Алакъа сихди ва мягькемди жен

Заседанидин кIвалахда райондин Кьил Нариман Абдулмуталибова, общественный хатасузвал хуьнин рекьяй райадминистрациядин Кьилин заместитель Абуталиб Фатулаева, райондин имамрин Советдин председатель Гьасан гьажи Амаханова, хуьрерин поселенийрин администрацийрин кьилери, АТК-дин аппаратдин, диндин идарайрин, къайдаяр хуьдай органрин ва СМИ-рин векилри иштиракна.

Заседанидал РФ-дин Гьукуматди 2019-йисан 5-сентябрдиз 1165-нумрадик кваз кьабулай «Об утверждении требований к антитеррористической защищенности объектов (территорий) религиозных организаций и формы паспорта безопасности объектов (территорий) религиозных организаций» къарар кьилиз акъудзавай гьалдикай общественный хатасузвал хуьнин рекьяй райадминистрациядин Кьилин заместитель Абуталиб Фатулаева, кардик квай законрихъ галаз кьадайвал райондин диндин идарайра

тухузвай кIвалахдикай райондин имамрин Советдин председатель Гьасан гьажи Амаханова, диндин идарайриз ихтиярар тайинардай документар закондалди кьабул жедай тегьерда туькIуьрунин кIвалах кьиле физвай гьалдикай «УМИЗ» МБУ-дин руководитель Назир Гьасанова ва райадминистрациядин правовой отделдин начальник Мегьамед Исмаилова гегьенш рахунар авуна.

Заседанидал хуьрерин поселенийрин мискIинрин имамар, общественностдин векиларни рахана.

Общественный хатасузвал хуьнин рекьяй райадминистрациядин Кьилин заместитель Абуталиб Фатулаева къейд авурвал, закондалди кьабул жедай тегьерда документар вахтунда туькIуьрунин кIвалах диндин организацийрин руководителрин активный кIвалахдилай гзаф аслу я. И жигьетдай кIвалах лап зайиф я. Диндин гзаф идарайрихъ документар авач. И жигьетдай «УМИЗ» МБУ-ди кIвалах тухузва. Диндин организацийрин векилрини и карда иштиракун лазим я.

Заседанидал Назир Гьасанова ва Мегьамед Исмаилова лагьайвал, икьван чIавалди диндин 17 объектди ихтиярар тайинардай документар къачунва, мад 5 объектди абур гуьзлемишзава. Гьа са вахтунда, Уставар авайди анжах I4 идара я.

Райондин имамрин Советдин председатель Гьасан гьажи Амаханова диндихъ галаз алакъалу месэлайриз фикир гунай, мискIинар регистрация авунин ва маса кIвалахра куьмек гунай райадминистрациядиз чухсагъул лагьана. Гьа са вахтунда, ада райондин руководство инанмишарна хьи, вилик акъвазнавай месэлаяр гьялун патал диндин организацийри чпелай аслу вири кIвалахар кьилиз акъудда.

Гьасан гьажи Амаханова мискIинра тамашунин камераяр эцигун метлебдив кьур кар жедайдини къейдна.

Заседанидин нетижаяр кьуналди, райондин Кьил Нариман Абдулмуталибова адан иштиракчийрин фикир райондин динин организацийринни чкадин самоуправленидин органрин ва халкьдин арада авай алакъа лап зайифди тирдал желбна. Вири месэлаярни сад-садахъ галаз вирибурун арада алакъалувал мягькемаруналди гьялна кIанда.

- Чи районди залан вахтарни гьялайди я, — лагьана Н. Абдулмуталибова. – Чи жегьилар тахсиркарвилин таблигъатдин къурбандарни хьайиди я. Къе чаз общественный уьмуьр туькIуьрдай вири жуьредин мумкинвилер ава, гьукуматдини халкьдин тереф хуьзва, социальный метлеб авай проектар уьмуьрдиз кечирмишунин рекье куьмекар гузва. Диндинни государстводин къурулушрин алакъалувили терефкарвал авачир ва кар бажармишдай къилих арадал гъизва. Диндин къуллугъчияр, ругьанияр гьамиша обществодихъ галаз са икьрардал атун, ругьанийри гьялзавай вири месэлаяр халкьдихъ галаз сад-садав кьун ва абур халкьди кьабулун лазим я. Чна социальный сад тир чка арадал гъунихъни еке метлеб ава. Саналди тир къуватралди чавай четинвилер алудиз, агьалийриз сагъ-саламатвал, хъсан дуланажагъ таъминариз жеда. Чи патай яз райондин руководство имамрин Советдиз вири патарихъай куьмек гуз гьазур я.

Заседанидал гъайи теклифар ва къейдер протоколдик кутун теклифна. Анал килигай месэлайрихъ галаз кьадайвал, райондин АТК-дин аппаратдал муниципалитетдин территориядал кардик квай диндин идарайрин кIвалах къайдадик кутунин мураддалди «рекьерин карта» туькIуьрунин, уставар туькIуьрунин ва герек документар къачунин карда консультативный ва маса рекьерай куьмекар гун тапшурмишна.

Заседанидал районда санитариядинни эпидемиологиядин ярамиш тир гьалар арадал гъунин, коронавирусдиз акси рапар ягъунин месэлайризни килигна.

Хазран Кьасумов