Обелиск – цIийи къаматда

И кIвалахар зегьметдин ветеран тир чи хъсан таниш Загьидин Жамалдинович Тажибован гуьзчивилик кваз тухузвай.

- Чи хуьре «Зи хайи хуьр НуьцIуьгъар» тIвар алаз общественный тешкилат кардик кваз са шумуд йис я, тешкилатдин Советдин председателни зун я, — лагьана чаз З. Тажибова. – Советдин членрин кьадар 30 касдив агакьзава. Абурун арада райондилай къеце яшамиш жезвай, жавабдар къуллугърал кIвалахзавай нуьцIуьгъвиярни ава. Тешкилатдин асул везифаяр, гуьгьуьллу ксаривай, спонсорривай пулунин такьатар кIватIна, хуьре рекьер, куьчеяр, сурар, булахар къайдадик кутуникай ва мергьеметлу маса кIвалахар авуникай, четинвиле гьатай хизанриз, ксариз алакьдай куьмекар гуникай ибарат я.

Чаз Загьидин Жамалдиновича обелискдал тухузвай кIвалахрикайни суьгьбетна. Малум хьайивал, Ватандин ЧIехи дяведин йисара НуьцIуьгърин хуьряй 72 кас фронтдиз фена. Рагьметдиз фенвай ветеранрин руьгьериз гьуьрмет авунин лишан яз и тешкилатдин членри хуьруьнвийривай 75 агъзур манат пул кIватIна, обелискдин территорияда 46 квадратный метрдин майданда цементдинни къумадин къаришма цана, адан винелай плитаяр туна. Обелискдин патарив туядин ва маса жинсинин 32 къелем цана. И кIвалахар «Зи хайи хуьр НуьцIуьгъар» тешкилатдин членри ва хуьруьн юкьван школада чIехи классра кIелзавайбуру тамамарна. Школьникар обелискдихъ гелкъвенни ийизва.

Чаз акурвал, обелиск цIийи къаматдиз хканва. Адан патарив са шумуд тарни гва. Обелискдал дяведин иштиракчияр хьайи вири нуьцIуьгъвийрин тIварар кхьенва.

Обелиск элкъвена ракьун жугъунда тунва, адан вилик патал «1941-1945» рекъемар кхьенвай къайдадик кваз атIанвай ракьун кIусарни алкIурнава. Загьидин Тажибова чаз лагьайвал, обелискдал дуьзмишунин кIвалахар тухуниз спонсоррини 25 агъзур манат пул гана.

НуьцIуьгъвийри баркаллу крарик кьил кутазвай Загьидин Жамалдиновичаз, Советдин вири членриз, спонсорриз ва обелискдихъ гелкъвезвай школьникриз чухсагъул лугьузва.

Текст кхьейди ва шикил ягъайди Хазран Кьасумов я