Чи хуьруьнви - игит

КуькIуьра шем кьейибурун,

Чпин уьмуьрни гьайиф татайбурун гьуьрметдай!

Чпин чанар гайибурун, эхирдал кьван кIанивилин дад такурбурун,

Чун бедбахтвиликай, инсанрин вилин накъварикай

Чпин беденралди хвейибурун!

И. Михалевич

Лугьуда хьи, игитар рекьидач, абурун кьегьалвилер рикIелай фидач, абур асирра амукьда. Игитри чпин кьегьалвилералди чун «…дяведин гьунарриз, яратмишунриз ва зегьметдиз» руьгьламишзава. Дугъриданни, гьакI я. Чна Ватандин ЧIехи дяведин къагьриманар гьуьрмет авуналди рикIел хуьзва. Анжах нивай фикирдиз гъиз жедай, ихьтин миллионралди инсанар тергай къанлу дяведилай гуьгъуьниз, бязибурувай уьмуьрдиз къимет гуз жедач, абуру чинеба, иблисвилелди чпин уьлкведин ислягь агьалияр ягъиз рекьида лагьана «диндин инанмишвилелди».

Гьа ихьтин къанлуйривай – вагьшийривай чун хуьзва халисан игитри-къанун-къайдадин къуллугъда акъвазнавай работникри, Нурбагьандов Мегьамед Нурбагандович хьтин, ислягь зегьметдин кьегьалри –мешебиги Батманов Зейнудин хьтин, чпин чандилайни гъил къачуна «кузвай точкайрай”репортажар ракъурзавай журналистри.

Чна садрани ,ислягь агьалияр террористривай хуьдайла, кьегьалвилелди телеф хьайи чи хуьруьнви Алибеков Ржаб Абумислимович рикIелай ракъурдач.

Терроризм, экстремизм…Гьикьван къурхуллу гафар я ибур! Ислягь инсанриз ийизвай къансузвилер, зидвилер акурла, абурукай ван хьайила, чIарар цаз-цаз жезва. Гьикьван бедбахтвилер, дерт-гъам гъизва абуру чи уьмуьрдиз! Гьикьван аялар, дишегьлияр, кьуьзуьбур ва маса инсанар, чпин ислягь уьмуьр кечирмишзавай, тергна абуру! Гена хъсан хьана, террордалди къурху гуз, кичI кутаз тежедай, чанарни эцигна гьукуматдин ва халкьдин вилик чпин буржи тамамарзавай , бязи вахтара барабарсуз дяведа 21-асирдин «чIулав тIегъуьндихъ» галаз женг тухузвай инсанарни аваз!

Зи хайи ЦIийи Макьарин школадин дегьлизда виридаз аквадай чкадал «Кьегьалвилин ва игитвилин чешне» стенд куьрсарнава. Ам чи хуьруьнви- игит Алибеков Ржаб Абумуслимовичаз багъшнава.

ЦIийи Макьарин школада гьар йисуз классдин сятер, классдилай къеце мярекатар, кьегьалвилин тарсар кьиле тухузва. Терроризмдихъ галаз женгина рейсадвилин юкъуз, Ватандин игитрин юкъуз. Абур вири Алибеков Ржабаз бахшзава, ва аялар экстремизмдиз, терроризмдиз акси яз тербияламишунин сергьятра аваз тухузва. Фикирзава, чи районда гзафбуруз кьейидалай кьулухъ Кьегьалвилин ордендиз ( орден Мужества)лайихлу хьайи Алибеков Ржабакай хабар авач. Умудзава, чир хьайила, райондин муаллимри чи хуьруьнвидиз талукьарнавай кьегьалвилин тарсар тухуда.

Алибеков Ржаб 1969-йисан августин 16-августдиз Сулейман-Стальский райондин ЦIийи Макьарин хуьре гзаф аялар авай рабочий хизанда дидедиз хьана. Бубади гзаф йисара Бакудин нафтIадин мяденра кIвалахна. Дидеди «Зардиянский» совхозда зегьмет чIугуна. Алибеков Ржаб хизанда ирид лагьай аял тир. Ада ЦIийи Макьарин школада лап хъсан къиметар аваз кIелна, спортдал машгъул хьана, школадин, хуьруьн общественный уьмуьрда активныйдаказ иштиракна. Алибеков Ржаб мураддихъ ялдай, жавабдар ученик, коллективист тир. Муаллимрини ам гьахьтинди яз рикIел хкизва. Школа акьалтIарна, ам 1987-йисуз Московский областдин Мытищи шегьердин кооперативный институтдиз гьахьна. Ада Московский областдин Подольск шегьерда Яракьлу Кьушунрин ракетный частара къуллугъна. 1998-2008-йисара ада Дербент шегьерда ГОВД-да сифтедай участковый яз, ахпа милициядин майордин чинда аваз къуллугъна. А чIавуз адаз вичин къуллугъдин везифайрив гьахъисагъвилелди эгечIунай Гьуьрметдин Грамота ганвай. Ржабаз вичин хизан, велед гзаф кIандай. Ам вичихъ галаз къуллугъзавайбуруз халисан юлдаш тир. Пакамалай няналди вичин кIвалахдин чкадал, къуватар, сагъламвал гьайиф татана, жедай. Вични ана жезвай вири крарикай аяндар тир. Абур чи республикада гзаф четин йисар тир. Боевикри кIвалер, машинар, базарар, суварик квайбур хъиткьинариз, терактар кьиле тухузвай. Ржабан мурад вичин халкьдиз секин, ислягь уьмуьр хьун тир, ам чи Ватанда ислягьвал жедайдахъ кIевелай инанмиш тир ва и кар патал ада вичелай алакьдай вири кIвалахар ийизвай. Адаз инсанри секиндиз чпин аялар чIехи авун, абуруз кIвалахдал, улакьда, музейриз, театрдиз физ къурху тахьун кIан тир. Вичихъ галай юлдашрин, мукьва-кьилийрин патайни адаз еке гьуьрмет авай. Диде-бубади адал дамахзавай.

2008-йисан юлдин вацра майор Алибеков Ржабав ва адан юлдашрив шегьердин (Дербент) 3-Интернационалдин куьчеда авай 20-нумрадин кIвализ НВФ-дин тайинар тавунвай кьве кас гьахьна лагьай хабар агакьна. А кIвале ислягь инсанар яшамиш жезвай. Тади гьалда террористар зарарсуз авун лазим тир. Хаталувилизни килиг тавуна, Ржаб бандитар авай кIвализ гьахьна. Абуру Ржабаз автоматдай гуьлле гана. Гуьллеяр адан хурухъ ва руфунихъ галукьна, ятIани кьегьалди террористриз гуьлле гун давамарзавай.

Ржабан куьмекдиз юлдашар атана ва абуру бандитар тергна. Анжах хирер гзаф заланбур хьана-кьегьал майор телеф хьана.

Россиядин МВД-ди Алибеков Ржаб телеф хьунин гьахъиндай ихьтин телеграмма ракъурнай: «…Россиядин МВД-дин вири составди санал дериндай хажалат чIугвазва. Вичин чан террористрихъ галаз дяведа эцигай женгинин юлдашдин къамат эбеди яз чи рикIера амукьда»

РФ-дин Президентдин Указдалди 2010-йисан 4-мартдиз Алибеков Ржаб Абумуслимовичаз «Кьегьалвилин орден» гана (кьейидалай кьулухъ). А чIехи награда (табагь) Ржабан чIехи стха Алибеков Алибегав Дагъустандин Республикадин къенепатан крарин министр Адилгерей Мегьамедтагьирова вахкана.

Эхь, гьакъикъатдани, игитар рекьидач. Ржаб амачиз цIикьвед йис алатнаватIани, агъзурралди хуьруьнвийри, къуллугъдин юлдашри ам дамахдивди рикIел хкизва. Ам чун патал терроризмдихъ, экстремизмдихъ галаз женг чIугунин кьегьалвилин, дирибашвилин чешне я.

Чун са уьлкве я. Са халкь.

Чиди рикIел хуьн,

Яшамиш хьун я. Абурун паталайни,

Вири крар ийиз, гьич ухшардини

(терроризм)

И крар тахьун патал.

Керимова Фейруза Ягибековна, ЦIийи Макьарин СОШ-дин тербиядин кIвалахдин рекьяй директордин заместитель