Меню
6+

Сетевое издание «Кюре»

28.05.2021 13:39 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Бажарагъдин пай ганвайди

Инсанар ва абуру тамамарзавай пешеяр жуьреба-жуьре я. Яни, садбуру пешеяр дуьшуьшдай, муькуьбуру рикIин эмирдалди хкяда. РикI алай пеше хкягъай касдихъ кIвалахда агалкьунарни жеда. «Жуван пеше, кар жагъайди хушбахтлу я…» — кхьенай Англиядин писатель, тарихчи Томас Карлейлла.

Инсанри пешеяр хкягъуникай рахадайла, заз инал Карл Маркса лагьай келимаярни гъиз кIанзава: «Уьмуьрда вичин пеше дуьз хкягъиз тахьайди виридалайни бахтсуз кас я». ГьакI хьайила, къе чаз вичикай чи газет кIелзавайбуруз куьрелди суьгьбет ийиз кIанзавай Кьасумхуьруьн 2-нумрадин юкьван школадин дидед чIалан ва литературадин муаллим Пирис Эмировна Нежведилова бахтлу кас яз гьисабиз жеда.

- За муаллимвилин пеше дуьшуьшдай ваъ, рикIин эмирдалди хкягъайди я, и пешедин иеси хьунал къе за шадвал, дамахни ийизва, — лугьузва Пирис Нежведиловади. – Школада гъвечIи класса кIелзавай йисарилай зи рикIе муаллим хьунин къаст авай. Сифте нубатда зун муаллимвилин четин, гьа са вахтунда гзаф гьуьрметлу пешедал ашукьарайди зи рагьметлу дах я. Яргъал йисара школада акьалтзавай несилдиз дерин чирвилер гайи зи дах Эмир Шабанован тIвар къени гзафбуру гьуьрметдивди рикIел хкизва. И кардални за дамахзава.

Вичин пеше намуслудаказ кьилиз акъудзавай, кар алакьдай, бажарагъдин пай ганвай инсанар акурла, лугьунни ийида: «Аллагьди ганвай пай я». Аллагьди акьалтзавай несилдиз чирвилер ва абур тербияламишдай бажарагъдин пай ганвайбурукай сад Пирис Эмировна я лагьайтIа, зун ягъалмиш жедач. Ада вичин дерин чирвилералди, намуслу зегьметдалди, иллаки вири уьмуьрдин кар яз хкянавай муаллимвилин пешедал ашукь хьуналди ва тербияламишунин устадвилелди школадин муаллимрин, аялрин ва абурун диде-бубайрин патай лайихлу гьуьрмет къазанмишнава.

Пирис Эмировнадин пешекарвал къачунин рехъ масадбурулай са куьнални тафаватлу туш: ада 1978-йисуз Кьасумхуьруьн 1-нумрадин юкьван школа лап хъсан къиметар аваз акьалтIарна. ГъвечIи чIавалай рикIе авай мурад кьилиз акъудун патал дагъви руш Дагъустандин Государственный университетдин филологиядин факультетдин урус чIаланни дагъустандин чIаларин отделенидик экечIна, 1984-йисуз анаг акьалтIарна. Жегьил пешекарди вичин зегьметдин рехъ 1984-йисуз Кьасумхуьруьн 2-нумрадин юкьван школада дидед чIалан ва литературадин муаллимвиле кIвалах авунилай башламишна. Сифте йикъарилай Пирис Нежведиловади университетда къачур чирвилер практикада ишлемишна ва деринарна, тежрибалу муаллимривай тарс гунин, аялрихъ галаз кIвалах тешкилунин тежриба чирна, вири къуватар желбна зегьмет чIугуналди, школадин коллективдин патай ихтибар ва гьуьрмет къазанмишна.

Ингье, Пирис Нежведиловади гьа са школада муаллимвиле кIвалахиз 37 йис я. Муаллим яз ам и йисара гьихьтин дережайриз акъатна?

И суалдиз са шумуд муаллимди ихьтин жаваб гана: «Чаз Пирис Эмировна чи школада гьакъисагъвилелди кIвалахзавай, гьар йисуз кIвалахда агалкьунар къазанмишзавай муаллим яз чида. Муаллим яз адан чирвилер гунин, тербияламишунин кIвалахдин ери лап кьакьанди я. Тежриба авай пешекар ятIани, ам вичин квалификация, устадвал хкажун патал ара датIана машгъул жезва. Пирис Эмировна вичин пешедин халис устад я».

П. Нежведиловадин намуслу зегьметди, ада гъавурда аваз тухузвай кIвалахди вичин хъсан нетижани гузва. ИкI, ада чирвилер ва тербия гайи са шумуд касдикай чIехи дережайрин руководителар, хъсан пешекарар – духтурар, муаллимар, инженерар… хьанва. Ада чирвилер гузвай гадайрини рушари гьар йисуз райондин ва республикадин школьникрин олимпиадайра кIвенкIвечи чкаяр кьазва.

Тежрибалу муаллимди школада дидед чIалан ва литературадин хъсан кабинетни тадаракламишнава.

Пирис Эмировнади школада 6-классдиз регьбервал гузва. КIелунин ва ахлакьдин жигьетдай класс школада хъсанбурун жергеда хьун, гьелбетда, тежрибалу муаллимдин бегьерлу кIвалахдин нетижа я.

Са шумуд йисуз Пирис Эмировна «Йисан муаллим» ва «Виридалайни хъсан классдин руководитель» конкурсрани гъалиб хьана.

Намуслу зегьметдиз килигна 2010-йисалай кьилин категориядин муаллим тир П. Нежведиловадиз «Россиядин Федерациядин образованидин гьуьрметлу работник» лагьай тIвар, райондин образованидин управленидин ва школадин дирекциядин патай Гьуьрметдин грамотаяр ганва.

Пирис Эмировнадихъ вичин рикI алай кIвалах гележегдани аферин алаз тамамардай мягькем сагъламвал ва къуватар хьун чи мурад я.

Гьакъикъатдани, туьркерин шаир Надым Хикмета лагьайвал, ашкъидивди кIвалахал физвай ва шадвилелди кIвализ хквезвай инсан бахтлу кас я. И келимаяр ара датIана 37 йисуз кIвалинни школадин рехъ атIузвай Пирис Эмировна Нежведиловадизни хас я.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3