Юбилярдин гьуьрметдай

Малум тирвал, алай йисуз шаир ва журналист Абидин Камилован 70 йис тамам хьанва. И лишанлу вакъиадиз талукьарна юбилярдин гьуьрметдай и йикъара Алкьвадар Гьасан-эфендидин тIварунихъ галай райондин центральный библиотекада литературадин вечер кьиле фена.

И мярекатдиз талукьарна ана аквадай чкайрал шаирдин ктабрин выставка ва «Хайи халкьдин руьгьдин даях» кьил ганвай адан шикилрин плакатни акъуднавай.

Залда ширинлухар алай столрихъ Кьасумхуьруьн 1-нумрадин ва ЦIийи поселокдин юкьван школайрин аялар, муаллимар, музыкантар, манидарар, юбилярдин са къелемдин дустар, адан яратмишунрал рикI алайбур ацукьнавай.

Вечер, бажарагълу шаир, РФ-дин журналистрин Союздин член, Дагъустандин культурадин лайихлу работник Камилов Абидин Саидовичакай куьруь гаф рахуналди, И. Гь. Тагьирован тIварунихъ галай райондин Культурадин Дворецдин директордин заместитель Ярагьмед Ярагьмедова ачухна ва кьиле тухвана.

Анал юбилярдикай ва адан яратмишунрикай чпин фикирар, тебрикдин гафар гваз ЦБС-дин методист Наида Алхасова, библиограф Минасат Абасова, шаирар ва писателар тир Гьуьсейн Гьуьсейнов, Райсудин Набиев, Агьмедпаша Агьмедпашаев ва Эдуард Ашурагъаев рахана.

ЦIийи поселокдин СОШ-дин лезги чIаланни литературадин тарсар гузвай муаллим Заира Селягьовади А. Камилован «Диде» шиир, винидихъ тIварар кьур школайрин аялрини шаирдин шиирар хуралай кIелна. Райондин Культурадин Дворецдин гьевескар артистри Абидин Камилован чIалариз гьевескар композитор Майина Сайидовна Абдулмуталибовади теснифнавай са шумуд мани лагьана.

Эхирдай анал ЦБС-дин директор Назиля Шихбабаевади юбилярдин тIварцIиз хуш келимаяр лагьана, адаз Гьуьрметдин грамота ва къиметлу савкьат гана.

Мярекатдин эхирдай вичин гьуьрметдай ихьтин мярекат тешкилунай, тебрикдин гафарай, савкьатрай ада и мярекатда иштирак авур вирибуруз еке чухсагъул лагьана.

***

Алай йисан 20-майдиз шаир ва журналист Абидин Камилован 70 йис тамам хьуниз талукьарнавай шад мярекат ЦIийи поселокдин СОШ-дани кьиле фена. Ам инин лезги чIалан муаллимри чIехи классра кIелзавай аялрин куьмекдалди тешкилнавайди тир. Классда аквадай чкадал шаирдин ктабрин, адан эсерар авай газетринни журналрин выставка акъуднавай.

Вечердин программадик аялри хуралай кIелай шаирдин шиирар, адан чIалариз кхьенвай манияр, милли кьуьлер, «Гафунин къуват» гъвечIи сегьне ва тебрикар квай.

Эхирдай юбилярди и мярекат тешкилунай, тебрикрай вирибуруз чухсагъул лагьана ва школадиз савкьат яз вичин «Хкягъай эсерар» ктаб багъишна.

Вадим Жамалдинов