МФЦ-дин кIвалах ва Собранидин проект веревирдна

Собранидин кIвалахда ДР-дин Халкьдин Собранидин образованидин, илимдин, культурадин, жегьилрин крарай, спортдин ва туризмдин Комитетдин председателдин заместитель Гьамидулагь Мегьамедова иштиракна.

Сифтедай совещанидал ЦРБ-дин кьилин духтур Жафер Къурбанисмаилова коронавирусдихъ галаз алакъалу яз районда арадал атанвай гьаларикай рахунар авуна. Ада лагьайвал, къе-пака и тIегъуьндиз акси яз ядай 300 доза вакцина хкведа, рапар ягъунин кIвалах башламиш хъийида.

Райондин МФЦ-ди 2020-йисуз тухвай кIвалахдикай адан директор Афисат Шагьмирзоевади гьахъ-гьисаб авуна.

И месэладай райадминистрациядин Кьилин заместитель Саид Темирханова алава рахунар авуна.

Малум хьайивал, МФЦ-ди «са дакIар» къайдада 400-далай виниз государстводин ва муниципальный къуллугъар тамамарзава. 2020-йисуз центради 42 агъзурдалай виниз жуьреба-жуьре къуллугъар тамамарна.

Райадминистрациядин крар идара ийизвайди тир Рамазан Абдулазизова совещанидин иштиракчияр райондин Собранидин депутатрин 2021-йисан 26-февралдин 28-нумрадин «О внесении изменений и дополнений в Устав муниципального района «Сулейман-Стальский район» решенидин проектдихъ галаз танишарна. Абуру вирида сад хьиз проектдин тереф хвена.

Проектдиз райондин Собранидин заседанидал депутатар килигда.

ДР-дин Халкьдин Собранидин Комитетдин председателдин заместитель Гьамидулагь Мегьамедов республикадин Кьилин ва Гьукуматдин гуьзчивилик квай месэлайрал, кьилди къачуртIа, коронавирусдин вилик пад кьун патал

тухузвай кIвалахрал, школайра сифтегьан классра кIелзавайбуруз чими тIуьнар гун тешкилнавай, гьакIни образование вилик тухун патал кьабулнавай серенжемрал гегьеншдиз акъвазна.

Райондин Кьил Нариман Абдулмуталибова совещанидал килигай месэлайрин важиблувал къейдна, гьа са вахтунда, ада республикадиз ва райондиз гьар са рекьяй гузвай куьмекдай Гьамидулагь Мегьамедоваз чухсагъул лагьана.

Асият Мирзалиева, Хазран Кьасумов