Меню
6+

Сайт «Кюре»

28.05.2021 13:24 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Муаллимриз – пишкешар, выпускникриз – алхишар

Суварар ва лишанлу йикъар майдин вацра са шумуд ава.

Абур районда вини дережада аваз къейдни авуна. Санлай вири уьлкведа хьиз, райондани 22-майдиз школайра эхиримжи зенг ягъунин мярекатар, коронавирусдин тIегъуьндихъ галаз алакъалу яз эцигнавай сергьятвилерал амал авуналди, хъсан тешкиллувал аваз кьиле фена.

Агъа-СтIалрин Къазмайрин юкьван школа. Пакаман сятдин 8-далай эгечIна пайдахривди, плакатривди, шараривди безетмишнавай адан гьаятдиз муаллимар, школьный формаяр алай ва гъилера цуьквер авай школьникар, абурун диде-бубаяр кIватI жезва. Виридан гуьгьуьлар шад я, чинра ачухвал ава, сиверал хъвер ала.

Пакаман сятдин 9 тамам жедайла школадин 1-6-классра кIелзавайбур эхиримжи зенг ягъуниз талукьарнавай шадвилин линейкада акъвазна. Ана иштиракиз атанвай Сулейман-Стальский райондин Кьил Нариман Шамсудинович Абдулмуталибов, Дагъустан Республикадин милли политикадин ва динрин крарин рекьяй министр Энрик Селимович Муслимов, райондин образованидин управленидин начальник Гьуьсейн Рабидинович Шихбабаев ва жавабдар маса ксар школадин директор Жабраил Агъамирзоевич Асланова ва школьникри цуькверин кIунчIар вугуналди къаршиламишна.

Эхиримжи зенг ягъунин мярекат кьиле тухузвайди тир тербиядин рекьяй школадин директордин заместитель Шамсият Ханвердиевади шадвилин линейкадал выпускникриз атун теклифна. Кьиле классрин руководителар тир Таина Аликберова, Ренальда Къемберова, Жамиля Мусаева аваз 11-пуд классдин выпускникар линейкада акъвазна.

Мярекат ачухунин лишан тир Россиядин Федерациядин пайдах хкажунин ихтибар выпускникар тир Хадижат Салиховадиз ва Сабир Гьасановаз авуна.

Россиядин Гимн яна.

Школадин баркаллу тарихдикай, анаг акьалтIарна, чIехи дережайриз акъатай генералар, алимар, республикадин ва федеральный дережайрин къуллугъчияр, хъсан пешекарар хьайи ксарикай, акъатзавай кIелунин йисуз школадихъ хьайи агалкьунрикай школадин директор Жабраил Асланова гегьенш рахунар авуна. Кьилди къачуртIа, йисан кьиляй-кьилиз чIугур дурумлу зегьметдай ада муаллимриз чухсагъул малумарна. Школа акьалтIарзавай 21 выпускникдихъ элкъвена, Жабраил Асланова алава хъувуна: «Къе куьне чIехи уьмуьрдиз кам вегьезва, ам бахтлуди хьурай!».

Гаф райондин Кьил Нариман Абдулмуталибоваз гана. Ада муаллимриз, кIелзавайбуруз, кьилди выпускникриз, диде-бубайриз эхиримжи зенг ягъунин сувар вичин, райадминистрациядин, Собранидин депутатрин патай мубаракна, атанвай мугьманар тебрикна.

- Гьуьрметлу мярекатдин иштиракчияр! – лагьана райондин Кьили, — къе вири уьлкведа, республикада хьиз, чи райондани эхиримжи зенг ягъунин мярекат кьиле физва. Алай кIелунин йис районда 272 выпускникди акьалтIарзава. Абурукай 21 выпускник и школадай я. Школадин 4 выпускник медалриз лайихлу хьанва. Ида чак шадвал кутазва, мадни ида къалурзава хьи, 2 генерал, са шумуд кас алимар акъатай и школадин баркаллу крар, рехъ чи жегьилри давамзава. Школадихъ райондин ва республикадин олимпиадайрин гъалибчиярни хьана. Къенин мярекатдал заз хуьре 400 аялдин чкаяр авай школадин цIийи дарамат эцигуник еке пай кутур и хуьруьнвияр, и школадин выпускникар тир генералар Энрик Муслимоваз, Салман Бабаеваз райондин руководстводин, школадин муаллимрин, кIелзавайбурун ва абурун диде-бубайрин патай еке чухсагъул лугьуз кIанзава. Мадни заз инанмишвал ийиз кIанзава хьи, къведай кIелунин йис цIийи школада башламишда.

Райондин Кьил Нариман Абдулмуталибова алава хъувурвал, меценат Салман Бабаевахъ куьгьне школа алай чкадал аялрин бахча патал цIийи дарамат эцигдай фикир-хиялни ава.

1985-йисан и школадин выпускник, генерал-майор, алай вахтунда Дагъустан Республикадин милли политикадин ва динрин крарин рекьяй министр Энрик Муслимоваз гаф гун мярекатдин иштиракчийри гурлу капар ягъуналди къаршиламишна. Ада Дагъустан Республикадин Кьилин везифаяр вахтуналди тамамарзавай Сергей Алимович Меликован, ДР-дин Гьукуматдин, Халкьдин Собранидин ва вичин патай къенин сувар мубаракна, вичи и школада кIелай 1981-1985-йисар, вичиз тарсар гайи муаллимар (са-садан тIвар кьаз) рикIел хкана, выпускникриз тебрикдин ва алхишдин келимаяр лагьана.

Рахунрилай гуьгъуьниз Энрик Муслимова и школада яргъал йисара муаллимар яз кIвалах авур ветеранар тир Жабраил Аслановав, Агьмедбег Ферзилаевав, Играмудин Къафаровав, Нисейхалум Шихнебиевадив, Жаният Ишрефовадив, Тикезбан Муталибовадив, Маиса Шагьмирзоевадив, Омар Омаровав ва масабурув ДР-дин милли политикадин ва динрин крарин рекьяй министерстводин Гьуьрметдин грамотаяр ва муаллимрив махсус знакар вахкана.

Алай кIелунин йис са шумуд выпускникди кIелуна ва спортда агалкьунар аваз акьалтIарна. Абурун жергедай тир 15 выпускникдив школадин директор Жабраил Асланова Гьуьрметдин грамотаяр, выпускникар тир Карина Агъамирзоевадив ва Ислам Фатаховав «Йисан лап хъсан волонтер» гафар кхьенвай грамотаяр вахкана.

Мярекатдал выпускникриз тебрикдин келимаяр гваз гьакIни абурун сифтегьан муаллимар хьайи Эльвира Абдулаева, Ильяна Агъамирзоева, 11-классрин руководителар тир Таина Аликберова, Ренальда Къемберова, диде-бубайрин тIварунихъай Надежда Фатахова рахана.

Школадин 1-классдин аялри выпускникриз, 11-класс акьалтIарзавайбуру муаллимриз бахшнавай шиирар хуралай кIелна, манияр лагьана.

Выпускникар тир Ислам Фатахова, Заира Абдулманафовади, Зарема Мусаевади «Чирвилерин куьлег» 1-классда кIелзавай Гьабиб Бедевовав ва Шамил Къарабеговав вахкана.

Мярекатдал выпускникри 1-классдин аялриз, абуру выпускникриз пишкешар гана, ахпа абуру кьуьлер авуна, цавуз шарар ахъайна.

Эхиримжи зенг ягъунин чIехи ихтибар 11-классдин ученикар тир Абдулашим Абдулманафоваз, Карина Агъамирзоевадиз ва 1-классдин ученикар тир Абубакр Мирземетоваз ва Анахалум Ибадулаевадиз авуна.

Школадин эхиримжи зенг ягъунин мярекатдилай гуьгъуьниз райондин Кьил Нариман Абдулмуталибов, ДР-дин милли политикадин ва динрин крарин рекьяй министр Энрик Муслимов Агъа-СтIал Къазмайрин хуьре 400 кIелзавайдан чкаяр аваз эцигзавай юкьван школадин дараматдал фена, тухванвай ва тухуз гъиле авай кIвалахрихъ галаз таниш хьана, подряддин организациядин векилрихъ ва устIаррихъ галаз ихтилатар авуна. Санлай къачурла, абуру тухванвай кIвалахрилай разивал къалурна.

***

Эхиримжи зенг ягъуниз талукьарнавай шадвилин мярекатар райондин вири школайра, Роспотребнадзордин истемишунрал амал авуналди, хъсан тешкиллувал аваз кьиле фена.

Текст кхьейди ва шикилар ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

18