Меню
6+

Сетевое издание «Кюре»

09.04.2021 14:47 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Коллегиядин заседанидал – важиблу месэлаяр

Алай йисан 5-апрелдиз райадминистрацияда Сулейман-Стальский райондин Кьил Нариман Абдулмуталибован председателвилик кваз Коллегиядин заседание кьиле фена.

Адан кIвалахда райондин депутатрин Собранидин председатель Штибег Мегьамедханова, райадминистрациядин управленийринни отделрин руководителри, хуьрерин поселенийрин кьилери, общественный тешкилатрин ва СМИ-рин векилри иштиракна.

Сифтедай Коллегиядин заседанидин иштиракчияр райондин центральный больницадин кьилин духтур Жафер Къурбанисмаилова районда эпидемиологиядин жигьетдай авай гьаларихъ ва и тIегъуьндин аксина рапар (вакцина) ягъунин кIвалах кьиле физвай гьалдихъ галаз танишарна. Ада лагьайвал, райондин больницадиз 300 дозадин кьадарда аваз вакцинадин цIийи партия хтанва, адакай 100 доза ишлемишнава. Икьван чIавалди 341 касдиз рапар янава, 2-рапар янавайбурун кьадар 240-далай виниз я. Рапар ягъунин карда медработникри, райадминистрациядин ва хуьрерин поселенийрин администрацийрин, образованидин организацийрин работникри, гьакIни пенсионерри активвал къалурзава.

Мукьвал йикъара ЦРБ-дин работникар ЦIийи Макьарал фена, агьалийриз коронавирусдин аксина рапар яна. Районда хаталу азардин аксина рапар ягъун давам жезва.

2020-йисуз райондин агропромышленный комплексдин карханайри тухвай кIвалахдикай Коллегиядин заседанидал райондин хуьруьн майишатдин управленидин начальник Мегьамедзагьид Бабаева гьахъ-гьисаб авуна. Ада къейд авурвал, эхиримжи йисара районда АПК йигин еришралди вилик фена, и кардик инвесторри тешкилнавай карханайрин еке пай ква. Районда КФХ-рихъ, кьилдин арендаторрихъни хъсан нетижаяр жезва.

2020-йисуз районда хуьруьн майишатдин хиле 3916,471 миллион манатдин къимет авай продукция гьасилна. Кьилди къачуртIа, 5730 тонн техил, 19330 тонн емишар, 14396 тонн ципицIар кIватI хъувуна. Вири хилерай кIватI хъувур бегьер 2019-йисандалай артух хьана.

Районда АПК-дин кар алай хилер тир багъманчивал ва уьзуьмчивал иллаки йигин еришралди вилик физва, 2020-йисуз, план 80 гектар яз, 321 гектарда цIийи багълар кутуна, алай йисуз 1065 гектарда багълар кутун планламишнава. Багъманчивал вилик тухун патал аграрри субсидияр яз 77668 агъзур манат пул къачуна.

Районда 1662 гектар уьзуьмлухар ава. И хиле бюджетдин ва кьилдин ксарин пулунин еке такьатар эцигнава, уьзуьмчивилин чIехи майишатар тешкилнава.

Районда майвачивилел ЛПХ-яр ва арендаторар машгъул я. Алатай йисуз абуру 34807 тонн салан майваяр гьасилна. Районда теплицайрин майишатрин майданарни артух жезва. Алай вахтунда районда теплицайрин 13 майишат кардик ква, санлай абуру 11 гектардин майданар кьунва.

Районда малдарвални дурумлудаказ виликди физва. Районда малдарвилин махсус карханаяр ва КФХ-яр кардик ква, абурухъ 2548 ири карч алай ва 7711 гъвечIи карч алай гьайванар ава. Векьелрин участокда малдарвилин чIехи комплекс эцигзава, абур дагъдин маса зонайрани тешкилда.

М. Бабаева алава хъувурвал, 2020-йисуз хуьруьн майишатдин карханайри гузвай налогар кьве сеферда артух хьана.

Кардик квай хуьруьн майишатдин гзаф карханайри ва фермервилин майишатри государстводин тайин метлебдин программайра иштиракна. ИкI, кьве КФХ-ди «Начинающий фермер» программадай ва «Семейная ферма» программадай са майишатди грантар къачуна. 2020-йисуз райондин 20 майишатди къачур субсидийри 159570 агъзур манат тешкилзава.

Заседанидин сергьятра аваз хуьруьн майишатдин суьрсет гьасилзавайбурук секинсузвал кутазвай месэлайризни килигна. Абурукай сад дигидай яд тахьунихъ галаз алакъалуди я. ВацIара яд тIимил хьанва. Идахъ галаз алакъалу яз гзаф карханайра яд «стIал-стIал» гудай къайда кардик кутунва, цин гьамбарханаяр кьунва.

Заседанидал килигай АПК-дихъ галаз алакъалу месэладай райондин депутатрин Собранидин председатель Штибег Мегьамедханов, райадминистрациядин Кьилин 1-заместитель Лацис Оруджев, УОС-дин руководитель Фикрет Шерифов рахана.

Коллегиядин заседанидал яш тамам тахьанвайбурун патай тахсиркарвилер тахьун патал тухузвай кIвалахдикай КДН-дин ва ЗП-дин жавабдар секретарь Мегьамедвили Аминов, ОМВД-дин ПДН-дин старший инспектор Валерий Ибрагьимов ва райондин образованидин управленидин начальник Гьуьсейн Шихбабаев рахана.

Малум хьайивал, алатай йисуз яш тамам тахьанвайбурухъ галаз кIвалах тухудай комиссиядин 8 заседание кьиле тухвана, анрал административный 38 протоколдиз ва яш тамам тахьанвайбурухъ галаз кIвалах тухунин

рекьяй 26 месэладиз килигна, гьакIни яш тамам тахьанвайбурун патай тахсиркарвилер тахьун патал координационный совещание кьиле тухвана. Вири и рекьерай кIвалах давамни ийизва.

И месэладай общественный хатасузвал хуьнин рекьяй райадминистрациядин Кьилин заместитель Абуталиб Фатулаева алава рахунар авуна.

Коллегиядин заседанидин нетижаяр муниципальный райондин Кьил Нариман Абдулмуталибова кьуна.

Асият Мирзалиева,

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

9