Ремонтрин ери ахтармишна

Алатай гьафтеда Сулейман-Стальский райондин Кьил Нариман Абдулмуталибова Чуьхверхуьрел армспортдай вердишвилер къачузвай спортдин залда ремонтрин кIвалахар кьиле тухузвай гьал ахтармишна. ЦIийи Макьарин хуьруьн поселенидин администрациядин кьил Асамудин Къазиагьмедовахъ ва армспортдай секциядин руководитель Малик Тагьирбековахъ галаз санал райондин Кьил спортзалдин къенепата тухузвай кIвалахрихъ галаз таниш хьана. Акурвал, дараматда дакIарар, чиле авай пол тамамдаказ дегишарнава, решетка авай ракIарар кутунва.

Къейд ийиз кIанзава хьи, спортдин лайихлу мастер, дуьньядин чемпион Малик Тагьирбекован гъилик жаванри армспортдай вердишвилер къачузвай ва устадвал хкажзавай спортдин залда ремонтрин кIвалахар тухуниз алатай йисуз пулунин такьатар ахъайнай. Ремонтрин кIвалахар тухунилай, санлай къачурла, Нариман Абдулмуталибова разивал къалурна. Гьа са вахтунда, ада къейд авурвал, дараматдин къав дегишарунин, чими ийидай ва экв гудай къурулуш монтаж авунин, цIийиз акал хъувунвай дараматда гьамамдин ва парталар хтIундай чкаяр дуьзмишунин кIвалахар давамарун чарасуз я. И кIвалахриз акъатдай пулунин такьатрин смета тади гьалда туькIуьрунин патахъай Н. Абдулмуталибова талукь тир къурулушриз тапшуругъ гана.

- И залда вердишвилер къачузвай ва устадвал хкажзавай гадайри Россиядин ва международный дережада еке тир агалкьунар къазанмишиз са шумуд йис я, — лагьана Нариман Абдулмуталибова. – ИкI, алатай йисуз Малик Тагьирбекован тербиячийри Дагъустан Республикадин чемпионатда командайрин арада сад лагьай чка кьуна. Алай аямдин къулайвилер авай спортдин зал арадал гъуни, са шакни алачиз, чи спортсменриз мадни чIехи агалкьунар къазанмишдай, тренерриз-преподавателриз бегьерлувилелди кIвалахдай мумкинвал гуда.