрин ансамблди тамамарай авазралди акьалтIарна.

Аялрин музыкальный школадин коллективди гайи гьахъ-гьисабдин концерт райондин культурадин уьмуьрда лишанлу вакъиадиз элкъвена ва ам адан иштиракчийрин рикIел яргъалди аламукьдайди хьана.

Абидин Камилов, ДР-дин культурадин лайихлу работник

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

8