Жуван пайни хьунал за дамахзава

Зазни жуван уьмуьрда жуьреба-жуьре чкайра ва хилера кIвалах авун кьисмет хьана. Заз къе инал жува авур къуллугъдин тIварар кьаз кIанзава. 1957-йисуз пединститут акьалтIарайдалай гуьгъуьниз за республикадин "Коммунист" газетдин литработниквиле, ДАССР-дин Министррин Советдин консультантвиле, Азербайжандин искусстводин институтдин ассистентвиле, республикадин изобразительный искусстводин музейдин директорвиле, Минкультурадин инспекторвиле, Мегьарамдхуьруьн райондин Советский хуьруьн школадин директорвиле, ДАССР-дин Верховный Советдин орготделдин инструкторвиле, Ростовдин университетдин аспирантвиле, "Коммунист" газетдин партотделдин зеведишвиле, и газетдин корреспондентвиле кIвалахна. 1982-йисалай 2001-йисалди заз "Куьредин хабарар" газетдин редакторвиле кIвалах авун кьисмет хьана. Жуван хайи райондин газетда кIвалах авунал за къе дамахни ийизва.

Жува кIвалахзавай йисара чна газетдин чинра районэгьлийрин вилик акъвазнавай месэлайрикай, хуьрера, майишатра кьиле физвай кIвалахрикай макъалаяр гана.

Райондин общественно-политический уьмуьр къалурунай, акьалтзавай несилдиз военно-патриотический тербия гунай редакциядин коллективдиз са шумудра Гьуьрметдин грамотаяр гунални за дамахзава.

Мад са кардикай лугьуз кIанзава: за редакциядиз корреспондентвилин кIвалахдал кьабулай, захъ галаз редакцияда са шумуд йисара кIвалахай хейлин работникрикай къе газетдин тежрибалу къуллугъчияр, лайихлу тIварарин сагьибар, Россиядин Федерациядин журналистрин, лезги писателрин Союздин членар хьанва. И кардални за дамахзава.

Сейфудин Муталибов, 1982-2001-йисара газетдин редактор