Райондин Кьил – хуьрера
Муниципальный райондин Кьил Нариман Абдулмуталибов, райадминистрациядин ва хуьрерин поселенийрин администрацийрин, гьакIни талукь къуллугърин жавабдар работникарни галаз, са шумуд хуьруьз фена ва анра общественный зулар (зонаяр) дуьзмишунин кIвалахар кьиле тухузвай гьаларихъ галаз таниш хьана.
Сифтедай райондин Кьил «Яшайиш патал шегьердин къулай шартIар арадал гъун» программадай общественный территорияр дуьзмишунин кIвалахар кьиле тухузвай Курхуьрел фена. Ана СтIал Сулейманан тIварунихъ галай куьчеда сквер эцигунин кIвалахар алай йисан мартдин вацра гъиле кьунай, мукьвал вахтара анал кIвалахар акьалтIарда. Подряддин «Дорожно-магистральное строительство» ООО-ди анал 70 процентдин кIвалахар акьалтIарнава.
Гуьгъуьнлай Нариман Абдулмуталибов КIварчагъ дередин хуьрериз фена. НуьцIуьгърин хуьре ада Шоссейная куьчеда сквер дуьзмишунин кIвалахар ахтармишна. И кIвалахар тухунив подрядчик «ИП Алискендаров Х. Ш.» мартдин вацра эгечIна, кIвалахар 90 процентдин тамамарнава. «Яшайиш патал шегьердин къулай шартIар арадал гъун» программадай эцигзавай объект алай вацран эхирра ишлемишиз вахкуда.
Зизикрин хуьре Нариман Абдулмуталибов «Чкадин кьил кутунар» проектдай «Гермес» ООО-ди эцигнавай аялрин майдандихъ галаз таниш хьана. Майдандин зул герек инфраструктурадалди таъмин я.
- Ихьтин общественный территорияр дуьзмишунихъ социальный жигьетдай еке метлеб ава, — къейдна Нариман Абдулмуталибова. – Абуру хуьрерин агьалийрин яшайиш хъсанарда, къулайди ийида.
Х.Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
