Меню
6+

Сайт «Кюре»

02.07.2021 10:03 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

КIварчагърин аялрин бахчада

Акьалтзавай несилдиз школадилай виликан чирвилер гунин, абурук ватанпересвилин сифтегьан гьиссер кутунин карда аялрин бахчайрин роль екеди ва важиблуди я. И ва маса рекьерай КIварчагърин хуьре кардик квай аялрин бахчада тайин кIвалах тухузва.

Аялрин бахчадин заведующий Нигерханум Абдиевади чаз лагьайвал, коронавирусдин азар акъатдалди вилик бахчада 55 аял авай. Роспотребнадзордин истемишунрихъ галаз кьадайвал, алай вахтунда бахчада 38 аялди тербия къачузва. Аялар пуд группадиз пайнава.

Чаз малум хьайивал, аялрин бахчада чпихъ кIвалахдин гзаф йисарин тежриба авай, бицIекрал рикI алай пешекарри кIвалахзава. ИкI, Инсаф Абдиевади 41 йисуз аялрин бахчадин заведующийвиле намуслудаказ зегьмет чIугуна. Адет яз, хъсан пешекарар виринра герек я. Бахчадин коллективдин тIалабуналди, алай вахтунда Инсаф Экберовнади ина тербиячи яз кIвалахзава. Адан тежрибади, меслятри жегьил пешекарриз чпин хиве авай везифаяр вахтунин истемишунриз жаваб гудайвал кьилиз акъудунин карда куьмек гузва.

- Гьакъикъатдани, аялрин бахчада чпин пешедал, бицIекрал рикI алай инсанри кIвалахзава, 1959-йисуз эцигай бахчадин дарамат ихьтин хъсан гьалда аваз хуьн абурун зегьметдин нетижа я, — лугьузва Инсаф Абдиевади.

БицIекрин сагъламвал хуьн – им вири йисара эвелимжи кIвалах я, коронавирусдин азар чкIанвай алай вахтунда и месэла мадни хцидаказ акъвазнава. Аялрин сагъламвал хуьн ва мягькемарун, гьакIни аялрин бахчадин санитариядин гьалар хъсанарун патал медсестра Галина Абдурагьимовади чIугвазвай зегьметни тариф авуниз лайихлу я. Вичихъ медсестравиле кIвалах авунин рекьяй 41 йисан тежриба авай Галина Абдурагьимовади бицIекрин ва бахчада кIвалахзавайбурун сагъламвилин гьал гьар юкъуз ахтармишзава, абурухъ галаз профилактикадин еке кIвалахни тухузва. Аялрин бахча коронавирусдин азар чкIунин вилик пад кьадай герек шейэралдини таъмин я.

Аялрин бахчада тербиячийри бицIекрихъ галаз сифтегьан чирвилер гудай, зигьин ва кьатIунар хкаждай ва маса жуьредин мярекатар кьиле тухузва. Лагьана кIанда, гьар са мярекат лезги чIалалди тешкилзава. ИкI, эхиримжи вахтара Ватандин ЧIехи дяве башламишна 80 йис тамам хьуниз, лезги чIал хуьниз, «Шарвили» эпосдин сувариз талукьарна бицIекри тухвай мярекатра абурун диде-бубайрини иштиракна.

БицIекриз чими тIуьнар гунин месэлани бахчада хъсандиз эцигнава. Ашпаз Румина Абдиевади гьазурзавай хуьрекар бицIекри иштягьдивди незва.

Санлай къачурла, аялрин бахчада тербиячияр, музыкадин рекьяй педагог, муаллим-психолог ва маса рекьерай 8 касди кIвалахзава.

Аялрин бахчадин заведующий Нигерханум Абдиевади чаз лагьайвал, бахчада тербия ва сифтегьан чирвилер къачур 11 аял цIийи кIелунин йис башламиш хьайила 1-классдиз фида.

Чаз акурвал, аялрин бахчада бицIекриз къугъунар ийидай, ксудай, тIуьнар недай, гьар жуьредин мярекатар тухудай вири жуьредин шартIар яратмишнава.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

9