Чкадал фена рапар яна

Къейд ийиз кIанзава хьи, хуьрерин агьалийриз регьятвал хьун патал райондин центральный больницадин медработникри хуьрериз физ, инсанриз рапар язава. Сифте яз и кIвалах алатай гьафтеда ЦIийи Макьарал кьиле тухвана.

6-апрелдиз кьиле ЦРБ-дин участковый духтур-терапевт Наргиз Гьажимирзоева аваз медработникрин са десте Цмуррин хуьруьз фена, анин цIийиз эцигнавай модульный фельдшервилинни акушервилин пунктуна хуьруьн школадин муаллимриз, администрациядин работникриз ва са шумуд кас пенсионерриз (саки 25 касдиз) коронавирусдин акси рапар яна.

- Хаталу тIегъуьндин аксина чи школадин саки вири муаллимри гуьгьуьллувилелди рапар яна, — лагьана чаз школадин директор Абдулнасир Ханвердиева. – Им лап важиблу кар я, гьикI лагьайтIа, муаллимар кIелзавайбурухъ ва абурун диде-бубайрихъ галаз сих алакъада ава. Рапар ягъуни азар чкIуниз манийвалзава.

Вичи яргъал йисара духтурвиле, гьа гьисабдай яз и хуьруьн фельдшервилинни акушервилин пунктунин заведующийвиле кIвалах авур Эгьли Алибеговади чаз лагьайвал, коронавирусдин аксина рапар ягъун, иллаки яшар 60 йисалай алатнавай инсанар патал, лап важиблу я.

- Райондин руководстводин теклифдалди центральный больницадин медработникри чкадал атана инсанриз коронавирусдин аксина рапар ягъун тебрик авуниз лайихлу кар хьана, — лугьузва «сельсовет Цмурский» хуьруьн поселенидин администрациядин кьил Раида Алибеговади. – Хуьруьз атунай, инсанриз рапар ягъунай ва хийирлу меслятар къалурунай чна ЦРБ-дин медработникриз чухсагъул лугьузва.

ЦРБ-дин участковый духтур-терапевт Наргиз Гьажимирзоевади чаз лагьайвал, медработникар хуьрериз финин ва чкадал рапар ягъунин кIвалах давамни ийида.

Текст кхьейди ва шикил ягъайди Хазран Кьасумов я