Школьникар мугьманда

Суварин вилик чи редакциядиз кьиле дидед чIалан тежрибалу муаллим Пирис Нежведилова ва тешкилатчи Амирханова Полина аваз Кьасумхуьруьн 2-нумрадин юкьван школадин кIелзавай аялрин са десте мугьман хьана. Абур «Куьредин хабарар» газетдин кьилин редактор Асият Мирзалиевади вичин кабинетда хушвилелди кьабулна, Асият Мусаевнади газетдин тарихдикай, алатай йисуз чи райондин газетдин сифте нумра акъудайдалай инихъ 90 йис тамам хьанвайдакай и лишанлу вакъиа алай йисуз къейд ийидайдакай, 1931-йисалай инихъ газетдиз гьар йисара регьбервал гайи редакторрикай ва гзаф йисара ина кIвалах авур ва алай вахтундани кIвалахзавай работникрикай марагълу суьгьбет авуна, аялрин патай атай са жерге суалриз тамам жавабар вахкана.

Гуьгъуьнлай редакцияда 40 йисалай виниз кIвалахзавай анин культурадин отделдин заведующий, шаир ва журналист, ДР-дин культурадин лайихлу работник Абидин Камилова лезги чIалан муаллим яз кIвалахзавай вич чи газетдин редакциядиз акъатуникай, вич шаир хьиз майдандиз акъатунин кардани газетдин таъсирдикай, вичи кIвалахзавай кабинетда гьакIни «Куьредин ярар» общественный культурадин центр ва лезги писателрин Союздин (ЛПС) райондин отделенияни кардик квайди, ана аквадай чкайрал чи халкьдин баркаллу рушаринни къагьриман рухвайрин, гьакIни чи райондин яратмишдай интеллигенциядин векилрин портретар ва шикилар янавайди, абурун цIийиз акъатзавай ктабрин выставкани акъуднавайди лагьана.

Эхирдай ада аялриз илим ва хайи чIал чируниз эвер гана, абуруз вичин «Газетдикай баллада» шиирни кIелна, абурун суалриз жавабар вахкана.

Гуьгъуьнлай мугьманар ина газет акъудун тешкилнавай гьалдихъ галаз таниш хьана.

Эхирдай газетдин кьилин редактор Асият Мирзалиевади хайи газетдиз икI фикир гунай, атанвай мугьманриз ва аялриз чухсагъул лагьана ва абур ширинлухралди къунагъ авуна.

С. Баламетова