Меню
6+

Сетевое издание «Кюре»

21.05.2021 15:13 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Рамидин Къазимегьамедован турнир

Алай йисан 16-майдиз Сулейман-Стальский райондин ЦIийи Макьарин хуьре са шумудра Дагъустан Республикадин ва Россиядин чемпион, 4 сеферда Европадин ва 4 сеферда дуьньядин чемпион, спортдин лайихлу мастер, 2001-2002-йисара «Россиядин лап хъсан спортсмен» тIварцIин сагьиб Рамидин Къазимегьамедован призар патал армрестлингдай (гъилер кьунай) республиканский турнир кьиле фена. Ам ЦIийи Макьарин хуьруьн поселенидин администрациядин куьмекни галаз райондин спортдин, туризмдин ва жегьилрин крарин рекьяй Комитетди тешкилнавайди тир.

Турнирдиз спонсорвал Рамидин Къазимегьамедован хизанди, ярар-дустари, «Новая Мака» алишверишдин кIвали авунвай.

Турнирда республикадин шегьеррайни районрай атанвай 100-дав агакьна спортсменри иштиракна. Абурун арада республикадин, Россиядин, Европадин ва дуьньядин чемпионарни призерар авай.

Мярекат ачухдайла тебрикдин келимаяр гваз спорткомитетдин директор Надыр Эфендиев, хуьруьн поселенидин администрациядин кьил Асамудин Къазиагьмедов, Россиядин лайихлу тренерар тир Малик Тагьирбеков, Мурад Идрисов, армрестлингдай 8 сеферда дуьньядин чемпион Абдула Эльдаров, къайдаяр авачир женгерай машгьур спортсмен Малик Муртузалиев ва маса юлдашар рахана.

Къизгъиндаказ кьиле фейи акъажунра 65 килограммдин заланвиляй жегьилрин арада дуьньядин чемпион Замир Бабаева (Сулейман-Стальский район), 80 килограммдин заланвиляй дуьньядин чемпион Агьмад Къурбанова (Сулейман-Стальский район), 95 килограммдин заланвиляй спортдин мастер Аким Абдулаева (Табасаран район) ва 95 килограммдилай виниз тир заланвиляй Балабег Къарабекова (Сулейман-Стальский район) 1-чкаяр кьуна.

Турнирдин эхирдай спортсменри абсолютный категориядай акъажунар тухвана. 17 спортсмендин арада Агьмад Къурбанов гъалиб хьана.

Республиканский турнирда 1, 2 ва 3-чкаяр кьур спортсменриз медалар, кубокар, пулдин призар ва райондин спортдин, туризмдин ва жегьилрин крарай Комитетдин директор Надыр Эфендиеван къулар алай талукь дережайрин дипломар гана.

Надыр Эфендиева чаз лагьайвал, спортдин лайихлу мастер Рамидин Къазимегьамедован призар патал ЦIийи Макьарал республиканский турнир гьар йисуз кьиле тухуда.

Текст кхьейди ва шикил ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4