Баркаллу рекье

90 йис газет патал гъвечIи уьмуьр туш. Девирар, вакъиаяр къвез алатна, къудратлу гьукуматарни кваз вахтунин цIа кана. Амма абурукай райондин халкь хабардар авур газет, ажалсуз феникс къуш хьиз, вири басхасрай саламатдиз акъатна, вичин баркаллу юбилейдихъ агакьнава. Ам хатадай хьайи кар туш — вири 90 йисан муддатда чи багъри газетдин далудихъ къадирлу халкь хьана, кьиле — кар алакьдай регьберар, халисан пешекарар! Бинеда лагьайтIа — вичин тIвар чи райондал алай камалэгьли СтIал Сулейман!

Сулейман бубадин гьар са жавагьирди аршдиз лув райондин газетдин чинрилай гана. Ам чидай, адахъ галаз гьа йисара кIвалахай инсанрин рикIел хкунрай аквазвайвал, гзаф кIандай адаз багъри газет, ашкъиллудаказ иштиракдай адан кIвалахда.

Гьикьван ганва чи районди республикадиз, уьлкведиз бажарагълу гафунин устадар! Абуру вирида чпин сифте камар райондин газетдилай къачуна. И кардини адан важиблувал ва гереквал къалурзава.

2001-йисалай газетдиз цIийи тIвар ганва, "Куьре" гаф авай тIвар. Ида газетдин къуллугъчийрин вилик цIийи месэлаяр эцигзава — неинки са чи, гьакI къваларив гвай районрин агьалийризни багъривал авун!

Вири вичин баркаллу рекье "Куьредин хабарар" газетди культурадиз талукь месэлайриз чIехи фикир ганай. Къенлай кьулухъни гьакI жедайдахъ чна инанмишвал ийизва.

За жуван, райондин культурадин вири работникрин патай квез алукьзавай юбилей мубаракзава. Газетдиз бахтар тIалабдай адет туш — за квез кIелдайбурун кьадар гзаф хьун тIалабзава. КIелдайбуруз чпиз, играми районэгълиириз, — чIехи тир бахтар!

Майрудин Бабаханов, райадминистрациядин культурадин отделдин начальник, ДР-дин халкьдин шаир