Меню
6+

Сетевое издание «Кюре»

17.05.2021 09:57 Понедельник
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Медениятдиз бахш авур уьмуьр

Гъетягъ Вадим (Жамалдинов Вадим) 1941-йисан 4-майдиз Азербайжан Республикадин Къарадагъ райондин Пута поселокда нафтIадин мядендин рабочийдин хизанда дидедиз хьана. Ватандин ЧIехи дяве башламиш хьайи са йисалай, 1942-йисуз, дах Жамалдин хизанни галаз хайи хуьруьз Уллу-Гъетягъиз хтана. 1942-йисан сифте кьилерай дах гуьгьуьллудаказ Кьасумхуьрелай дяведиз фена. 1942-йисан сентябрь-октябрь варцара гел-галачиз квахьна лагьай чар хтана.

Диде Гьамидова Минехалум 3 аялни галаз хуьре амукьна. Санайни куьмек авачир дидеди аялар кьиникьикай хкудун патал хуьре варлуйриз кIвалахар ийиз хьана. Хуьруьн колхозда ва школада уборщица яз кIвалахна.

ЦIайлапанар ягъиз марф къвадайла, мичIи йифиз кичIела Вадиман гъилни кьуна къавуз кул гуз фидай. Школадай къвезвай мажиб аялар хуьн патал бес жезвачир. Гишила амукь тавурай лагьана дидеди кIвале авай багьа шейэр ужуз къиметрай гана. Гудай затI амачирла, 2-мертебадик квай гурар хкудна маса гана. Кьвед лагьай мертебадиз килигдай мумкинвал тежез, винел алай кIвалер чкIана, чилин кIвалер амукьна.

Мектебда кIелдай вахтарилай башламишна адан рикI шикилар чIугунал, шиирар кхьинал алай. Вадиман сифте шиир «Къайи хабар» И. В. Сталин кьейи йикъаз талукь яз кхьенай. «Дуствал» альманахдиз акъатай сад лагьай шиир «Ленин» я. Хуьре школа куьтягьай Вадим дидедихъ галаз вичин багърияр авай Герейханован хуьруьз куьч хьана. Гьа йисуз Вадим Жамалдинов Небит-Дагъ шегьердиз фена, ана геологоразведкада рабочийвиле кIвалахал акъвазна. 1962-1963-йисара Донецкий областда шахтада кIвалахна. Дидедин кефсузвилиз килигна анай хтана.

Герейханован сельсоветда кассир-счетовод яз кIвалахна. Са йисалай Махачкъалада вагонрин депода стропольщиквиле акъвазна. Ина адакай цлан газетдин художникни хьана. 1965-1968-йисара Советрин Армиядин жергейра Севастополь шегьерда гьуьлерин флотда къуллугъна. Ина «Ватандин пайдах» газетдин военкорвилин школани акьалтIарна, цIудралди макъалаяр газетда чапна. Адан «Руьгь – муьрхъ» макъалади кIелзавайбур вичел желбна.

1968-йисуз армиядай хтай Вадим Жамалдинов ДГУ-дин филологиядин факультетдик кIелиз экечIна. Кьасумхуьрел «Коммунизмдин гатфар» газетда корректор яз кIвалахна. 1970-йисуз Сырдарьинский областда сифте художниквиле, гуьгъуьнлай чкадин радиостанциядин начальниквиле зегьмет чIугуна. Ульяновский, Актюбинский, Оренбургский, Саратовский областра эцигунардайбурун бригадир хьана.

1977-йисалай Кьасумхуьруьн КБО-да мастер, 1979-1984-йисара Герейханован хуьре яшайишдин рекьяй къуллугъдай кIвалин заведующий, 1984-йисалай Хивда райбыткомбинатдин директор хьана. 1988-йисалай Сулейман-Стальский ОНО-да инженервиле кIвалахна.

1965-йисалай прессадихъ галаз алакъа хуьзва. Адан макъалаяр, шиирар «Лезги газет», «Куьредин хабарар» газетриз, «Самур», «Кард» журналриз акъатзава. Ам Россиядин журналистрин Союздин, лезги писателрин Союздин, «Куьредин ярар» культурадин центрадин член я. Адан тIвар «Лезги зарияр», «Куьредин ярар» ва маса кIватIалра гьатнава. Хейлин шиирриз манияр кхьенва. Адан 3 ктаб: «Гъетягърин булахар», «Гьижрандин лепе», «Хайи лувар» чапдай акъатна. Алай вахтунда «Гъетягъар ва гъетягъвияр» тарихдин ктаб ва шииррин ктаб гъиле ава.

Вичин 80 йисан юбилей рикIин сидкьидай мубарак авунихъ галаз санал,чаз къелемдин стха, бажарагълу шаир Вадим Жамалдиновахъ (Гъетягъ Вадимахъ) чандин мягькем сагъвал, руьгьдин кIубанвал, яргъал тир уьмуьр, яратмишунрин рекье мадни еке агалкьунар хьана кIанзава.

Газетдин редколлегия,

ЛПС-дин райондин отделение

Илгьамдин кукIушрал

Сегьер, сегьер экъечIзавай ракъинин,

Нурар хьтин хкаж хьана Шалбуздал.

Лампади хьиз экв гузавай шиирри,

Лезги чилел булахрикай сад я вун.

Илгьамдикай пай гана ваз Эминан,

Багьа къаш хьиз, шад я къе чаз, вун акун.

Дережаяр хкаж хьана мад кьакьан,

Шииратдин лувараллаз хьурай вун.

Лув це, шаир, мадни кьакьан цавариз,

Акурай чаз цIелхемар гьар шиирдин.

Зур къалурдай шиирралди душманриз,

Лезги чилел дамахариз шад я вун.

Гьар шиирдихъ вичин кьетIен дад авай,

Дагъдин лекь хьиз хкаж хьанвай цавариз.

Шииратдин шегьре рекье гад авай,

Мадни лув це, Ханбиче вах, яргъариз.

Ви шиирри ван авурай чуьнгуьрди хьиз,

Чи таватри кьуьлердайвал, Ханбиче.

Лезги халкьдин сирер садав агудиз,

Чархачи хьухь гьамишанда, Ханбиче.

Ша дагълариз

Михьи гьава, къацу чуьллер,

Бул яйлахар, шад я эллер.

Гьар са дагъдин кукIвал хуьрер,

Илиф дустар, ша дагълариз.

Гьар булахда гьамгадин яд,

Шуьрбетдилай ширин я дад.

Ша мугьманар, квел я чун шад,

Девлет ава чи дагълара.

Гьуьрмет-хатур хуьрер авай,

Камаллуяр кьиле авай.

Шад межлисар кIвалеравай,

Азиз дустар, ша дагълариз.

Куьн атунал шад жеда чун,

Мукьвал жеда луькIуьн-рахун.

Чи девлетар куьн я атун,

Ша мугьманар, чи дагълариз.

Гьар са касдин мецел ширин,

Девлет ала чи дагъларин.

Ширин сесер къвез рушарин,

Илиф лугьуз чи дагълариз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3