Здравоохраненидин объектрал

Сифте ам КТ-дин (компьютердин томографидин) отделение патал ЦРБ-дин сергьятда дарамат эцигзавай чкадал фена.

ЦРБ-дин кьилин духтур Жафер Къурбанисмаилова къейд авурвал, мукьвал йикъара и отделение ишлемишиз вахкунин вилик квай серенжемар кьиле фида. Алай вахтунда лицензия къачун патал герек кIвалахар тамамарзава. Республикадин минздравдай чара авунвай компьютерный томограф эцигун патал Ростов-на-Дону шегьердай пешекарриз теклифда. 15х9 квадратный метрдин умуми майдан авай, 4 кабинетдикай ибарат тир са мертебадин дараматдал эцигунрин кIвалахар акьалтIарнава. И дарамат меценатрин ва райондин инициативный агьалийрин такьатрин гьисабдай эцигнавайди я. Ам эцигун патал 3 миллион манат пул кIватIна. Къенепатан куьлуь кIвалахар дараматда республикадин бюджетдай чара авунвай 3 миллион манатдин такьатрин гьисабдай кьиле тухванва.

ЦIийи отделение патал гьакI алава чирвилер къачунвай тежрибалу медперсонални гьазурнава.

Райондин Кьил Нариман Абдулмуталибова ЦРБ-дин руководстводал анаг зирзибилдикай михьунин ва аваданламишунин кIвалахар кьиле тухун тапшурмишна.

Гуьгъуьнлай райондин Кьил ЦРБ-дин кьилин духтурни галаз Герейханован хуьруьн поселенидиз мугьман хьана ва анин участковый больницада капитальный ремонтар кьиле физвай гьалдихъ галаз таниш хьана, анин здравоохраненидин объектар авай, агьалийриз медицинадин рекьяй къуллугъ авун тешкилнавай гьалдихъ галаз таниш хьана, талукь тир веревирдер авуна, агьалийрихъ галаз гуьруьшмиш хьана.