Сив хуьнай - сувабар

1. Бухаридини Муслима Абу Гьурайрадилай Пайгъамбардин гафар агакьарна: «Къудратлу ва ЧIехи Аллагьди лагьана: Сив хуьнилай гъейри, амай вири амалар Адаман хци вич патал ийизва, гьакъикъатда ам Зун патал я, адай сувабни За гуда». Сив хуьн — им къалхан я. Сив хуьзвай вахтунда инсанди чIуру гафар лугьун тавурай, пис кIвалахривай яргъа хьурай ва сес хкаж тавурай. Нагагъ са ни ятIани адаз чIуру гафар лугьуз хьайитIа, я тахьайтIа, адахъ галаз кикIиз башламишайтIа, лугьурай: «Гьакъикъатда, за сив хуьзва!» Аллагь-Тааладал кьин хьуй, сив хуьзвай инсандин сивяй къвезвай ни Халикьдиз мискдин атирдилайни хуш я. Сив хуьзвайдаз кьве шадвал жеда: сив хкуддай чIавуз ва вичин Раббидихъ галаз гуьруьш хьайи юкъуз».

2. Бухариди агакьарнавай гьадисдин маса риваятда Пайгъамбарди Аллагь-Тааладин гафар ахъайна: «Зун патал лукIра тIуьн-хъун, вичин гьевесар тазва. Сив Зун патал хуьзва ва За адан гьакъиндай суваб гуда. Гьар са хъсан амалдай цIуд суваб жеда».

3. Муслима агакьарнавай гьадисдин риваятда Пайгъамбарди лагьанва: «Адаман хци авур гьар са хъсан кIвалах артух жеда, хъсан амалдай виридалайни тIимил яз цIуд суваб гуда, адай гьатта ирид виш кьван сувабарни гун мумкин я».

4. Тирмизиди агакьарнавай гьадисда лагьанва: «Сив хуьн жегьеннемдикай хуьзвай къалхан я».

5. Бухаридини Муслима Сагьл бин Са’далай Пайгъамбардин гьадис агакьарна: «Гьакъикъатда, женнетдиз «Ар-Раййан» лугьудай варар ава. Къияматдин юкъуз а варарай анжах сивер хвейибур гьахьда. Гьа чIавуз лугьуда: «Сивер хвейибур гьинава?» Сивер хвейибур вилик экъечIда. Абурулай гъейри, гьа варарай гьич садни гьахьдач. Абур гьахьайдалай кьулухъ варар агалда».

6. Агьмада, Лабараниди, Ибн Аби-д-Дунья-ди Умаран хва Абдуллагьалай Пайгъамбардин гьадис агакьарна: «Сив хуьни ва Къуръан кIелуни лукIран тереф хуьда. Сив хуьни лугьуда: «Я Аллагь, за ам тIуьникайни бедендин къизгъин гьевесрикай хвена, гьавиляй зи шафаат кьабула». Къуръанди лугьуда: «За ам йифен ахварикай магьрумна, кьабула зи шафаат». Ахпа абурун тIалабунар кьилиз акъудда» (Гьаким).

7. Байгьакъиди, ТIабараниди, Агьмада ва масабуру Саламат бин Къайсара ахъайнавай гьадис агакьарна: «Аллагьдин разивал къазанмишун патал са юкъуз сив хвейи инсан Ада жегьеннемдивай акьван яргъаз акъудда хьи, гьатта а мензил пехъревай вич хайи йикъалай кьуьзуь жедалди атIуз жедач».

8. Ибну Мажагьа Абу Гьурайрадилай Пайгъамбардин гьадис ахъайна: «Гьар са шейинихъ вичин михьивал ава. Бедендин михьивал сив хуьн я. Сив хуьн — сабурдин са пай я».

9. Якъин цIиргъ авай гьадис имам Агьмада ва Исфагьаниди Абу Гьурайрадилай агакьарна: «Аллагьдин разивал къазанмишун патал сив хвейи ва гьа юкъуз кечмиш хьайи кас женнетдиз фида».

10. Гьузаймади ва Насаиди Абу Усаматалай агакьарна: «За Пайгъамбардиз лагьана: «Эй Аллагьдин Расул! Заз са шей чира. Пайгъамбарди жаваб гана: «Вуна гзаф сивер хуьх, сив хуьнихъ галаз гекъигиз жедай затI авач».

И гьадисдин якъинвал Гьакима тестикьарна. Гьадисда мад лугьузва хьи, Усамата вичин суал кьве сеферда тикрар хъувуна ва Расулиллагьди вичин жаваб тикрар хъувуна.

Гьасан Амаханов, райондин имам