Меню
6+

Сетевое издание «Кюре»

14.02.2022 09:15 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Духтуррин зегьмет тариф авуниз лайихлу я

Духтурвилин пеше виридалайни гьуьрметлуди, герекди, гьа са вахтунда, четинди тирди виридаз чизва. Вири дуьнья завалдик кутунвай коронавирусдин тIугъвал акъатайдалай гуьгъуьниз инсанар и пешедин иесийриз чпин уьмуьр хуьзвайбуруз, къутармишзавайбуруз хьиз кьетIивилелди килигзава. Къенин аямда им гьакъикъатдин карни хьанва.

Духтуррин кIвалахдилай инсанри разивал авун, абурун гьакъиндай хуш келимаяр лугьун мадни шадвал кутадай кар я. Мукьвара Агъа-СтIалрин хуьряй тир 1-группадин инвалид Рабият Абдурашидовна Гьуьсейхановадилай чи газетдин редакциядиз хуьруьн участковый врач-терапевт Муминат Омаровадилай газетдиз макъала кхьин тIалабзавай чар атана.

«- Коронавирусдин тIугъвалди кIвалах хейлин артухарнаватIани, духтур Муминат Мегьамедовна мукьвал-мукьвал зи патав къвезва, сагъламвал ахтармишзава… Ам тариф авуниз лайихлу пешекар, ширин мез авай инсан я», — кхьенвай яшлу дишегьлиди чарче.

Журналист я ман, къенин кар пакадал вегьин тийидай. Зун гьа юкъуз Агъа-СтIалрин хуьруьн врачебный амбулаториядиз фена, М. Омаровадикай газетдиз макъала кхьин патал.

Дуьз лагьайтIа, Муминат Мегьамедовна хъсан духтур тирди, ада вичин хиве авай везифаяр жавабдарвал аннамишна кьилиз акъудзавайди, адан кIвалахдилай хуьруьнвияр рази тирди заз фадлай хъсандиз чизвай. ЯтIани, яшлу дишегьлидин – инвалид касдин тIалабун за ашкъидивди кьилизни акъудзава.

Чун фейила, М. Омаровади жегьил са дишегьлиди гъанвай 5-6 йисан яшда авай аялдин сагъламвал ахтармишзавай, кабинетдин ракIарихъни кьуд кас нубат кьуна скамейкадал ацукьнавай.

- Коронавирусдик, стIалжемдик, гриппдик ва маса хумайрик начагъ яни, тушни чириз амбулаториядиз къвезвай инсанрин кьадар алай вахтунда артух хьанва, — вичин патав атанвай инсанриз килигайдалай гуьгъуьниз лагьана чаз Муминат

Мегьамедовнади. – Агьалийрин сагъламвал ахтармишун, лазимвал авайдаз медицинадин рекьяй куьмек гун – им вахтунин истемишун я. И жигьетдай чи ФАП-дин пешекарри кIвалахни тухузва.

Къейд авун лазим я хьи, Муминат Мегьамедовнади 1988-йисуз Дагъустандин медицинадин институтдин лечебный факультет акьалтIарна. Саки 5 йисуз ада райондин центральный больницада инфекционный отделенида кIвалахна.

1993-йисалай инихъ М. Омаровади, чна винидихъ лагьайвал, Агъа-СтIалрин врачебный амбулаторияда участковый врач-терапевт яз кIвалахзава.

М. Омаровади чаз лагьайвал, амбулаторияда медицинадин хилен 18 пешекарди кIвалахзава, абуру Агъа-СтIалрин хуьре ва Агъа-СтIал Къазмайрал яшамиш жезвай 5600 касдиз медицинадин рекьяй къуллугъзава. Хуьрерин агьалийрикай 1600 кас 18 йисал кьван яшда авай аялар ва жаванар (1 йисал кьван яшда авай аялар 57 ава), 1230 кас аялар хадай яшда авай дишегьлияр я.

- Яшар хьанвай инсанар, аялар ханвай дидеяр, бицIекар хьиз, 1, 2 ва 3-группайрин инвалидарни чи кьетIен гуьзчивилик ква, — давамарзава ихтилат Муминат Омаровади. – Чи медработникар и категорийрин инсанрин кIвалериз мукьвал-мукьвал физва, абурун сагъламвал ахтармишзава, лазимвал авайбуруз медицинадин рекьяй куьмекар гузва.

Чна винидихъ лагьайвал, коронавирус чукIуни вири медработникрин кIвалах артухарнава. Муминат Мегьамедовнади чаз лагьайвал, алатай йисуз кьве хуьре, план 1700 кас яз, 1306 касди тIугъвалдиз акси рапар яна. И кIвалах алукьнавай йисузни давамзава. Тек са январдин вацра 450-далай виниз агьалийри рапар янава. Эхиримжи вахтара кьве хуьрени коронавирусдик ва стIалжемдик начагъбурун кьадар тIимил хьанва.

Хуьре командировкада авай юкъузни чаз са шумуд касдивай И. Омаровадин кIвалахдилай разивилин келимаяр ван хьана. Гьакъикъатдани, Муминат Мегьамедовнадиз хуьруьнвийрин, санал кIвалахзавай юлдашрин патай лайихлу гьуьрмет ва авторитет ава.

Дидедиз авай гьуьрмет себеб яз М. Омаровадин гада Анварани духтурвилин пеше хкяна. Дагъустандин мединститут акьалтIарнавай Анвар Омаровича алай вахтунда Махачкъалада ракьун рекьин больницада духтур яз кIвалахзава.

Гьакъикъатдани, и четин шартIара инсанрин сагъламвал хуьнин къуллугъда акъвазнавай духтуррин зегьмет тариф авуниз лайихлу я.

Текст кхьейди ва шикил ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3