Меню
6+

Сетевое издание «Кюре»

17.05.2021 09:53 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ачух эфирда - важиблу месэлаяр

Райондин Кьил Нариман Абдулмуталибова ДР-дин Кьилин везифаяр вахтуналди тамамарзавай Сергей Меликован ачух эфирда къарагъарай месэлайрин гьакъиндай вичин фикирар лагьана.

Ада къейд авурвал, вичин ачух эфирда республикадин Кьили асул фикир дагъустанвияр социальный жигьетдай хуьн таъминаруниз гана. Ачух эфирда чкайрал вилик акъвазнавай гьялна кIанзавай са жерге важиблу месэлаяр къарагъардай, абур гьялдай рекьер жагъурдай, веревирдер ийидай, гьисабдай яз агьалийрилай къвезвай арзайриз, гьакI чи райондайни, килигдай мумкинвал гана.

Чи райондин агьалийрин арзайра яшайишдин са жерге месэлаяр гьялунин карда куьмекар гунин тIалабунар авай.

Кьилди къачуртIа, республикадин Кьили Дагъустандин Минздравдиз Бутхуьряй тир инвалид Эрзиман Жарулаева ачух эфирда вичиз герек тир «Бараклюд» дарман таганвайдан гьакъиндай авур арза кьве йикъан къене кьилиз акъудунин тапшуругъ гана. Гьа са вахтунда райондин больницадин кьилин духтурди къейд авурвал, и начагъ касди гьар вацра «Бараклюд» препаратдин 2 упаковка къачузвайди я. Гьа са вахтунда ихьтин са упаковка са вацра ишлемишун патал бес жезвайди я. И препарат махсусди хьуниз килигна ам къачун патал торгар малумарун геж хьана, яни ам хтун геж хьана. Ада Минздравдиз ва республикадин Кьилиз са варз вилик арза авунвай, нетижада начагъда 2 гьафтедин идалай гуьгъуьниз а препарат къачунва.

Ачух эфирдин вахтунда гьакIни ЦIийи Мамрач хуьр тIебиатдин газдалди таъминарунин месэлани къарагъарна. А карни къейд ийиз кIанзава хьи, хуьре 400 хизан ава, 30 йисан вилик арадал атанвай и хуьруьз официальный статус анжах 2015-йисуз ганва. Ана яшайишдин инфраструктура зайиф я. Гьа гьисабдай яз школа, аялрин бахча, ФАП ва клуб авач. И хуьруьн са жерге месэлаяр гьялиз алакьна. Кьилди къачуртIа, аялар школадиз тухун патал автобус чара авунва. Хуьре школа, аялрин бахча, ФАП эцигун патал ва гьакIни сурариз чилин участокар чара авунва. Хуьруьн саки вири куьчейра херхем вегьенва, экверин пуд трансформатордин подстанцияр эцигнава. Бетондинни ракьун 30 даяхар (столбаяр) акIурна са километрдиз экверин линиярни тухванва. Хуьр хъвадай ва дигидай целди таъмин я.

Гьа са вахтунда къенин йикъалди агьалияр патал тIебиатдин газдалди таъминарунин месэла четинди яз ама. Газ тахьуни ва ара-ара эквер хкахьуни агьалийрин патай гьахълу наразивилерни арадал гъизва. И гьал фикирда кьуна, муниципальный райондин такьатрин гьисабдай гьеле са шумуд йисан идалай вилик хуьруьз мукьва 3,8 километрдин мензилдиз юкьван давление авай газдин линиярни гъанва. Меценатрин такьатрин гьисабдай гьеле 2015-йисуз проектдинни сметадин документацияни гьазурнава. Адакни са бязи дегишвилер кухтуна кIанзава.

Бес кьадар пулунин такьатар тахьун себеб яз чавай хуьруьн къене кьванни газдин линияр тухуз хьанвач.

И месэлайрай республикадин министерствойриз ва ведомствойриз рекье твазвай чи арзаяр, чарарни фикир тагана амукьзава.

Маса муниципалитетра хьиз, гьялна кIанзавай месэлаяр чи райондани гзаф ама. Иллаки хцидаказ акъвазнавай месэлайрикай сад чкIидай гьалда авай социальный объектар я. И четинвилеризни килиг тавуна, район галай-галайвал, ян тагана виликди физва. Чаз чи агьалийри гузвай тапшуругъар кьилиз акъудзавай гьалдин гьакъиндай муниципальный векилвилерилай къецяй гузвай жавабар, гъавурда тунин меслятар важиблу я. Ихьтин ачух ва

гегьенш рахуни (диалогди) чаз чна кьилиз акъудзавай кIвалахрин дуьзвал гекъигдай, экономикада, яшайишдин жигьетдай тухузвай кIвалахра дегишвилер твадай мумкинвал гузва. И карди чак санлай кIвалахда ашкъи-гьевес кутазва ва жавабдарвал хкажзава.

Чаз, бюджетдинбурулай къерехдин такьатар желб авуналди, «Комплексное развитие сельских территорий РД» госпрограммада иштирак авун теклифзава. Исятда чаз вилик эцигнавай месэлаяр гьялдай мумкинвилер жеда.

- Сергей Меликоваз Дагъустан вичи-вич таъминардай, виликди фенвай, цуьк акъуднавай региондиз элкъвена кIанзава, — къейд авуна райондин Кьил Нариман Абдулмуталибова.

Гьазурайди – А. Камилов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1