Инвестпрограмма – уьмуьрдиз

Муниципальный райондин Кьил Нариман Абдулмуталибов республикадин инвестиционный программадай хъвадай цин цIийи линияр эцигзавай ЦIийи Макьарин хуьруьн поселенидиз фена. Хуьруьн поселенидин администрациядин кьил Асамудин Къазиагьмедовахъ ва талукь тир пешекаррихъ галаз санал райондин Кьили цIийиз цин турбаяр тухунин ва хъвадай яд кIватIдай резервуар эцигунин кIвалахар ахтармишна. Нариман Абдулмуталибова подряддин организациядин векилрихъ галаз объектдал монтаждин кIвалахар тамамарунин вахтни веревирд авуна.

Райондин Кьил Нариман Абдулмуталибоваз лагьайвал, ЦIийи Макьарал хъвадай цин цIийи линияр эцигунин проект «Дирекция единого государственного заказчика-застройщика» ГУ-ди заказ гана 2020-йисуз туькIуьрна. Эцигунрин кIвалахрив 2021-йисан декабрдин вацра эгечIна, кIвалахар гъиле авай йисан гатун юкьвара акьалтIарун пландик кутунва. Гуьгъуьнлай поселенидин цIийи линияр «Сардаркент-Даркуш-Казмаляр» магистральный водопроводдихъ акалда.

Икьван чIавалди гьар сада 500 куб яд гьакьдай (1000 куб) кьве резервуардал 1 километрдин мензилда турбаяр тухванва. Проектдихъ галаз алакъалу яз резервуарар эцигна 2022-йисан февралдин вацран эхирра акьалтIарун лазим я. Цин линиядал пожарный гидрантарни галай 300 къуй (колодец) эцигда.

ЦIийи линияр тухвана акьалтIарайла поселенидик акатзавай кьве хуьре (ЦIийи Макьар ва Чухверхуьр) яшамиш жезвай 5500 кас хъсан еридин михьи целди таъминарда.