Хъсан тешкиллувал аваз ва гурлудаказ

Культура – ам вуч я? И суалдиз Энциклопедиядин гафарганда жаваб гузва: «Культура – им инсанвилин, производстводин, фикиррин алакъайрин, са куьн ятIани виниз тир дережадин, виликди финин, алакьунин жигьетдай инсаниятдин себебрин вири кIватIал я».

Гзаф миллетрин адетар, къилихар, халкьарин кьетIенвилер сад жезвай Дагъустан Республикада культурадин кьетIенвал мадни артух жезва.

Винидихъ гъанвай веревирдер авуниз зун алатай гьафтеда Сулейман-Стальский районда, «Три Стал» банкетрин залда, Россиядин культурадин работникрин йикъаз талукьарна махлукьатдин еке иштираквал ва виниз тир тешкиллувал аваз тухвай шадвилин мярекатди мажбурна.

Йикъан сятдин 12 тамам хьана. Банкетрин гуьрчегдиз безетмишнавай залда эцигнавай, милли хуьрекрив, хъвадай мижейрив ва маса няметрив дуьзмишнавай столрихъ культурадин хилен ветеранри, райондин хуьрера культурадин маканра кIвалахзавайбуру чкаяр кьунва. И. Гь. Тагьирован тIварунихъ галай Россиядин халкьарин адетдин культурадин Центрадин (агъадихъ – ЦТКНР-дин) кьавалри язавай милли авазри мярекатдин иштиракчийрин гуьгьуьлар шадарзава.

Мярекатдин шадвилин программа «Сулейман-Стальский район» муниципальный райондин Кьил Нариман Шамсудинович Абдулмуталибован тебрикдин ва чухсагъулдин келимайрилай ачух хьана.

- Играми культурадин работникар! — лагьана Н. Ш. Абдулмуталибова. – За Квез рикIин сидкьидай куь пешекарвилин сувар – Россиядин культурадин работникрин югъ мубаракзава. И сувари куь яратмишунрин зегьметдин метлеблувал къейдзава. Культуради милли къилихар арадал гъизва, ада руьгьдин адетар хуьнин жавабдарвал вичин хивез къачузва. Культурадин майданрин жуьреба-жуьревилелди¸кьетIенвилералди чи райондивай гьахълудаказ дамах ийиз жеда. И жигьетдай хуьрерин культурадинни ял ягъунин центрайрин, музейрин, библиотекайрин, яратмишунрин коллективрин кIвалахдихъни еке метлеб ава. Абурун кIвалах себеб яз гзаф инсанриз лишанлу йикъар халис суварриз элкъвезва. Дидед чIал хуьнин, акьалтзавай несил халкьдин девлетлу культурадал ашукьарунин кардани культработникри санлай райондин агалкьунар артухарзава. Умудлу я, чалай квез кIвалахдай, халкьдиз мадни хъсандиз къуллугъдай шартIар яратмишиз алакьда. За къенин сувар культурадин хилен ветеранризни мубаракзава.

Пешедиз вафалувиляй, дурумлу зегьметдай за квез чухсагъул лугьузва. Квехъ сагъламвал, вири хъсанвилер, яратмишунрин рекье цIийи агалкьунар хьурай!

Тебрикдин келимайрилай райондин Кьил Нариман Абдулмуталибов пешекарвилин рекье агалкьунар хьанвай культработникрив грамотаяр ва Чухсагъулдин чарар, пишкешар вахкунал элячIна.

Дурумлу зегьметдай ва райондин культура вилик тухуник лайихлу пай кутунай ЦТКНР-дин Вини Хъартасрин филиалдин руководитель Балихан Балихановав райондин Кьили Гьуьрметдин грамота, райондин центральный библиотекадин кIелдайбурун залдин заведующий Гъулангерек Меликовадив, райондин аялрин художественный ва аялрин музыкальный школайрин преподавателар тир Абдулвагьаб Рамазановав ва Мусаиб Сейфулаевав Чухсагъулдин чарар вахкана.

ЦТКНР-дин КIварчагърин филиалдин руководитель Зейнулагь Наврузова Дагъустан Республикадин культурадин министерстводин Гьуьрметдин грамота, аялрин музыкальный школадин кIелунин рекьяй заведующий Гьажимет Тагьирбекова профсоюздин патай Гьуьрметдин знак къачуна.

Россиядин культурадин йикъан суварин мярекат эвелдилай эхирдалди устадвилелди кьиле тухвай машгьур конферансье Ярагьмед Ярагьмедова микрофондихъ еке гьуьрметдивди райондин культурадин отделдин начальник, Дагъустандин халкьдин шаир Майрудин Бабаханович Бабахановаз теклифна.

- Гьуьрметлу кIвалахдин юлдашар, играми вахар ва стхаяр!, — лагьана М. Бабаханова. – Къе жуван дуствилин, гьуьрметлу коллективда пешекарвилин сувар санал, икI гурлудаказ къейд авунал зун кьадар авачир кьван шад я. Мадни, ихьтин гуьзел мярекат тешкилунин карда еке куьмек гунай за райондин руководстводиз, кьилди къачуртIа, дидед чIал, милли адетар, хъсан крар хьиз, районда культура вилик тухуникни лайихлу пай кутазвай Нариман Шамсудиновичаз рикIин сидкьидай чухсагъул лугьузва. Адан чалишмишвал ва куь дурумлу зегьмет себеб яз алатай йисуз райондихъ культурадин рекьяй хъсан нетижаяр хьана. Районда тухвай культурадин гзаф мярекатрилай гъейри, райондин яратмишдай коллективрихъ ва кьилдин инсанрихъ республикада, Россияда

тухвай, гьакIни международный конкурсрани фестивалра агалкьунар хьана. Мадни заз лугьуз кIанзава хьи, культура – им маниярни кьуьлер туш. Культура виш йисара арадал атанва. Культура халкьдин тарих, къвезмай несилрал агакьарзавай ирс я, Ватан кIан хьун, обществода жув дуьз тухун, дуьз рахунни, къекъуьнни культура я.

Заз, гьуьрметлу культработникар, куь рикIер шад хьана кIанзава, гьа вахтунда квевай халкьдин рикIерни шад ийиз жеда.

Вичин гафарин гьахълувал тестикьарун патал Майрудин Бабаханова яратмишунрин коллективрив, кьилдин ксарив ДР-дин культурадин, туризмдинни халкьдин сеняткарвилин министерствойрин, Дагъустандин яратмишунрин КIвалин Гьуьрметдин грамотаяр, дипломар вахкана. Кьилди къачуртIа, ДР-дин лайихлу артист Омар Меликов, музыкальный школадин преподаватель Расул Абдулкебиров, И. Гь. Тагьирован тIварунихъ галай ЦТКНР ва райондин далдамчийрин ансамбль ДР-дин культурадин министерстводин Гьуьрметдин грамотайриз, райондин краеведческий музейдин директор Набиюлагь Керимханов республикадин, Вирироссиядин ва международный фестивалрин са шумуд грамотадиз ва дипломдиз лайихлу хьана.

Майрудин Бабаханова «Кьасумхуьруьн далдамчияр» ансамблдив «Халкьдин ансамбль» тIвар ганвайвилин гьакъиндай шагьадатнамани вахкана.

Мадни, райондин Кьил Нариман Абдулмуталибован тапшуругъдалди Яран суварин шадвилера активвилелди иштирак авунай райондин 7 зонадин культурадинни ял ягъунин центрайрив пулдин призарни вахкана.

Суварин мярекатдал тебрикдин ва алхишдин келимаяр гваз культработникар тир Зейнулагь Наврузов (КIварчагъ), Мерзият Амаханова (Чуьхверхуьр), Гьуьсенбег Гьажимурадов (Агъа-СтIал), Периханум Къазанбекова (Испик), Тарзан Саругъланов (Курхуьр), райондин художественный ва музыкальный школайрин директорар тир Ямудин Рамазанов ва Къазибег Къурбанов ва маса юлдашар рахана.

Гьихьтин культработникрин мярекат хьурай манияр, авазар, кьуьлер галачир?! Гьар са касдин рахунрилай гуьгъуьниз ва мярекатдин эхирдай ДР-дин лайихлу артист Омар Меликова, Селимат Гьажиевади, Ярагьмед Ярагьмедова, Маиля Яхьяевади, Азим Ризаева, Расул Абдулкебирова, Зейнулагь Наврузова ва масабуру манияр лагьана, мярекат мадни гурлу авуна…

Гьакъикъатдани, са арифдарди лагьайвал, культура инсаниятдин вири уьмуьрда дуьз рехъ къалурдай лишан, алат я.

Текст кхьейди ва шикилар ягъайди Хазран Кьасумов я