«Илимдиз кам» олимпиада – Вини СтIалдал

Адет хьанвайвал, олимпиада М. В. Ломоносован тIварунихъ галай МГУ-дин механико-математический факультетдин выпускник, технический илимрин доктор, профессор, ДР-дин ва РФ-дин илимрин лайихлу деятель меценат Абдул Гьажибалаевич Баламирзоеван регьбервилик кваз кьиле фена.

- Олимпиада цIи 14-сеферда кьиле физва, — лагьана чаз Абдул Гьажибалаевича. – Гьар йисуз олимпиада гьа са школада тухунни дуьшуьшдин кар туш, зун Вини СтIалрин юкьван школадин выпускник я. Сифте яз и серенжем 2006-йисуз тухванай ва ана гьа и школада 9-11-классра кIелзавайбуру иштиракнай. Кьве йисалай олимпиада тухунин карда заз куьмек гуз зи дустар – ДГУ-дин математикадин факультетдин ва М. В. Ломоносован тIварунихъ галай МГУ-дин механико-математический факультетдин выпускникар тир Аскер Ферзулаевич Аскеров ва Гьабибула Омарович Гьабибулаев эгечIна. Олимпиадада Вини СтIалрин, Кьулан СтIалрин, Агъа СтIалрин, гуьгъуьнлай маса районрин ва Махачкъаладин, Каспийскдин школайра кIелзавайбуру иштиракна. Коронавирусдин тIугъвал себеб яз 2020-йисуз олимпиада тухуз хьанач. Алай йисуз олимпиадада Сулейман-Стальский, Ахцегь, Дахадаев, Дербент, Докъузпара, Кьурагь, Мегьарамдхуьруьн, Хив, Табасаран районрин, гьакIни Дагъустандин Огни ва Дербент шегьеррин школайра 5-11-классра кIелзавай 340 аялди иштиракна.

Технический илимрин доктор, профессор Абдул Баламирзоева чаз алава хъувурвал, олимпиада тухуниз вичи гзаф йисара и проектдин тереф хуьзвай ва спонсорвал ийизвай Имам Яралиеван мергьеметлувилин «Умуд» фондуни ва Сулейман-Стальский райондин администрацияди еке куьмек гана.

Райондин Кьил Нариман Абдулмуталибова районда марифатдин, чирвилерин еке кIвалах тухунай, зигьин авай аялриз куьмек гунай, математикадай алакьунар авай кIелзавайбур дуьздал акъудунай, математикадин илим вилик тухунай Абдул Баламирзоеваз чухсагъул лагьана.

- ЦIукьуд лагьай сефер яз районда математикадай районрин арадинди тир олимпиада тухузва, — лагьана Нариман Абдулмуталибова. – Им меценат Абдул Гьажибалаевичан еке метлеб авай агалкьун я. Ам себеб яз марифатдин и проект вилик физва. Олимпиада тухунин куь теклифдин тереф Кьиблепатан Дагъустандин школайрин муаллимри ва кIелзавайбуру хуьзва, Квез гьуьрметзава. Сулейман-Стальский район алимралди, искусстводин ва илимдин деятелралди машгьур я. Куьне гъиле кьунвай кар чешне къачуниз лайихлу я. Идай чухсагъул лугьуналди, заз Куьн инанмишариз кIанзава хьи, и проект тешкилуниз ва кьиле тухуниз чна къенлай кьулухъни куьмекда.

ЦIукьуд лагьай тIварцIин олимпиададин умуми нетижайрай гъалибчияр ва призерар Дербентдин школайрин кIелзавайбур хьана.

Олимпиадада 1-чка гьакIни ЦIийи поселокдин юкьван школадин 9-классдин ученик, математикадай республикадин ва Вирироссиядин олимпиадайрин гъалибчи ва призер Шамиль Тагьировани кьуна.

Олимпиададин вири гъалибчийриз ва призерриз «Умуд» фондунин патай грамотаяр, пулунин сертификатар гана.

Идалайни гъейри, олимпиададиз аялар гьазурай 8 муаллимдиз гьардаз 2000 манат пул ва сертификатар гана.

«Умуд» фондуни Гьабибула Гьабибулаеван лайихлувилерни къейдна.

Илимрин доктор, профессор Абдул Баламирзоеван дустарин пулунин такьатрин гьисабдай 17 школьник 1-дережадин дипломралди ва 2,5 агъзур манатдин пулунин премийралди, 9 школьник 2-дережадин дипломралди ва 1500 манатдин пулдин премийралди, 16 школьник 3-дережадин дипломралди ва 1000 манатдин пулдин премийралди, гьакIни 20 кIелзавайди грамотайралди ва 500 манатдин пулдин премийралди къейдна.

Агалкьунар мубарак авуналди, райондин Кьил Нариман Абдулмутали-бова,гьакIни «Умуд» фондунин векил Савин Велиева, райондин образованидин управленидин начальник Гьуьсейн Шихбабаева ва жавабдар маса ксари гъалибчийрив ва призеррив дипломар, сертификатар ва пулдин призар вахкана.

Текст кхьейди ва шикил ягъайди Хазран Кьасумов я