Меню
6+

Сайт «Кюре»

02.04.2021 15:19 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Бахрейндай Куьредин чилел – гъалибвал гваз!

Алай йисан мартдин вацра Сулейман-Стальский райондай тир машгьур спортсмен, женгинин самбодай, ММА-дай ва женгинин маса жуьрейрай гзаф турниррин гъалибчи Икрам Алискеров Бахрейнда пешекарвилин женгерай Сербиядай тир Миро Юрковичахъ галаз гуьруьшмиш хьана.

Юкьван заланвилин категориядай ада Breve CF 49 турнирда вичин къаршидиз экъечIай гзаф къуватлу М. Юрковичал 2-раундда михьи гъалибвал къачуна. Им лагьай чIал я хьи, Икрам Алискерова тухвай пешекарвилин женгера 11-гъалибвал къачуна. Чи машгьур спортсмен анжах са женгина кумукьна.

Лагьана кIанда, 28 йисан яшда авай И. Алискерова 5-классда кIелдайла машгьур спортсменар-стхаяр тир Къурбановрин гъилик самбодай ва дзюдодай вердишвилер къачуз башламишна. Алай вахтунда Икрам Алискеров женгинин самбодай дуьньядин Суперкубокдин (2014-йис), Россиядин Кубокрин (2013-2014-йисар) сагьиб, «Мемориал А. Харлампиева» международный турнирдин чемпион, чIехи дережадин пешекарвилин турниррин гъалибчи ва призер я.

Турнирра Икрам Алискеров Дербентдин «Chempion» клубдин патай экъечIзава.

29-мартдин гуьлуьшан югъ. Бахрейнда кьиле тухвай чIехи турнирда нубатдин гъалибвал къачур И. Алискеров хайиди тир Куьредин чилел хушвилелди къаршиламишун патал ЦIийи Мамрачрин хуьруьн кьилихъ, «Кавказ» федеральный шегьредилай Сулейман-Стальский район галай патахъ элкъвезвай къекъуьндал СтIал Сулейманаз эцигнавай сквердин вилик гзаф кьадар инсанар кIватI хьанва. Абурун арада райондин Кьил Нариман Абдулмуталибов, Дагъустан Республикадин Халкьдин Собранидин Комитетдин председателдин заместитель Гьамидулагь Мегьамедов, райондин образованидин управленидин начальник Гьуьсейн Шихбабаев, спортдинни туризмдин ва жегьилрин крарай Комитетдин директор Надыр Эфендиев, Икрам Алискерован сифтегьан тренер-пешекаррин арада дзюдодай дуьньядин чемпион Тельман Къурбанов, 1-нумрадин ДЮСШ-дин директор Мегьамедрагьим Къазанбеков, къайдаяр авачир женгерай дуьньядин чемпион Фарид Девлетханов, тIвар-ван авай маса спортсменар, тренерар… ава. Абурув И. Алискерован чIехи шикилар гвай.

Сятдин 12 тамам жедайла хайи Куьредин чилел агакьай Икрам Алискеров милли парталар алаз гададини руша фуни-кьел гваз, кIватI хьанвайбуру гурлу капар ягъуналди, къаршиламишна.

- Гьуьрметлу чи кьегьал хва Икрам Алискеров!, — лагьана райондин Кьил Нариман Абдулмуталибова. – Чна, райондин вири агьалийри, ваз пешекарвилин женгера къазанмишнавай 11-гъалибвал мубаракзава. Чаз телевиденидай ва электронный маса такьатрай вуна яргъал тир Бахрейнда турнирда тухвай бягьс акуна. Вуна вун халис дагъви, Къадим лезги чилин къагьриман хва яз къалурна. Идай чна ваз аферин ва баркалла лугьузва. Чемпион хва хайи чилел хушвилелди кьабулунал чун кьадар авачир кьван шад я.

- Гьелбетда, Икрам Алискерова нубатдин сеферда гъалибвал къачунал неинки Сулейман-Стальский райондин къадирлу халкьди, гьакIни Дагъустанда ва Россияда гзафбуру дамахзава. Вуна, Икрам, ви агалкьунралди хайиди тир гъвечIи Ватандин – Куьредин, гьакIни зурба ва къудратлу Россиядин Федерациядин тIварни хкажзава. Чаз вахъ гележегда спортда мадни чIехи агалкьунар хьана кIанзава. Умудлу я, абур женни ийида.

Вич хушвилелди кьабулунай, тебрикдин келимаяр лугьунай Икрам Алискерова райондин вири агьалийриз, кьилди Нариман Абдулмуталибоваз ва Гьамидулагь Мегьамедоваз чухсагъул лагьана.

- Виликдай тухвай турнирра хьиз, Бахрейнда нубатдин турнирда женгинин майдандиз экъечIайла, зи рикIе хайи Дагъустан, багъри СтIал Сулейманан район, жуван лезги халкь, райондин агьалияр, зи багъриярни дустар хьана, — лагьана Икрам Алискерова. – Ида заз гъалиб хьунизни екедаказ куьмек гана.

Текст кхьейди ва шикилар ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

14