Гьазурлухвилин гьал ахтармишна

Райондин Кьил Нариман Абдулмуталибован председателвилик кваз кьиле фейи совещанидал ЖКХ-ди алатай йисан зулунни хъуьтIуьн вахтунда авур кIвалахдин нетижаяр кьуна ва 2021-2022-йисарин чими ийидай сезондиз гьазурвилер акунин месэладиз килигна.

И месэладай АС-дин ва ЖКХ-дин отделдин начальникдин заместитель Шихзагьир Гьажимурадов рахана. Ада къейд авурвал, хуьрерин вири поселенийра агьалияр, образованидин, культурадин ва маса социальный объектар эквералди, газдалди, чимивилералди таъминарунин рекьерай герек вири кIвалахар кьилиз акъудна. Медицинадин 40 объектдикай анжах 23 объектдиз газ тухванва, амай объектар пичера цIай хъийидай кIарасралди таъминарна. Анагар газдалди ва эквералди таъминарун патал хуьрерин территорийра экверин линияр, 170-далай виниз газдин шкафар ремонт хъувуна, КТП-яр эцигна.

Рекьер ремонт хъувунин ва къайдада аваз хуьнин рекьерай райондин 32-нумрадин ДЭП-дини тайин кIвалах тухвана…

Совещанидал алай месладай чпин фикирар ва теклифар гваз Кьасумхуьруьн ва Герейханован АСП-рин кьилер тир Далгат Бабаев ва Руслан Алдыров, УМИЗ-дин директор Назир Гьасанов, КIварчагърин АСП-дин кьилин заместитель Рашид Эседулаев, райадминстрациядин финансовый отделдин начальник Магелан Рагьимов, ЕГС-дин старший мастер Славик Зейдулаев, Кьасумхуьруьн РЭС-дин кьилин инженер Марат Шамхалов, ДЭП-дин начальник Икзам Бремов ва маса юлдашар рахана.

Кьилди къачурт1а, РЭС-дин кьилин инженер М. Шамхалова лагьайвал, агьалияр атIунар авачиз эквералди таъминарунин рекьяй вилик хъувуна кIанзавай месэлаяр гзаф кума. Абурни федеральный ва республикадин дережада гьялун чарасуз я. Умуд кутаз кIанзава, Гьукуматдин ва Россетдин куьмекдалди чавай и месэлаяр гьялиз алакьда.

Совещанидин нетижаяр райондин Кьил Нариман Абдулмуталибова кьуна. Анал килигай месэлайрин важиблувал къейд авунихъ, кимивилер ва гьял тахьанвай месэлаяр къалурунихъ галаз санал, райондин Кьили талукь къуллугъриз 2021-2022-йисарин зулунни хъуьтIуьн сезондиз гьазурвилер акунин жигьетдай тухудай серенжемрин план туькIуьрунин тапшуругъни гана.

Асият Мирзалиева,

Хазран Кьасумов