Бегьерлу гад ва бул пIинияр

Райондин агропромышленный комплексда хуьруьн майишатдин 27 кархана, 3 СПК, лежбервилинни фермервилин 47 майишат, 20942 хсуси куьмекчи майишатар кардик хьуни ва и хиле 960 арендаторди кIвалахуни и кардин патахъай шагьидвал ийизва.

Райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова чаз лагьайвал, карханайри, лежбервилин майишатри гзаф майданра, асул гьисабдай ичер, ципицIар, салан майваяр (теплицайрин майишатра) гьасилзава. Гьа са вахтунда, КФХ-ри, ЛПХ-ри ва агьалийри чпин кIвалерихъ галай усадьбайра хутар, пIинияр, чуьхверар, шефтелар, машмашар, жумар ва маса няметарни гьасилзава.

- Чи ерияр, иллаки Кьасумхуьруьн, Вини СтIалрин, Курхуьруьн, Кьулан СтIалрин, Алкьвадрин, Агъа-СтIалрин, Герейханован хуьруьн, Сийидрин мулкар пIинияр гьасилуниз кутугай чкаяр я, — лугьузва Гь. Абдулкъафарова. – И хуьрера, гьакIни райондин маса хуьрера агьалийри хизандин игьтияжар патал пIинияр гьасилиз гзаф йисар я. ПIинийрин 1-5 гектар багълар кутунвай лежбервилин майишатарни ава. ПIинияр райондин шартIара менфятлу тирди фикирда кьуналди, эхиримжи йисара хуьруьн майишатдин карханайрини, инвестиционный проектар уьмуьрдиз кечирмишуналди, пIинийрин багълар кутазва. Ида инанмишвал кутазва хьи, районда пIинийрин багъларин майданар йисандавай-суз артух жеда, ида инсанриз кIвалахдин алава чкаярни арадал гъида.

Гьамидин Абдулкъафаровахъ галаз чун пIинияр гьасилунал машгъул тир лежбервилин ва хсуси куьмекчивилин са шумуд майишатдизни фена. Чаз акурвал, багълара, кьилдин ксарин усадьбайра пIинийрин тарифдин бегьер агакьнава. Гад бегьерлуди яз атуни хуьрерин зегьметчиярни шадарзава. Абуру атIай пIинияр чпин игьтияжриз ишлемишзава, гьакIни муьштерийриз масани гузва. Экологиядин жигьетдай михьи тир ва дадлу пIинийриз муьштерийрин патай игьтияжни ава.

Текст кхьейди ва шикил ягъайди Хазран Кьасумов я