Меню
6+

Сетевое издание «Кюре»

17.05.2021 09:50 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«Михьи район» акция – тешкиллувал аваз

Вахтуниз санал акъвазун хас туш, тIебиатдин къанун тирвал, ада гьамиша виликди еримишда.

Ингье, йисан виридалайни гуьзел вахтарикай сад тир гатфарни вичин ихтиярда атнава, кьуд пад къацу хьанва, тарар цуьквери кьунва. Ида гьар са касдин гуьгьуьларни шадарзава. Вири и хъсан крарихъ галаз санал, чаз михьивал, дуьзмишвал, гуьрчегвални герек я. Гьа и кар фикирда кьуна, 24-апрелдиз районда, Вирироссиядин субботникдин сергьятра аваз, «Михьи район» акцияни кьиле тухвана.

И йикъан пакаман сятдин 8-даз Кьасумхуьрел алай пуд мертебадин административный дараматдин вилик чал райадминистрациядин архитектурадинни эцигунрин ва ЖКХ-дин отделдин начальник Виталий Алисенов, адан заместитель Мустафа Мустафаев гьалтна.

- «Михьи район» акция тухун патал райондин Кьил Нариман Шамсудинович Абдулмуталибован тапшуругъдалди и юкъуз тухудай кIвалахар тайинарнава ва гьар са участокдихъ райадминистрациядин жавабдар работникар галкIурнава, — лагьана чаз Виталий Алисенова. – Чаз акурвал, райцентрадал гзаф идарайрин работникри чпин территорийра михьивилер авунин кIвалахар пакамахъ лап фад башламишнава. Чун кIевелай инанмиш я хьи, районда акция хъсан тешкиллувал ва махлукьатдин активвал аваз кьиле фида.

Чун, райондин Информагентстводин векилар, Виталий Алисеновахъ ва Мустафа Мустафаевахъ галаз организацийринни идарайрин работникри субботникда иштиракзавай чкайрал фена, абуру ийизвай кIвалахрихъ галаз таниш хьана. Чаз акурвал, райадминистрациядин, «Касумкентсервис» ООО-дин, почтадин, «сельсовет Касумкентский» АСП-дин, «Куьредин хабарар» газетдин редакциядин, КЦСОН-дин работникри чпин территорийра хейлин кIвалахар тамамарнава, михьивилер авунва.

Гзаф инсанар пуд мертебадин административный дараматдин территорияда михьивилер авунин къайгъуйрик квай. Аквазва: тарарин, кул-кусрин пунариз пер, танариз киреждин къаришма янава, анагар герек авачир векьерикай, кьаларикай михьнава.

16-нумрадин аптекадин работникри дараматдихъ галай гегьенш участок векь-кьалдикай михьнава, са къерехдихъ абуруз цIай янава.Са шумуд кас ана цанвай къелемриз яд гунал машгъул тир.

- Малум тирвал, михьивал сагъламвилин замин я, — лугьузва аптекадин заведующий Ильяс Эмирбекова. – Гьавиляй чи работникри гьафтеда са сеферда субботникар тешкилзава. Къе лагьайтIа, чна «Михьи район» акцияда гуьгьуьлар шад яз иштиракзава.

«МФЦ»-дин идарадилай УСЗН-дин дарамат галайвал фенвай куьчедин къерехра михьивилер авунин кIвалахрал райондин Жегьилрин парламентдин членар машгъул тир. Жегьилри кIвалахни ашкъи-гьевес кваз ийизвай. Аквазва хьи, са бязи дараматрин цларин кIанер чумурри, герек авачир векьер-кьалари кьунва.

- Куьне кьатIайвал, и участок чIуру гьалда авай, гьавиляй ана къайда тун жегьилри чпин хивезни къачуна, — лагьана чаз нажахдалди экверин столбадин кIане экъечIнавай чумуррин чIехи вал атIунал машгъул тир Жегьилрин парламентдин председатель Фарид Девлетханова. – И участокда чи парламентдин 20 членди кIвалахзава, са шумуд касди маса идарайрин работникриз субботникда куьмекар гузва. За райондин вири хуьрерин жегьилризни ихьтин субботникра, маса мярекатра иштиракуниз, хуьрера михьивилер авунин ва хуьнин крарик пай кутуниз эвер гузва.

Кьасумхуьруьн 1-нумрадин юкьван школада чIехи классра кIелзавайбур центрадал алай СтIал Сулейманан парк-скверда михьивилер авунал машгъул тир. Чаз акурвал, абуру и кIвалах саки акьалтIарнавай.

Райондин 1-нумрадин ДЮ-СШ-дин, Центральный библиотечный системадин, аялрин яратмишунрин КIвалин (инал за чун фейи идарайрин тIварар кьунва) работникрини «Михьи район» акцияда активвилелди иштиракзавай.

ЦIийи хуьруьн кIанихъ, Агъа СтIалрин хуьрерин территориядал, Ватандин ЧIехи дяведин иштиракчийриз эцигнавай обелискдин комплексдал школьникри михьивилер авунин, дуьзмишунин рекьерай тухузвай кIвалахар акурла, чи гуьгьуьлар мадни шад хьана.

- Дяведин йисара чпин чIехи бубайри къалурай кьегьалвилер рикIелай ракъур тийизвай, абурун руьгьериз гьуьрметзавай чи школьникриз аферин ва баркалла, — лагьана Виталий Алисенова.

Чаз малум хьайивал, обелискдин комплексдал субботникдин юкъуз михьивилер ийизвайбур ЦIийи поселокдин юкьван школадин 7-«а» ва «б» классра кIелзавайбур тир.

- Чи школади и обелискдин комплексдал шефвал тухуз гзаф йисар я, — лагьана чаз школадин муаллим, райондин Собранидин депутат Мегьамед Эмирбекова. – Къенин субботникдикай рахайтIа, школадин чIехи классра кIелзавайбуру школадин территорияда михьивилер авунин кIвалахар тухузва, кьве класс обелискдин комплексдал атанва. Къе-пака чи халкьди Ватандин ЧIехи дяведа Гъалибвилин 76 йис тамам хьунни къейд ийида. Гьавиляй заз лугьуз кIанзава хьи, обелискдин комплекс гьар юкъуз михьидаказ, къайдада аваз хуьн чна чи буржи, намусдин кар яз гьисабзава. И кар школьникрини гьиссзава. Ихьтин серенжемри кIелзавайбур зегьметдал рикI алаз, ватанпересар яз вердишаруниз ва тербияламишуниз екедаказ куьмекзава.

Са гафуналди, чун фейи чкайра субботникдин кIвалахра организацийрин, идарайрин коллективри, анрин руководителар кьиле аваз ва райадминистрациядин жавабдар работникрин гуьзчивилик кваз, активвилелди иштиракна, михьивилер авунин, аваданламишунин ва маса кIвалахар тамамарна.

Гьакъикъатдани, вичиз гьахълудаказ камалэгьлийринни арифдаррин, алимринни шаиррин, халис зегьметкеш инсанрин макан лугьузвай Сулейман-Стальский районда чпин гъвечIи ватандихъ, адан гележегдихъ рикI кузвай инсанар яшамиш жезва. И кар чаз абуру «Михьи район» акцияда иштиракай тегьерди мад сеферда къалурна.

Текст кхьейди ва шикилар ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

0