Меню
6+

Сайт «Кюре»

02.07.2021 09:58 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къуватар хьурай, магьсулдарар!

Гатун гуьлуьшан югъ. Къизилдин ранг акьалтнавай никIе «чуьлдин гимиди» — комбайниди гьерекатзава. НикIе инал-анал самарин кIунтIар ала. Иридаказ къуьлуьн кьилер кьунвай техилдин никIери пакаман кьиляй акъатнавай кьезил шагьвардал лепе гузва. Заз акI я хьи, къуьлуьн никIери чеб битмишарай лежберриз, юкь агъузна, икрамзава…

И шикил чаз Сулейман-Стальский райондин кIвенкIвечи карханайрикай сад тир «Зардиян» ООО-да акуна. Эхь, гьуьрметлу газет кIелзавайди, куьн гъавурда акьурвал, райондин хуьруьн майишатдин карханаяр, лежбервилинни фермервилин майишатар гад кIватI хъувунин важиблу кампаниядив эгечIнава.

- Бубайрин мисалда лугьузвайвал, гад гьарай я, адан са йикъа хъуьтIуьн са варз тухарда, — лугьузва чахъ галаз «Зардиян» карханадиз атай райондин хуьруьн майишатдин управленидин начальникдин заместитель Гьамидин Абдулкъафарова. – Багъларани уьзуьмлухра, саларани производстводин маса хилера агротехникадин серенжемар кьиле тухунихъ галаз сад хьиз, хуьруьн майишатдин карханаяр ва арендаторар гад кIватI хъувунив вири патарихъай хъсан гьазурвилер акуналди эгечIнава. Виликамаз туькIуьрнавай план-графикдин бинедаллаз районда гад 25-30 йикъан къене кIватI хъувуна акьалтIарда.

Районда сифтебурукай яз гад агудунив дуьзендин зонада авай «Зардиян» ООО-да эгечIнава. Санлай къачурла, уьзуьмчивилел, багъманчивилел, магьсулдарвилел машгъул тир карханадихъ 82 гектар магьсулрин никIер ава. Чаз акурвал, никIера техилдин тарифдин бегьер агакьнава, самун алафни булдаказ ава.

- Алай йисан бегьер патал шазан зулухъай къуьл цайи никIерихъ карханадин зегьметчияр иесивилелди гелкъвена, идан нетижа яз никIера техилдин бул бегьерни дигмиш хьана, — лугьузва карханадин кьилин агроном, Дагъустан Республикадин хуьруьн майишатдин лайихлу работник Къурбан Магьмудова. – Алай йисуз чна никIерин гьар са гектардай 35 центнердилай тIимил тушиз техил кIватI хъийида. Сифтегьан 20 гектардай лагьайтIа, чна саки 80 тонн вахчунва.

Карханада гад агудунин кIвалахар тежрибалу комбайнер Хейрудин Эмирбекова тамамарзава. И карда адаз гада Кьасума куьмек гузва.

- НикIерин хъсан гьал, анра агакьнавай тарифдин бегьер акурла, рикIелай гатун йикъан зегьемвал, юргъунвални алатзава, — лугьузва Х. Эмирбекова. – Мадни, халкьдин суфра берекатлу авун патал жуван гададихъ галаз зегьмет чIугунал за шадвални ийизва.

НикIерай кIватI хъувур техил хармандал хутахунин карда «ГАЗ-53» маркадин машинрал кIвалахзавай шоферар тир Сефибег Гьажибекова ва Имаммегьамед Бакарова чIугвазвай зегьметни тариф авуниз лайихлу я.

Комбайнидин гуьгъуьналлаз гад агудай никIера пресс-подборщик галай тракторди самар туькра кьазва.

- Санлай къачурла, алай йисуз районда 2245 гектардай къуьл ва мух кIватI хъийида, — лугьузва Гьамидин Абдулкъафарова. – И кардал 10 комбайни ва пресс-подборщикар галай тракторар машгъул жеда. Дуьзендин зонадин карханайра, майишатра ва арендадин участокра гад агудна акьалтIарай комбайнияр гуьгъуьнлай Герейханован, Кьасумхуьруьн, Агъа-СтIалрин, Кьулан СтIалрин, Вини СтIалрин, Курхуьруьн, КIварчагърин хуьрерин поселенийра ва гуьнепатан зонадин хуьрера гад агудунал желбда. И кар патал кIвалахдин план-график гьазурнава.

… Югъ нисинилай алатайла, чун «Зардиян» ООО-дин гад кIватI хъийизвай никIерай экъечIна. Гуьгьуьлар шад яз чна тикрарзава: квез къуватар хьурай, халкьдин суфра берекатлу авун патал зегьмет чIугвазвай магьсулдарар!

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

11