«Яран сувар – 2021» - Санкт-Петербургда

И сувари уьмуьр гъалиб хьун лишанламишзава, инсанар сад-садав агудзава. Ана неинки чи ватанэгьлийри, гьакI маса миллетрин векилрини, гьа гьисабдай яз Дагъустандай атанвай мугьманрини иштиракна.

Шадвилин мярекат башламишдалди вилик залда кIватI хьанвайбуру, хъсан адет хьанвайвал, сада-садан гъилихъ яру сун гъалар кутIунна. Сувар шартIунин лампа куькIуьрунилай башламиш хьана. И карда гьуьрметлу дагъустанвийри – алимри, преподавателри ва мецентари иштиракна.

Суварин мярекат кьиле тухузвайбуру лезгийрин къадим суваррикай сад тир Яран суварин тарихдикай, адан метлебдикай лагьана, тIвар гьар жуьреда лугьузватIани, ам Дагъустандин са бязи маса халкьарини шад гьалара кьиле тухузвайди къейдна.

Залда авайбурун вилик тебрикдин хуш келимаяр гваз и мярекатдин гьуьрметлу мугьманар рахана. Кьилди къачуртIа, анал суварин тебрикдин гафар гваз рахай Курхуьруьн поселенидин администрациядин кьил Радик Гьажалиева хайи чкайривай яргъа Санкт-Петербургда Яран суварин ихьтин мярекат тешкилунал ва кьиле тухунал вич гзаф шад ва гьейран тирди лагьана.

Сувар кьиле тухузвайбуру анал Санкт-Петербургда авай ДР-дин векил Гьасан Гьасанован, Санкт-Петербургдин губернатор Александр Беглован, миллетрин алакъайрин ва миграционный политика уьмуьрдиз кечирмишунин жигьетдай Комитетдин председатель Олег Капитанован, миллетрин КIвалин директор Валерий Николаеван, милли культурайрин тешкилатрин руководителрин тебрикар кIелна. И юкъуз шегьерда «Навруз» суварни къейд ийизвайвиляй абурувай иниз къвез хьанач.

Сувар тебрик авунихъ галаз санал чпин куьгьне къадим адетар, тарих хуьз алахънавай Санкт-Петербургдин лезгийрин тIварцIихъ хуш келимаяр гваз анал гьакIни РФ-дин лайихлу духтур, А. Поленован тIварунихъ галай нейрохирургиядин НИИ-дин кафедрадин профессор, «Золотой скальпель» милли премиядин сагьиб Саид Ражабов ва масабурни рахана.

Тебрикдин рахунрилай гуьгъуьниз суварин концертдин программа башламишна. Кьавалчийри милли темайрай попуррияр тамамарна, манияр лагьана.

Югъ нянихъ элкъвейла шегьердин са майдандал яран цIаяр хъувуна.

И мярекат суварин иштиракчийрин рикIел яргъалди аламукьдайди хьана.

Гьазурайди – А. Камилов